ବରିଷ୍ଠ ଆଇଏଏସ ଅଧିକାରୀ, ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ତଥା ଫାଇପ-ଟି ସଚିବଙ୍କ ସ୍ୱେଚ୍ଛାକୃତ ଅବସରକୁ ସ୍ୱୀକୃତି
ବିରୋଧୀଙ୍କ ମହଲରେ ଭାଳେଣୀ ଆରମ୍ଭ

#ଭୁବନେଶ୍ୱର(ଏନ୍‍.ଏମ୍‍.): ସ୍ୱେଚ୍ଛାକୃତ ଅବସର ନେବା ପାଇଁ ବରିଷ୍ଠ ଆଇଏଏସ୍ ଅଧିକାରୀ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ତଥା ଫାଇପ-ଟି ସଚିବ ଭି.କାର୍ତ୍ତିକେୟ ପାଣ୍ଡିଆନଙ୍କୁ ଅନୁମତି ମିଳିଛି । ୨୦୦୦ ମସିହା ବ୍ୟାଚ୍ ଆଇଏଏସ୍ ଅଫିସର ଭି .କେ. ପାଣ୍ଡିଆନ ସରକାରୀ ଚାକିରିରୁ ସ୍ୱେଚ୍ଛାକୃତ ଅବସର ନେବେ । ସେ ଗତ ୨୦ତାରିଖରେ ସ୍ୱେଚ୍ଛାକୃତ ଅବସର ପାଇଁ କେନ୍ଦ୍ର କାର୍ମିକ ମନ୍ତ୍ରଣାଳୟକୁ ଆବେଦନ କରିଥିଲେ । ତେବେ ତାଙ୍କର ଆବେଦନକୁ କେନ୍ଦ୍ର ସରକାର ଗ୍ରହଣ କରିଛନ୍ତି । ଶ୍ରୀ ପାଣ୍ଡିଆନଙ୍କ ସ୍ୱେଚ୍ଛାକୃତ ଅବସର ନେବା ନେଇ କେନ୍ଦ୍ର ସରକାରଙ୍କ କାର୍ମିକ ମନ୍ତ୍ରଣାଳୟ ଅନୁସଚିବ ଭୁପିନ୍ଦର ପାଲ ସିଂ ଏ ସଂକ୍ରାନ୍ତରେ ପତ୍ର ଲେଖି ରାଜ୍ୟ ସରକାରଙ୍କ ସାଧାରଣ ପ୍ରଶାସନ ବିଭାଗର ଅତିରିକ୍ତ ସଚିବଙ୍କୁ ଅବଗତ କରିଛନ୍ତି । ଗତ ୨୦ ତାରିଖ ଦିନ ଶ୍ରୀ ପାଣ୍ଡିଆନ୍ ସ୍ୱେଚ୍ଛାକୃତ ଅବସର ଲାଗି ଆବେଦନ କରିଥିଲେ ଓ ରାଜ୍ୟ ସରକାର ଏହାକୁ ଗ୍ରହଣ କରିବା ସହ କେନ୍ଦ୍ରର ଅନୁମୋଦନ ଲାଗି ପଠାଇ ଥିଲେ । ଏହାପରେ ଓଡ଼ିଶା କ୍ୟାଡରର ୨୦୦୦ ବ୍ୟାଚର ଆଇଏଏସ୍ ଅଫିସର ପାଣ୍ଡିଆନଙ୍କ ସ୍ୱେଚ୍ଛାକୃତ ଅବସର ନେଇ କେନ୍ଦ୍ର ସରକାର ସାଧାରଣ ପ୍ରଶାସନ ବିଭାଗକୁ ଜଣାଇଛନ୍ତି । ଶ୍ରୀ ପାଣ୍ଡିଆନ୍‌ଙ୍କ ପ୍ରସ୍ତାବ କ୍ଷମତାପ୍ରାପ୍ତ ଅଧିକାରୀଙ୍କ ଦ୍ୱାରା ଗୃହୀତ ହୋଇଥିବା କେନ୍ଦ୍ର କାର୍ମିକ ବିଭାଗ ଆଜି ଜଣାଇଛି । ୨୦୦୦ ବ୍ୟାଚର ଓଡ଼ିଶା କ୍ୟାଡର ଆଇଏଏସ୍ ଅଫିସର ଶ୍ରୀ ପାଣ୍ଡିଆନ୍ ୨୦୦୨ରୁ ୨୦୦୪ ପର୍ଯ୍ୟନ୍ତ ଧର୍ମଗଡ଼ ଉପଜିଲ୍ଲାପାଳ ଭାବେ ଆରମ୍ଭ କରିଥିଲେ । ଏହାପରେ ୨୦୦୫ରୁ ୨୦୦୭ ମୟୂରଭଞ୍ଜ ଜିଲ୍ଲାପାଳ ଭାବେ ନିଯୁକ୍ତ ହୋଇଥିଲେ । ୨୦୦୭ରୁ ୨୦୧୧ ଗଞ୍ଜାମ ଜିଲ୍ଲାପାଳ ଦାୟିତ୍ୱରେ ମଧ୍ୟ ରହିଥିଲେ । ତେବେ ୨୦୧୧ ପରଠାରୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭାବେ ଦାୟିତ୍ୱ ତୁଲାଉ ଥିଲେ । ତେବେ ରାଜନୀତି ସମୀକ୍ଷକଙ୍କ ମତରେ ୨୦୧୨ ମେ’ ୨୯ ପ୍ୟାରୀ ମହାପାତ୍ରଙ୍କ ମିଡନାଇଟ୍ ଅପରେସନ ପରେ ଧୀରେ ଧୀରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଘନିଷ୍ଠ ପାଲଟି ଯାଇଥିଲେ ପାଣ୍ଡିଆନ । ୨୦୧୪ ସାଧାରଣ ନିର୍ବାଚନରେ ପରଦା ପଛରେ ରହି ବିଜେଡିକୁ ଜିତାଇବା ନିମନ୍ତେ ସଫଳ ରଣନୀତି ପ୍ରସ୍ତୁତ କରିଥିଲେ । ଆଉ ସେବେ ଠାରୁ ବିଜେଡି ଓ ସରକାରରେ ନିଜର ପ୍ରଭାବ ବିସ୍ତାର କରିବାରେ ସକ୍ଷମ ହୋଇଥିଲେ । ତେବେ ତାଙ୍କର କାର୍ଯ୍ୟଦକ୍ଷତା, ରଣନୀତି ତଥା ଲୋକସେବା ଯୋଗୁଁ ସେ ମୁଖ୍ୟମନ୍ତ୍ରୀଙ୍କ ବିଶ୍ୱାସ ଓ ପ୍ରଶଂସାର ପାତ୍ର ହୋଇପାରିଥିଲେ । ତାଙ୍କର ସ୍ୱେଚ୍ଛାକୃତ ଅବସର ଜଣାପଡ଼ିବା ପରେ ଯଦିଓ ଶ୍ରୀ ପାଣ୍ଡିଆନ ଏପର୍ଯ୍ୟନ୍ତ ନିଜର ଭବିଷ୍ୟତ କାର୍ଯ୍ୟପନ୍ଥାକୁ ନେଇ ମୁହଁ ଖୋଲିନାହାନ୍ତି ତଥାପି ବିଜେଡି ରାଜନୀତିରେ ସେ ସକ୍ରିୟ ଭୂମିକା ତୁଲାଇବେ ବୋଲି ସ୍ପଷ୍ଟ ହୋଇଛି । ଅନ୍ୟପକ୍ଷରେ ଶ୍ରୀ ପାଣ୍ଡିଆନଙ୍କ ସ୍ୱେଚ୍ଛାକୃତ ଅବସରକୁ ନେଇ ଅନ୍ୟ ରାଜନୈତିକ ଦଳରେ ମଧ୍ୟ ହଠାତ୍‍ ତର୍ଜମା ଆରମ୍ଭ ହୋଇ ଯାଇଛି । ଆଗକୁ ମାସ କେଇଟା ପରେ ନିର୍ବାଚନ ହେବାକୁ ଥିବାବେଳେ ଶ୍ରୀ ପାଣ୍ଡିଆନ କାହିଁକି ସ୍ୱେଚ୍ଛାକୃତ ଅବସର ନେଇ ସେ ନେଇ ବିଭିନ୍ନ ଦିଗର ଚର୍ଚ୍ଚା ଆରମ୍ଭ ହୋଇ ଯାଇଛି । ବିରୋଧୀ ଶିବିରରେ ଏବେ ଶ୍ରୀ ପାଣ୍ଡିଆନଙ୍କ ସ୍ୱେଚ୍ଛାକୃତ ଅବସରକୁ ନେଇ ସମ୍ଭାବ୍ୟ କାରଣ ଖୋଜା ଚାଲିଛି ।
ସେହି କାରଣ ମଧ୍ୟରେ: ପ୍ରଥମତଃ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଖୋଲାଖୋଲି ବିଜେଡିର ସାଂଗଠନିକ କାର୍ଯ୍ୟ ଓ ଟିକେଟ୍ ବଣ୍ଟନଠୁ ଆରମ୍ଭ କରି ନିର୍ବାଚନୀ ପରିଚାଳନା କାର୍ଯ୍ୟ ନିଜେ ତଦାରଖ କରିପାରନ୍ତି; ଯେଉଁଥିପାଇଁ ସରକାରୀ ଚାକିରି ଛାଡ଼ିବାର ଆବଶ୍ୟକତା ଥିଲା । ବିରୋଧୀ ବି ଆଉ ସରକାରୀ କର୍ମଚାରୀ ବୋଲି କହି ଟାର୍ଗେଟ୍ କରିପାରିବେ ନାହିଁ । ଦ୍ୱିତୀୟ ତଃ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୟାସାଧିକ ଯୋଗୁ ସାଧାରଣ ନିର୍ବାଚନବେଳେ ପ୍ରଚାର କାର୍ଯ୍ୟରେ ସବୁ ନିର୍ବାଚନମଣ୍ଡଳୀ ଯାଇ ନପାରନ୍ତି । ତାଙ୍କର ପ୍ରତିନିଧି ଓ ବିଶ୍ୱସ୍ଥ ଭାବେ ପାଣ୍ଡିଆନ ସେହି ଦାୟିତ୍ୱ ନେଇ ପାରନ୍ତି । ରାଜ୍ୟରେ ବିରୋଧୀ ଦଳଗୁଡ଼ିକ କ୍ରମାଗତ ଭାବେ ନିଷ୍କ୍ରିୟ ହେବାରେ ଲାଗିଥିବାରୁ ସେ ବିଜେଡିର ଉତ୍ତରାଧିକାରୀ ହୋଇ ପାରନ୍ତି । ନବୀନ ତାଙ୍କୁ ବିଜେଡିର ଉତ୍ତରାଧିକାରୀ ଭାବେ ମନୋନୀତ କରି ଉଭୟ ଦଳ ଓ ସରକାରରେ ପ୍ରମୁଖ ଦାୟିତ୍ୱ ଦେଇପାରନ୍ତି । ତୃତୀୟତଃନବୀନ ତାଙ୍କୁ ଦଳର ମୁଖ୍ୟ ପରାମର୍ଶଦାତା, ରାଜ୍ୟସଭା କିମ୍ବା ଉପମୁଖ୍ୟମନ୍ତ୍ରୀ କରି ତାଙ୍କ ଉପରେ ଉଭୟ ଦଳ ଓ ସରକାରର ସମ୍ପୂର୍ଣ୍ଣ ଦାୟିତ୍ୱ ନ୍ୟସ୍ତ କରିପାରନ୍ତି । ଚତୁର୍ଥତଃ ଶ୍ରୀ ପାଣ୍ଡିଆନ ସରକାରୀ ଚାକିରିରୁ ଅବସର ନେଇଥିଲେ ମଧ୍ୟ ପୂର୍ବବତ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭାବେ କାର୍ଯ୍ୟ କରିପାରନ୍ତି । ବରିଷ୍ଠ ଆଇଏଏସ୍ ପିକେ ମିଶ୍ର ମଧ୍ୟ ଅବସର ପରେ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପଦରେ କାର୍ଯ୍ୟରତ ଅଛନ୍ତି । ସମାନ ଶୈଳୀରେ ପାଣ୍ଡିଆନ ମଧ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ପଦ ବଜାୟ ରଖିପାରନ୍ତି । ପଞ୍ଚମ ତଃ ଶ୍ରୀ ପାଣ୍ଡିଆନ ବିଧିବଦ୍ଧ ଭାବେ ବିଜେଡିରେ ସାମିଲ ହୋଇପାରନ୍ତି । ତାଙ୍କ ପତ୍ନୀ ସୁଜାତା କାର୍ତ୍ତିକେୟନଙ୍କୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ପଦରେ ଆସୀନ କରାଇ ମୁଖ୍ୟମନ୍ତ୍ରୀ କାର୍ଯ୍ୟାଳୟକୁ ମଧ୍ୟ ପରିଚାଳନା କରି ପାରନ୍ତି । ଏଥି ସହିତ ଆସନ୍ତା ୨୦୨୪ ସାଧାରଣ ନିର୍ବାଚନରେ ନବୀନ ୨ଟି ଆସନରେ ଛିଡ଼ା ହେବେ । ଯେଉଁ ଆସନକୁ ଖାଲି କରିବେ ସେଥିରେ ଉପନିର୍ବାଚନରେ ପାଣ୍ଡିଆନ ନିର୍ବାଚନ ଜିତିବିଧାନସଭାକୁ ଆସିବା ପରେ ଉପମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିପାରନ୍ତି । ଏଥି ସହିତ ନିର୍ବାଚନବେଳେ ଶ୍ରୀ ପାଣ୍ଡିଆନ ସକ୍ରିୟ ରାଜନୈତିକ ଭୂମିକା ତୁଲାଇବାର ଥିବାରୁ ବିରୋଧୀ ଦଳ ତାଙ୍କୁ ବାରମ୍ବାର ଟାର୍ଗେଟ୍ କରିପାରନ୍ତି । ସେହି ଦୃଷ୍ଟିରୁ ଅଯଥା ଚର୍ଚ୍ଚା ଓ ସମାଲୋଚନାକୁ ଏଡ଼ାଇବା ପାଇଁ ଚାକିରିରୁ ଅବସର ନେଇ ଥାଇପାରନ୍ତି ବୋଲି ବିରୋଧୀ ଶିବିରରେ ଆଲୋଚନା ହେଉଛି । କିନ୍ତୁ ଶ୍ରୀ ପାଣ୍ଡିଆନଙ୍କ ବିଭିନ୍ନ ଜିଲ୍ଲାଗସ୍ତକୁ ନେଇ ତୁମ୍ବି ତୋଫାନ କରୁଥିବା ବିରୋଧୀମାନେ ଏବେ ବିଭିନ୍ନ ପ୍ରଶ୍ନରେ ଘାଣ୍ଟିହେବା ସହ ଏହାର ଆଉ କ’ଣ କାରଣ ରହିଛି ତାହା ଖୋଜିବାରେ ବ୍ୟସ୍ତ ଅଛନ୍ତି ।