ଫାଇପ-ଟି ଅଧ୍ୟକ୍ଷଙ୍କ ଉପରକୁ ବିଲାତି ଫିଙ୍ଗି ଯୁବକ ଅଟକ
‘ଔଷଧ ବିକଳରେ ତାଟିଆ କାମୁଡ଼ୁଛନ୍ତି ବିରୋଧୀ’

#ବ୍ରହ୍ମପୁର(ଏନ୍‌.ଏମ୍‌.): ଫାଇପ-ଟି ଏବଂ ଆମ ଓଡ଼ିଶା ନବୀନ ଓଡ଼ିଶା ଅଧ୍ୟକ୍ଷ ଭି.କେ. ପାଣ୍ଡିଆନ ଗଞ୍ଜାମ ବେଲଗୁଣ୍ଠା ଗ୍ରସ୍ତରେ ଯାଇଥିବାବେଳେ ଏକ ଅଭାବନୀୟ ଘଟଣା ଘଟିଥିବା ଦେଖିବାକୁ ମିଳିଛି । ୫-ଟି ଅଧ୍ୟକ୍ଷ ଭି.କେ. ପାଣ୍ଡିଆନଙ୍କ ଉପରକୁ ଜଣେ ବ୍ୟକ୍ତି ବିଲାତି ଫିଙ୍ଗି ପ୍ରତିବାଦ କରିଛନ୍ତି । ତେବେ ବିଲାତି ମାଡ ପରେ ମଧ୍ୟ ଶ୍ରୀ ପାଣ୍ଡିଆନ ଅଟକି ନଯାଇ, ବେଲଗୁଣ୍ଠାରେ ଆୟୋଜିତ ଆମ ଓଡିଶା ନବୀନ ଓଡିଶା କାର୍ଯ୍ୟକ୍ରମରେ ଜନସଭାକୁ ଉଦବୋଧନ ଦେଇଛନ୍ତି । ସେ କହିଛନ୍ତି, ତାଙ୍କ ଉପରକୁ ଟମାଟୋ, ଅଣ୍ଡା, ଚପଲ, କାଳିମାଡ ଏପରିକି ଗୁଳିମାଡ କରନ୍ତୁ; ସେଥିରେ ପରବାୟ ନାହିଁ । ଲୋକଙ୍କ ପାଖକୁ ଆସିବେ, ଲୋକଙ୍କ ସେବା କରି ଚାଲିବେ । କେବଳ ଏତିକି ନୁହେଁ ବିରୋଧୀଙ୍କୁ ଟାର୍ଗେଟ କରି କହିଛନ୍ତି, ଅନେକ ଲୋକ ଆସିବେ, ମଞ୍ଚ ଉପରେ ଭାଷଣ ଦେଇ ଚାଲିଯିବେ । ତେବେ ବିରୋଧୀ ମାନେ ବର୍ଷ ବର୍ଷ ଧରି ଶାସନ ଗାଦିରେ ରହି ଓଡ଼ିଶାର କୌଣସି ବିକାଶ କରିନଥିଲେ । ନବୀନ ସରକାର ଆସିବା ପରେ ଓଡ଼ିଶାର ପ୍ରଗତି ଏବେ ଶିଖର ଛୁଇଁବାକୁ ଯାଉଛି । ଏହାକୁ ବିରୋଧୀମାନେ ସହ୍ୟ କରି ପାରୁନାହାନ୍ତି । ନିଜେତ କୌଣସି ବିକାଶ କରି ପାରିଲେ ନାହିଁ ତେଣୁ ଏବେ ଚାଲିଥିବା ବିକାଶରେ ବିଭ୍ରାଟ କରିବାକୁ ଅଣ୍ଟାଭିଡିଛନ୍ତି ବିରୋଧୀ । ତଥାପି ରାଜ୍ୟର ଉନ୍ନତିକୁ କେହି ଅଟକାଇ ପାରିବେ ନାହିଁ ବୋଲି ଶ୍ରୀ ପାଣ୍ଡିଆନ ଦୃଢ଼ୋକ୍ତି ପ୍ରକାଶ କରିଛନ୍ତି । ଅନ୍ୟପକ୍ଷରେ ବିଲାତି ମାରିଥିବା ବ୍ୟକ୍ତି ଜଣଙ୍କ କଂଗ୍ରେସର କର୍ମୀ ବୋଲି କୁହାଯାଉଛି । ତାଙ୍କ ଘର ବେଲଗୁଣ୍ଠା ବ୍ଲକରେ ବୋଲି ଜଣାପଡ଼ିଛି । ତେବେ କଂଗ୍ରେସ ପକ୍ଷରୁ ଏନେଇ କିଛି ସ୍ପଷ୍ଟ କରାଯାଇନାହିଁ । ବିଲାତି ମାରିଥିବା ବ୍ୟକ୍ତିଙ୍କୁ ବିଜେଡି କର୍ମୀମାନେ ମାଡ଼ିବସିଥିଲେ । ଏପରିକି ଉତ୍ତମ ମଧ୍ୟମ ଦେଇଥିବାବେଳେ ସମ୍ପୃକ୍ତ ବ୍ୟକ୍ତିଙ୍କୁ ପୁଲିସ କାବୁ କରି ନେବା ସହ ପଚରାଉଚୁରା କରୁଥିବା ଜଣାପଡିଛି । ସୂଚନା ଯୋଗ୍ୟ ଯେ, ଆଜି ଗୁରୁବାର ଗଞ୍ଜାମ ଜିଲ୍ଲା ବେଲଗୁଣ୍ଠା ଠାରେ ଆୟୋଜିତ ‘ଆମ ଓଡ଼ିଶା ନବୀନ ଓଡିଶା’ କାର୍ଯ୍ୟକ୍ରମରେ ଯୋଗ ଦେବା ପାଇଁ ଫାଇପ- ଟି ଅଧ୍ୟକ୍ଷ ଭି .କେ ପାଣ୍ଡିଆନଙ୍କ ଗସ୍ତ ନିର୍ଦ୍ଧାରଣ ହୋଇଥିଲା । ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁଯାୟୀ ଅପରାହ୍ଣ ୧୨ଟା ସମୟରେ ଶ୍ରୀ ପାଣ୍ଡିଆନ ସ୍ୱତନ୍ତ୍ର ହେଲିକପ୍ଟରରେ ଯାଇ ବେଲଗୁଣ୍ଠାରେ ଓହ୍ଲାଇଥିଲେ । ସେଠାରୁ କାର୍ଯ୍ୟକ୍ରମ ସ୍ଥଳକୁ ଯିବା ବେଳେ ହଠାତ୍ ଜଣେ ଯୁବକ ପଶି ଆସି ତାଙ୍କୁ ବିଲାତି ଫିଙ୍ଗିଥିଲେ । ତେବେ ଶ୍ରୀ ପାଣ୍ଡିଆନଙ୍କ ଉପରକୁ ବିଲାତି ଫିଙ୍ଗିବା ଘଟଣାକୁ ନେଇ ବିଭିନ୍ନ ମହଲରେ ନିନ୍ଦା କରାଯାଇଛି ।