ଫାଇପ-ଟି ସଚିବଙ୍କ କଟକ ଗସ୍ତ: ଚୌଦ୍ୱାରରେ ଶିଳ୍ପ ପ୍ରତିଷ୍ଠା ପାଇଁ ଘୋଷଣା
କେଉଁଠି ଉଚ୍ଛତ୍ସିତ ସମ୍ବର୍ଦ୍ଧନା ତ ଆଉ କେଉଁଠି ତିରସ୍କାର
#କଟକ(ଏନ୍.ଏମ୍.): ସମ୍ପ୍ରତି ରାଜ୍ୟ ପ୍ରଶାସନ କ୍ଷେତ୍ରରେ ମଙ୍ଗ ଧରିଥିବା ବିଶିଷ୍ଟ ପ୍ରଶାସକ, ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ଫାଇପ-ଟି ସଚିବଙ୍କ କଟକଗସ୍ତ ଆରମ୍ଭ ହୋଇଛି । ରାଜ୍ୟର ବହୁ ଜିଲ୍ଲା ଗସ୍ତ କରି ବିଭିନ୍ନ ଉନ୍ନତି ମୂଳକ ପ୍ରକଳ୍ପ କାର୍ଯ୍ୟ ପାଇଁ ମୁଖ୍ୟମନ୍ତ୍ରୀଙ୍କ ପକ୍ଷରୁ ଘୋଷଣା କରିଥିଲେ ଫାଇପ-ଟି ସଚିବ । ତେଣୁ ଏବେ ରାଜ୍ୟରେ ଫାଇପ-ଟି ସଚିବଙ୍କ ପ୍ରତି ଲୋକ ସମର୍ଥନ ଯଥେଷ୍ଟ ବୃଦ୍ଧି ପାଇଥିବା ଦେଖିବାକୁ ମିଳିଛି । ରାଜ୍ୟର ପ୍ରାୟ ୨୪ଟି ଜିଲ୍ଲା ଗସ୍ତ କରି ବିଭିନ୍ନ ପ୍ରକଳ୍ପ ଅଜାଡ଼ି ଦେଇଥିବା ଶ୍ରୀ ପାଣ୍ଡିଆନ ଆଜି କଟକ ଗସ୍ତ ଆରମ୍ଭ କରିଛନ୍ତି । ଏହି ଦୁଇ ଦିନିଆଗସ୍ତରେ କଟକ ସହର ସମେତ ସମସ୍ତ ବ୍ଲକର ଜନସାଧାରଣଙ୍କ ସୁଖ ଦୁଃଖ ବୁଝିବା ସହ ବିଭିନ୍ନ ଦାବି ସମ୍ପର୍କରେ ଅଭିଯୋଗ ପତ୍ର ଗ୍ରହଣ କରିଛନ୍ତି । ଏହି ଗସ୍ତ ମଧ୍ୟରେ ବାଙ୍କୀ, ଚୌଦ୍ୱାର ଓ କଟକ ସହରରେ ଶ୍ରୀ ପାଣ୍ଡିଆନଙ୍କୁ ଉଚ୍ଛତ୍ସିତ ସମ୍ବର୍ଦ୍ଧନା ଓ ବିପୁଳ ସମର୍ଥନ ମିଳିଥିବାବେଳେ ଆଗଠଡ଼ ଅଞ୍ଚଳରେ ତାଙ୍କୁ ବିରୋଧୀ ଦଳମାନଙ୍କ ପକ୍ଷରୁ ବିରୋଧାଭାଷ ପ୍ରଦର୍ଶନ କରାଯାଇଥିଲା । ତେବେ ମୁଖ୍ୟମନ୍ତ୍ରୀ ତଥା ଲୋକ ପ୍ରତିନିଧିଙ୍କ ଶାସନ କାର୍ଯ୍ୟକୁ ସଂକୁଚିତ କରି ସଚିବ ଗଣତନ୍ତ୍ରର କଣ୍ଠରୋଧ କରୁଥିବା ଭଳି ସଂଗୀନ ଅଭିଯୋଗ ଉଠାଇଥିଲେ ବିରୋଧୀ କଂଗ୍ରେସ ଓ ବିଜେପିର ନେତାମାନେ । ତେବେ ଫାଇପ-ଟି ସଚିବଙ୍କୁ ବିରୋଧ ପ୍ରଦର୍ଶନ କରାଯିବା ପାଇଁ ଆଠଗଡ଼ କଂଗ୍ରେସ ପକ୍ଷରୁ ସଜବାଜ ହେଉଥିବାବେଳେ ସ୍ପେଶାଲ ବ୍ରାଞ୍ଚ ସୂଚନା ଆଧାରରେ କଂଗ୍ରେସ କାଉନସିଲର ମନୋରଞ୍ଜନ ପଟ୍ଟନାୟକଙ୍କୁ ପୁଲିସ ଉଠାଇ ନେଇଥିଲା । ଅନ୍ୟ ପଟେ ବିଜେପି ନେତା ଓ କର୍ମୀ ଫାଇପ-ଟି ସଚିବଙ୍କ ଗସ୍ତକୁ ବିରୋଧ କରି କଳା ପତାକା ସହିତ କଳା ବେଲୁନ ମଧ୍ୟ ପ୍ରଦର୍ଶନ କରିଥିଲେ ।
ମାତ୍ର ପାଣ୍ଡିଆନଙ୍କ ଏହି ଗସ୍ତକୁ ନେଇ ସଭାସ୍ଥଳରେ ହଜାର ହଜାର ଜନସାଧାରଣ ଯୋଗ ଦେଇଥିଲେ । ସେହିଭଳି ଚୌଦ୍ୱାର ଗୋପବନ୍ଧୁ ନୋଡାଲ ସ୍କୁଲ ପ୍ରାଙ୍ଗଣରେ ଆୟୋଜିତ ଏକ ବିରାଟ ସମାବେଶରେ ଫାଇପ-ଟି ସଚିବ ଶ୍ରୀ ପାଣ୍ଡିଆନ ଜନସାଧାରଣଙ୍କୁ ଉଦ୍ବୋଧନ ଦେଇ ଚୌଦ୍ୱାର ଅଞ୍ଚଳର ହୃତ ଗୌରବ ଫେରାଇ ଆଣିବା ସହ ଏଠାରେ ପୁଣି ଶିଳ୍ପ ପ୍ରତିଷ୍ଠା ହେବ ବୋଲି ପ୍ରତିଶ୍ରୁତି ଦେଇଛନ୍ତି । ଓଟିଏମ, ବଲାରପୁର ଭଳି ଶିଳ୍ପ ଏଠାରେ କାର୍ଯ୍ୟକ୍ଷମ ହେବା ସହ ଅବଶିଷ୍ଟ ୫୦ଏକର ଜମିରେ ଟେକ୍ସଟାଇଲ ପାର୍କ ପ୍ରତିଷ୍ଠା ହେବ ବୋଲି ଘୋଷଣା କରିଥିଲେ । ଏଥି ପାଇଁ ଜନସଧାରଣଙ୍କ ସହଯୋଗ କାମନା କରିଥିଲେ । ଉକ୍ତ ସଭାରେ ଥିବା ପ୍ରାୟ ୩୫ହଜାର ଲୋକଙ୍କ ସହ ପ୍ରତ୍ୟେକ୍ଷ ଭାବେ ମିଶିଥିଲେ । ଏହାପରେ ଚୌଦ୍ୱାର-କଟକ ନିର୍ବାଚନ ମଣ୍ଡଳୀରେ ଶ୍ରୀ ପାଣ୍ଡିଆନଙ୍କୁ ଅକୁଣ୍ଠ ସମର୍ଥନ ମିଳିଥିବା ପରିଲକ୍ଷିତ ହୋଇଥିଲା ।