ପୁରୀରୁ ବେଆଇନ ମୋବାଇଲ ସିମ ଜବତ: ୮ ଅଭିଯୁକ୍ତଙ୍କୁ ଗିରଫ କଲା ସାଇବର ଥାନା
#କଟକ(ଏନ୍.ଏମ୍.): ସମ୍ପ୍ରତି ସମାଜରେ ସାଇବର କ୍ରାଇମ ବଢ଼ିବଢ଼ି ଚାଲିଥିବାବେଳେ ଏହାର ମୁଖ୍ୟ ଅଂଶ ହେଉଛି ବେଆଇନ ଆକ୍ଟିଭେଟ ସିମ । ଏହାକୁ ବ୍ୟବହାର କରି ଅପରାଧୀମାନେ ଆଖିପିଛୁଳାକେ ଲକ୍ଷାଧିକ ଟଙ୍କା ହଡ଼ପ କରିବାରେ ସକ୍ଷମ ହେଉଛନ୍ତି । ଏହି ସିମଗୁଡ଼ିକ ବିଶେଷକରି ପୁରୀରୁ ଦେଶର ବିଭିନ୍ନ ସ୍ଥାନକୁ ପଠାଯାଉଥିବାବେଳେ ଏମାନଙ୍କ ଧରିବା କ୍ଷେତ୍ରରେ କଟକ ସାଇବର ଥାନା ପୁଲିସକୁ ବଡ ସଫଳତା ମିଳିଛି । ପୁଲିସ ହାତରେ ଧରାପଡ଼ିଛନ୍ତି ସିମ ଚାଲାଣକାରି ଗ୍ୟାଙ୍ଗ୍ର ୮ ଜଣ ସଦସ୍ୟ । ଏହି ଗ୍ୟାଙ୍ଗର ସଦସ୍ୟମାନେ ପୁରୀରୁ ଦେଶର ବିଭିନ୍ନ ରାଜ୍ୟକୁ ମୋବାଇଲ ସିମ ଯୋଗାଉଥିଲେ । ସେମାନେ ଯୋଗାଉଥିବା ସିମ୍ଗୁଡ଼ିକ ମଧ୍ୟରୁ କିଛି ଆକ୍ଟିଭ ରହୁଥିଲା । ତେବେ ଏ ନେଇ ପୁଲିସ ସୁରାଗ ପାଇବା ପରେ ପୁରୀରୁ ସେମାନଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ପୁରୀ ଜିଲ୍ଲାର ବାବୁନା ଦାସ, ରାକେଶ କୁମାର ନାୟକ, ବିଶ୍ୱଜିତ ଷଡ଼ଙ୍ଗୀ, ବିଶ୍ୱଜିତ ପ୍ରଧାନ, ମହାବୀର ଦାସ, ଜ୍ୟୋତିରଞ୍ଜନ ସାହୁ, ଜ୍ଞାନରଞ୍ଜନ ପାତ୍ର ଓ ସୌମ୍ୟରଞ୍ଜନ ଖଣ୍ଡାୟତ ବୋଲି ଜଣାପଡ଼ିଛି । ଏମାନେ ଟେଲିକମ କମ୍ପାନିର କର୍ମଚାରୀ ଭାବରେ କାମ କରୁଥିଲେ । କମ୍ପାନିର ସିମ ବିକ୍ରିର ଚାପ ସାଙ୍ଗକୁ ଅଳ୍ପ ସମୟରେ ଅଧିକ ଟଙ୍କା ରୋଜଗାର କରିବାର ନିଶାରେ ଏମାନେ ଏହି କାରବାର କରୁଥିଲେ । ତେବେ ଏ ନେଇ କଟକ ଡିସିପି ପିନାକ ମିଶ୍ର ସୂଚନା ଦେଇ କହିଛନ୍ତି ଯେ, ଗତ ୫ମାସ ଧରି ଏମାନେ ଦିଲ୍ଲୀ, ଆସାମ, ପଶ୍ଚିମ ୟୁପି ଆଦି ରାଜ୍ୟକୁ ସିମ ଯୋଗାଉ ଥିଲେ । ପାଖାପାଖି ୫ହଜାର ସିମ ଏମାନେ ଆକ୍ଟିଭ କରି ଏଜେଣ୍ଟମାନଙ୍କୁ ବିକ୍ରି କରିଛନ୍ତି । ଏଥିପାଇଁ ଜଣେ ଜଣେ ୩ଲକ୍ଷରୁ ଊର୍ଦ୍ଧ୍ୱ ଟଙ୍କା ରୋଜଗାର କରିଛନ୍ତି । ସାଇବର କ୍ରାଇମରେ ବ୍ୟବହାର ହୋଇଥିବା ୨ଟି ସିମ ଓଡ଼ିଶାରୁ ଆକ୍ଟିଭ ହୋଇଥିବା ଜଣାପଡିବା ପରେ ପୁଲିସ ଖୋଳତାଡ଼ ଆରମ୍ଭ କରିଥିଲା । ଆଜି ଏମାନଙ୍କୁ ଗିରଫ କରାଯିବା ସହିତ ତାଙ୍କ ଠାରୁ ୮୦୦ ସିମ ୧୬ ମୋବାଇଲ ଫୋନ ଜବତ ହୋଇଛି । ପୁଲିସ ଏହି ଘଟଣାରେ ଅଧିକ ତଦନ୍ତ ପାଇଁ ଜ୍ୟୋତିରଞ୍ଜନ ଓ ବିଶ୍ୱଜିତ ପ୍ରଧାନକୁ ରିମାଣ୍ଡରେ ଆଣିବ ବୋଲି ଜଣାପଡିଛି । ଜ୍ୟୋତି ଆସାମରୁ ଏହି କାରବାରର ଟ୍ରେନିଂ ନେଇ ଆସିବା ପରେ ଗାଁ ବିଲ ମଝିରେ ଏକ ତମ୍ବୁ ପକାଇ ଏହି ସିମ ଆକ୍ଟିଭ କାମ କରୁଥିଲା । ସେ ଏଗୁଡିକୁ ଆସାମର ଏଜେଣ୍ଟକୁ ଦେଇ ମୋଟା ଅଙ୍କର ଟଙ୍କା ରୋଜଗାର କରୁଥିଲା । ସେହିପରି ବିଶ୍ୱଜିତ ଅନ୍ୟ ସଦସ୍ୟଙ୍କ ଠାରୁ ଆକ୍ଟିଭ ସିମ ସଂଗ୍ରହ କରି ଦିଲ୍ଲୀର ଏଜେଣ୍ଟକୁ ବିକ୍ରି କରୁଥିବା ଜଣାପଡିଛି । ସାଧାରଣ ଲୋକଙ୍କୁ ପ୍ରଲୋଭିତ କରି ତାଙ୍କ ସରଳତାର ସୁଯୋଗ ନେଇ ତାଙ୍କ ଅଜଣାତରେ ତାଙ୍କ ନାମରେ ସିମ ଠୁଳ କରୁଥିଲେ ଏମାନେ । ଖୁବଶୀଘ୍ର ଏହି ଘଟଣାରେ ସମ୍ପୃକ୍ତ ଅନ୍ୟମାନେ ମଧ୍ୟ ଗିରଫ ହେବେ ବୋଲି ଡିସିପି ପିନାକ ମିଶ୍ର ସୂଚନା ଦେଇଛନ୍ତି ।