ପ୍ରବଳ ବର୍ଷା ଯୋଗୁଁ ସମ୍ଭାବ୍ୟ ବିପଦ ଏଡାଇବାକୁ ଜିଲ୍ଲାପାଳଙ୍କ ଜରୁରୀ ବୈଠକ
#କଟକ(ଏନ୍.ଏମ୍.): ଜିଲ୍ଲାର ବିଭିନ୍ନ ସ୍ଥାନରେ ତଥା ସହରାଞ୍ଚଳରେ ପ୍ରବଳ ବର୍ଷା ଯୋଗୁଁ ସମ୍ଭାବ୍ୟ ବିପଦ ଏଡାଇବାକୁ କଟକ ଜିଲ୍ଲାପାଳ ଦତ୍ତାତ୍ରୟ ଭାଉସାହେବ ଶିନ୍ଦେ ପଦକ୍ଷେପ ନେଇଛନ୍ତି। ସେ ଆଭାସି ମାଧ୍ୟମରେ ସମ୍ପୃକ୍ତ ସମସ୍ତ ଲାଇନ ବିଭାଗ ଅଧିକାରୀଙ୍କର ଏକ ଜରୁରୀ ବୈଠକ ଡକାଇ ସମସ୍ତ ପ୍ରକାରର ସହାୟତା ବ୍ୟବସ୍ଥା ସହ ପ୍ରସ୍ତୁତ ରହିବା ତଥା ଅଧିକ ସମ୍ବେଦନଶୀଳ ସ୍ଥାନମାନଙ୍କ ପାଇଁ ସଜାଗ ରହିବାକୁ ନିର୍ଦ୍ଦେଶ ଦେଇଛନ୍ତି। ସମସ୍ତ ତହସିଲଦାର ଏବଂ ବିଡିଓ, ବିଶେଷ କରି ବଡମ୍ବା, ନରସିଂହପୁର, ଆଠଗଡ଼, ତିଗିରିଆ, ନିଆଳି ଆଦି ବ୍ଲକମାନଙ୍କରେ ପାହାଡିଆ ଅପହଞ୍ଚ ଅଞ୍ଚଳ ଏବଂ ତଳିଆ ଅଞ୍ଚଳରେ ତଥା ବର୍ଷା ପାଣି ଘେରରେ ପଡ଼ିଯାଇଥିବା ଲୋକଙ୍କୁ ଠାବ କରିବା ନିମନ୍ତେ ତୁରନ୍ତ ଅଞ୍ଚଳ ଏବଂ ସଂଯୋଗୀ ରାସ୍ତା ଗୁଡ଼ିକୁ ପରିଦର୍ଶନ କରିବା ପାଇଁ ନିର୍ଦ୍ଦେଶ ଦେଇଛନ୍ତି। କଟକ ପୌରାଞ୍ଚଳରେ ତଳିଆ ଅଞ୍ଚଳରେ ପମ୍ପ ଏବଂ କର୍ମଚାରୀ ତୁରନ୍ତ ନିୟୋଜିତ କରିବାକୁ ଆଦେଶ ସହ ପୌର ଅଧିକାରୀ ପରିଦର୍ଶନ କରି ପରିସ୍ଥିତି ଉପରେ ନଜର ରଖି ଆବଶ୍ୟକ ପଦକ୍ଷେପ ନେବାକୁ କହିଛନ୍ତି। ଓଡ୍ରାଫ ଏବଂ ଏନଡିଆରଏଫ ଟିମ୍ ଜିଲ୍ଲା ଜରୁରୀ କାଳୀନ ଅଧିକାରୀଙ୍କ ଯୋଗାଯୋଗରେ ପ୍ରସ୍ତୁତ ରହିବାକୁ ସେ ନିର୍ଦ୍ଦେଶ ଦେଇଛନ୍ତି। ବଡ ପ୍ରକଳ୍ପ କାର୍ଯ୍ୟ ଚାଲୁଥିବା ସାଇଟ୍ରେ ଆସନ୍ତା ୨୪ଘଣ୍ଟା ପର୍ଯ୍ୟନ୍ତ କାର୍ଯ୍ୟ ବନ୍ଦ ରଖି ସେଠାରେ ରହୁଥିବା ଶ୍ରମିକମାନଙ୍କ ସୁରକ୍ଷା ନିଶ୍ଚିତ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ଜିଲ୍ଲାର ସମସ୍ତ ଉଚ୍ଚ ଅଧିକାରୀ ଅତିରିକ୍ତ ଜିଲ୍ଲାପାଳମାନେ, ମୁଖ୍ୟ ଉନ୍ନୟନ ଅଧିକାରୀ, ଜିଲ୍ଲା ଅଗ୍ନିଶମ ସେବା ଅଧିକାରୀ ଆଞ୍ଚଳିକ ଅଧିକାରୀମାନଙ୍କ ସହ ଯୋଗାଯୋଗ ରକ୍ଷା କରି ପରିସ୍ଥିତି ଉପରେ ନଜର ରଖିବା ସହ ଆବଶ୍ୟକ ସହାୟତା ବ୍ୟବସ୍ଥା କରିବା ପାଇଁ ନିର୍ଦ୍ଦେଶ ଦିଆଯାଇଛି। ଏଥିସହ ଜିଲ୍ଲାର ଜନସାଧାରଣଙ୍କୁ ଆଗାମୀ ୨୪ଘଣ୍ଟା ପାଇଁ ନିହାତି ଆବଶ୍ୟକ ନଥିଲେ ଯାତ୍ରା ନକରିବାକୁ ଜିଲ୍ଲାପାଳ ଅନୁରୋଧ କରିଛନ୍ତି। ପ୍ରବଳ ବର୍ଷା ଯୋଗୁଁ ଯେପରି କୌଣସି ଜନ ଜୀବନର ହାନି ନହୁଏ ସେଥିପାଇଁ ସଜାଗ ରହିବା ସହ ସମସ୍ତ ପ୍ରକାରର ପ୍ରାକ୍ ପ୍ରସ୍ତୁତି ନିମନ୍ତେ ଜିଲ୍ଲାପାଳ ଶ୍ରୀ ଶିନ୍ଦେ ସମ୍ପୃକ୍ତ ସମସ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।