ପୁଲିସକୁ ଅଭିଯୁକ୍ତଙ୍କ ସଂଘବଦ୍ଧ ଆକ୍ରମଣ: ମହିଳା ଏସଆଇ ଗୁରୁତର, ଏସସିବିରେ ଭର୍ତ୍ତି

#ଜଗତସିଂହପୁର (ଏନ୍.ଏମ୍.): ଦିନକୁ ଦିନ ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ବିପର୍ଯ୍ୟୟ ହେବାରେ ଲାଗିଛି । କେଉଁଠି ସାମ୍ପ୍ରଦାୟିକ ଦଙ୍ଗା ଠାରୁ ଆରମ୍ଭ କରି ଚୋରି ରହାଜାନୀ, ଛିନତାଇ, ଦାଦାବଟି ଆଦାୟ ଭଳି ଅନେକ ଅପରାଧ ମୂଳକ କାର୍ଯ୍ୟ ବୃଦ୍ଧି ପାଇଛି । ସମ୍ପ୍ରତି ଅପରାଧିକ କାର୍ଯ୍ୟ ଏତେମାତ୍ରାରେ ବୃଦ୍ଧି ପାଇଛି ଯେ ସାଧାରଣ ଜନତା ଘରେ ମଧ୍ୟ ସୁରକ୍ଷିତ ନଥିବା ଅଭିଯୋଗ ଆଣିଛନ୍ତି । ଏପରିକି ପୁଲିସ କର୍ମଚାରୀଙ୍କୁ କିଛି ଲୋକ ଆକ୍ରମଣ କରିବା ଭଳି ଘଟଣା ଦେଖିବାକୁ ମିଳିଛି । ଏଭଳି ଅଭାବନୀୟ ଘଟଣା ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା ଅନ୍ତର୍ଗତ ଶିରୋଳ ଗ୍ରାମରେ ଦେଖିବାକୁ ମିଳିଛି । ଏକ ମାମଲାର ଅଭିଯୁକ୍ତମାନଙ୍କୁ ଗିରଫ କରିବାକୁ ଯାଇଥିବା ପୁଲିସ ଟିମ ଉପରେ ମରଣାନ୍ତକ ଆକ୍ରମଣ ହୋଇଛି । ଏହି ଆକ୍ରମଣ ଏତେ ତିବ୍ରତର ଥିଲା ଯେ, ଜଣେ ମହିଳା ପୁଲିସ ଅଧିକାରୀ ଗୁରୁତର ହେବା ସହ ଅନ୍ୟ ପୁଲିସମାନେ ଆହତ ହୋଇଥିଲେ । ସେମାନଙ୍କ ଆକ୍ରମଣରେ ତିର୍ତ୍ତୋଲ ଥାନାର ଏସଆଇ ସୁଷମା ମୁଦୁଲି ଗୁରୁତର ଆହତ ହୋଇଛନ୍ତି । ତାଙ୍କ ମୁଣ୍ଡ ପଛ ପାଖରେ ଗଭୀର କ୍ଷତ ହୋଇଛି । ସେହିପରି ଆକ୍ରମଣରେ ଏସ୍ଆଇ ନିଲମ ସୋରେଙ୍ଗ ମଧ୍ୟ ଆହତ ହୋଇଛନ୍ତି । ଏନେଇ ତିର୍ତ୍ତୋଲ ଏସଡିପିଓ ପ୍ରଶାନ୍ତ କୁମାର ମାଝି ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଗତମାସ ୭ ତାରିଖରେ ଶିରୋଳ ଗ୍ରାମର ପ୍ରସନ୍ନ ଲେଙ୍କାଙ୍କ ପରିବାର ଉପରେ କିଛି ଲୋକ ସଂଘବଦ୍ଧ ଆକ୍ରମଣ କରିଥିଲେ । ତାଙ୍କ ଘରେ ଭଙ୍ଗାରୁଜା କରିବା ସହ ଜିନିଷ ପତ୍ର ପୋଡାଜଳା କରିଥିଲେ । ଅଭିଯୋଗ ଆଧାରରେ ପୁଲିସ ମାମଲା ରୁଜୁ କରି ଜଣେ ଅଭିଯୁକ୍ତକୁ ଗିରଫ କରିଥିବାବେଳେ ଅନ୍ୟମାନେ ଫେରାର ଥିଲେ । ପୁଲିସ ସେମାନଙ୍କୁ ଖୋଜୁଥିବାବେଳେ ଅଭିଯୁକ୍ତମାନେ ଫେରାର ହୋଇଯାଇଥିବାରୁ ସେମାନଙ୍କୁ ଧରିପାରିନଥିଲା । ତେବେଏହି ଅଭିଯୁକ୍ତମାନେ ଗାଁରେ ପହଞ୍ଚିଥିବା ଖବର ପାଇ ପୁଲିସ ଗତରାତିରେ ଚଢ଼ାଉ କରିଥିଲା । ଅଭିଯୁକ୍ତମାନଙ୍କୁ ଗିରଫ କରିବା ବେଳେ ଅଭିଯୁକ୍ତଙ୍କ ସହିତ ଆଉକିଛି ଗ୍ରାମବାସୀ ମିଶି ପୁଲିସ ଉପରେ ପାଲଟା ଆକ୍ରମଣ କରିଥିଲେ । ଆକ୍ରମଣରେ ଜଣେ ମହିଳା ଏଏସ୍ଆଇ ଗୁରୁତର ହୋଇ ପ୍ରଥମେ ସ୍ଥାନୀୟ ମେଡିକାଲ ଓ ପରେ କଟକ ଏସ୍ସିବିକୁ ସ୍ଥାନାନ୍ତର ହୋଇଛନ୍ତି । ସେହିପରି ଅନ୍ୟଜଣେ ପୁଲିସ ଅଧିକାରୀ ମଧ୍ୟ ସାମାନ୍ୟ ଆହତ ହୋଇଛନ୍ତି । ଏହି ଆକ୍ରମଣ ଘଟଣାରେ ପୁଲିସ ୫ ଜଣଙ୍କୁ ଗିରଫ କରିଛି । ସେପଟେ ଏହି ଘଟଣାକୁ ନେଇ ଶିରୋଳ ଗ୍ରାମରେ ଚାପା ଉତ୍ତେଜନା ଲାଗି ରହିଛି ।