ପ୍ରେମକୁ ସ୍ୱୀକାର କଲେନି ପରିବାର: ଗୋଟିଏ ପଟେ ପଡୁଥିଲା ଝିଅର ହାତଗଣ୍ଠି; ଆରପଟେ ଶୁଦ୍ଧି ହେଉଥିଲେ ବାପା ମା’
#କେନ୍ଦ୍ରାପଡ଼ା(ଏନ୍.ଏମ୍.): ପ୍ରେମକୁ ମିଳିଲାନି ସ୍ୱୀକୃତି । ବଢ଼ିଲା ଝିଅଟି ପ୍ରେମିକ ସହ ଚାଲିଯିବା ପରେ ଝିଅର ବାପଘର ଲୋକେ ଏହାକୁ ସହି ପାରିଲେନି । ଝିଅ କିମ୍ବା ତାର ପ୍ରେମିକର କୌଣସି କ୍ଷତି ନକରି ନିଜ ଭିତରେ ଝିଅକୁ ଶୁଦ୍ଧି ହୋଇ ପଡ଼ିଛନ୍ତି । ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ଆଳିସ୍ଥିତ ନୂଆବଜାର ଅଞ୍ଚଳରେ । ଗୋଟିଏ ପଟେ ଝିଅର ପଡ଼ୁଛି ହାତ ଗଣ୍ଠି । ସାତ ସିଙ୍ଗାର ହୋଇ ନବବଧୂ ସାଜି ଝିଅ ନିଜ ଶ୍ୱଶୁର ଘରେ ସୁନାର ସଂସାର ଗଢ଼ିବା ପାଇଁ ସ୍ୱପ୍ନ ଦେଖୁ ଥିବାବେଳେ ସେପଟେ ବ୍ରାହ୍ମଣ ଡାକି ଫଟୋରେ ଫୁଲ ମାଳ ଚଢ଼ାଇ ଶ୍ରଦ୍ଧାଞ୍ଜଳି ଦେଇଛନ୍ତି ଝିଅର ପରିବାର ଲୋକେ । ଏହାସହ ବ୍ରାହ୍ମଣ ଡାକି ଶୁଦ୍ଧିକ୍ରିୟା କରିବା ସହ ଭୋଜିଭାତ କରି ଖାଇବାକୁ ଦେଉଛନ୍ତି । ଝିଅ ନିଜ ପ୍ରେମିକ ସହ ପଳାଇ ଯିବାରୁ ପରିବାର ଲୋକେ ପ୍ରତିଶୋଧ ପରାୟଣ ହୋଇ ଜୀବିତ ଝିଅକୁ ମାରି ଦେବା କେତେ ଠିକ୍ ତାହା ସାଧାରଣରେ ଚର୍ଚ୍ଚା ଜୋର ଧରିଛି ।
ମିଳିଥିବା ସୂଚନା ଅନୁଯାୟୀ, ଆଳି ନୂଆବଜ଼ାର ଅଞ୍ଚଳର ଶ୍ରୀବାସ୍ତବ ମଳିକଙ୍କ ସହ ସ୍ଥାନୀୟ ଅଞ୍ଚଳର ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା । ହେଲେ ଯୁବତୀଙ୍କ ପରିବାର ଲୋକେ ଏହି ପ୍ରେମ ସମ୍ପର୍କକୁ ବିରୋଧ କରି ଆସୁଥିଲେ । ହେଲେ ଶ୍ରୀବାସ୍ତବ ଓ ସମ୍ପୃକ୍ତ ଯୁବତୀ ପରିବାରର ବାଧା ସତ୍ତ୍ୱେ ସେମାନଙ୍କ ପ୍ରେମ ସମ୍ପର୍କକୁ ଭୁଲିପାରୁ ପାରୁନଥିଲେ । ଦୁହେଁ ସ୍ୱପ୍ନର ଘର ତୋଳି ସେଠି ରହିବେ ବୋଲି ମନେ ମନେ ସ୍ୱପ୍ନ ଦେଖୁଥିଲେ । ଏହାରି ଭିତରେ କିଛିଦିନ ତଳେ ଯୁବତୀ ଜଣକ ନିଜ ଘର ଛାଡ଼ି ଶ୍ରୀବାସ୍ତବଙ୍କ ଘରକୁ ପଳାଇ ଆସିଥିଲେ । ଶ୍ରୀବାସ୍ତବଙ୍କ ପରିବାର ଲୋକେ ଏନେଇ ଥାନାରେ ଜଣାଇଥିଲେ । ପୁଲିସ ଝିଅ ଓ ପୁଅ ଘରର ଲୋକଙ୍କୁ ଡାକି ପଚରାଉଚରା କରିଥିଲା । ଯୁବତୀ ଜଣକ ଶ୍ରୀବାସ୍ତବଙ୍କୁ ବିବାହ କରିବେ ବୋଲି ସର୍ବସମ୍ମୁଖରେ କହିଥିଲେ । ସୋମବାର ଦିନ ଆଳିର ଲକ୍ଷ୍ମୀବରାହ ମନ୍ଦିରରେ ଶ୍ରୀବାସ୍ତବ ଓ ଉକ୍ତ ଯୁବତୀଙ୍କ ବିବାହ ହୋଇଥିଲା । ହେଲେ ଯୁବତୀଙ୍କ ପରିବାର ଲୋକେ କେହି ଉପସ୍ଥିତ ନଥିଲେ । ଅନ୍ୟ ପକ୍ଷରେ ଯୁବତୀଙ୍କ ପରିବାର ଲୋକ ବ୍ରାହ୍ମଣ ଡାକି ଝିଅର ଶୁଦ୍ଧିକ୍ରିୟା କରିଥିଲେ । ଭୋଜିଭାତ କରି ଲୋକଙ୍କୁ ଖାଇବାକୁ ଦେଇଥିଲେ । ଏପରିକି ନିଜ ଘର ସାମ୍ନା ଝିଅର ଫଟୋରେ ଫୁଲମାଳ ପକାଇ ଶ୍ରଦ୍ଧାଞ୍ଜଳି ଜଣାଇଥିଲେ । ଏହି ଘଟଣା ଏବେ କେନ୍ଦ୍ରାପଡା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।