ପୁଅ ସୁଝିଦେଲା ପିତୃଋଣ ! ପଠାଇଲା ଜମପୁର
ନିଶା ପାଇଁ ବୁଢ଼ା ବାପକୁ ଲୁହା ରଡରେ ପିଟି ମାରି ଦେଲା
#ଆଠଗଡ଼(ଏନ୍.ଏମ୍.): ପୁଅଟିଏ ହେବ, ପାଠ ପଢ଼ିବ ଭଲ ମଣିଷ ହେବ । ଆଉ ବୁଢ଼ାକାଳେ ଆଶା ବାଡ଼ି ଭଳି ସାହାରା ହେବ । ମଲାବେଳେ କାନ୍ଧରେ ନେବ ଆଉ ପିଣ୍ଡପାଣି ଦେବ । ଏହି ଆଶା ନେଇ ବାପମା’ କେତେ ଦିଅଁ ଦେବତା ପୂଜା କରନ୍ତି । ଆଉ ପୁଅଟିଏ ଜନ୍ମ ହେବା ପରେ କେତେ ଖୁସି ହୋଇ ଯାଆନ୍ତି ଯେ ତାହାର କଳନା ନାହିଁ । ପୁଅକୁ ଲାଲନପାଳନ କରିବା ପାଇଁ ବାପ ମା’ ଅସୁମାରୀ କଷ୍ଟ କରିଥାନ୍ତି । କିନ୍ତୁ ଆଶା ରହି ଯାଏ ଆଶାରେ । ପୁଅଟିଏ ଜନ୍ମହୁଏ ସତ! କିନ୍ତୁ ମଣିଷ ବଦଳରେ ଅମଣିଷ ପାଲଟିଯାଏ । ବାପ ମା’ଙ୍କ ସ୍ୱପ୍ନକୁ ଧୂଳିସାତ କରିଦିଏ । ଆଉ ନିଶା ସେବନ ପାଇଁ ଟଙ୍କା ନଦେବାରୁ ବୃଦ୍ଧ ବାପାକୁ ପିଟି ପିଟି ଜୀବନରୁ ମାରି ଦେବାକୁ ମଧ୍ୟ ପଛାଏ ନାହିଁ । ଯେଉଁ ସନ୍ତାନଟି ପାଇଁ ଦିନେ ବାପ-ମା ନିଜକୁ ଗୌରବର ପାତ୍ର ହେବାକୁ ଅଶା କରିଥିଲେ ସେହି ପୁଅ ଆଜି ମୃତ୍ୟୁର କାରଣ ହୋଇଛି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ଆଠଗଡ଼ ଥାନା ବେଣ୍ଟପଦା ଗାଁରେ । ମୃତକଙ୍କ ନାଁ ବାଲୁଙ୍କେଶ୍ୱର ମହାନ୍ତି ବୟସ ୭୫ । ବୟସର ଅପରାହ୍ନରେ ପୁଅ ରୋଜଗାର କରି ବୁଢ଼ା ବାପକୁ ପୋଷିବା ପାଇଁ ଆଶା କରିଥିବାବେଳେ ଆଜି ପୁଅ ନିଶା ଖାଇବାକୁ ଓଲଟି ପଇସା ମାଗିଥିଲା ବୁଢ଼ାବାପକୁ । ଆଉ ବାପା ପଇସା ନଦେଇ ପାରିବାରୁ ପୁଅ ପଠାଇଦେଲା ଜମ ପୁରକୁ । ସେହି କୁଳାଙ୍ଗାର ପୁଅ ଅଭିଯୁକ୍ତର ନାମ ଅପର୍ତ୍ତି ମହାନ୍ତି । ମିଳିଥିବା ସୂଚନା ଅନୁଯାୟୀ, ଅପର୍ତ୍ତି କାମ ଧନ୍ଦା ନକରି ସବୁ ବେଳେ ନିଶା ସେବନ କରେ । ଟଙ୍କା ନଥିଲେ ବିଭିନ୍ନ ସମୟର ବାପାଙ୍କ ଠାରୁ ପଇସା ନେଇ ସେ ନିଶା ସେବନ କରେ । ଗତକାଲି ମଧ୍ୟ ସେ ନିଶା ଖାଇବା ପାଇଁ ବାପା ବାଲୁଙ୍କେଶ୍ୱରଙ୍କୁ ଟଙ୍କା ମାଗିଥିଲା । ହେଲେ ବାପା ଟଙ୍କା ନଦେବାରୁ ସେ ରାଗି ଯାଇଥିଲେ । ସେହି ରାଗରେ ଗତକାଲି ବିଳମ୍ବିତ ରାତିରେ ସେ ତାଙ୍କ ବାପାଙ୍କୁ ଏକ ଲୁହା ରଡରେ ପିଟିବାକୁ ଲାଗିଲା । ମାତ୍ର ବୃଦ୍ଧ ବୟସରେ ରଡ ମାଡ଼ କେତେବା ସହିବ । ଚିତ୍କାର କରି କରି ଶେଷରେ ନିରବୀ ଯାଇଥିଲେ ବାଲୁଙ୍କେଶର । ସବୁ ଦିନ ପାଇଁ ଶୋଇ ପଡ଼ିଥିଲେ ଆଉ ପୁଅ ଉପରେ ଅଭିମାନ କରି ଚାଲିଯାଇଥିଲେ ଅଫେରା ରାଇଜକୁ । ବାପର ମୃତ୍ୟୁ ହେବା ଜାଣି ପୁଅ ଅପର୍ତ୍ତି ସ୍ଥାନୀୟ ଆଠଗଡ଼ ଥାନାରେ ଆତ୍ମ ସମର୍ପଣ କରିବା ସହ ଘଟଣାଗୁଡ଼ିକୁ କହିଚାଲିଥିଲା । ପୁଲିସ ଅପର୍ତ୍ତିକୁ ଅଟକ ରଖିବା ସହ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହ ବ୍ୟବଛେଦ ନିମନ୍ତେ ପଠାଇ ତଦନ୍ତ ଆରମ୍ଭ କରିଛି । ତେବେ ପୁଅ ଅପର୍ତ୍ତିର ଏଭଳି କାଣ୍ଡକୁ ଅଞ୍ଚଳରେ ନାପସନ୍ଦ କରିବା ସହ ଘଟଣାର ତିବ୍ର ନିନ୍ଦା କରିଛନ୍ତି । ସୂଚନା ଯୋଗ୍ୟ ଯେ, ବାଲୁଙ୍କେଶ୍ୱର ସ୍ଥାନୀୟ ବିଜେଡି କାର୍ଯ୍ୟାଳୟରେ କାମ ଧନ୍ଦା କରେ । ସମସ୍ତଙ୍କ ପ୍ରିୟପାତ୍ର ଥିଲେ ବାଲୁଙ୍କେଶ୍ୱର । ତାଙ୍କୁ ବାଲି ମଉସା ବୋଲି ସମସ୍ତେ ଡାକନ୍ତି ଆଉ ଆଦର କରନ୍ତି । ତାଙ୍କର ମୃତ୍ୟୁଖବର ଶୁଣି ବହୁ ବିଜେଡି ନେତା ଓ କର୍ମୀ ତାଙ୍କ ଘରପାଖରେ ପହଞ୍ଚିଥିଲେ ।