ପନିକି ଚୋଟରେ ମହିଳାଙ୍କୁ ହତ୍ୟା
କଟକ(ଏନ୍.ଏମ୍.): ସ୍ଥାନୀୟ ପୋତାପୋଖରୀ ଅଞ୍ଚଳର ଗାନ୍ଧୀ ପଲ୍ଲୀ ନିକଟରେ ଥିବା ଏକ ବସ୍ତିରେ ଜଣେ ମହିଳାଙ୍କୁ ବିଭତ୍ସ ଭାବେ ହତ୍ୟା କରାଯାଇଥିବା ଚର୍ଚ୍ଚା ହେଉଛି। ମୃତା ମହିଳା ଜଣକ ପ୍ରିୟତମା ଦଳେଇ ବୋଲି ଜଣାପଡ଼ିଛି। ମହିଳାଙ୍କ ବେକକୁ କାଟି ଅତି ନିର୍ମମ ଭାବରେ ତାଙ୍କ ପଡୋଶୀ ତଥା ଘଟଣାର ଅଭିଯୁକ୍ତ ସନ୍ତୋଷ ସିହ୍ନା ହତ୍ୟା କରିଥିବା ପୁଲିସ ନିକଟରେ ଅଭିଯୋଗ ହୋଇଛି। ଉଭୟଙ୍କ ମଧ୍ୟରେ ବଚସା କାରଣରୁ ସନ୍ତୋଷ ଏଥିରେ ଉତ୍କ୍ଷିପ୍ତ ହୋଇ ମହିଳାଙ୍କୁ ଏକ ଧାରୁଆ ପନିକିରେ ବେକକୁ ପ୍ରହାର ପକାଇଥିଲା। ତେବେ ବେକ କଟିଯିବାରୁ ମହିଳାଙ୍କର ମୃତ୍ୟୁ ହୋଇଛି। ପ୍ରାପ୍ତ ସୂଚନା ମୁତାବକ ଶୁକ୍ରବାର ଦିନ ପ୍ରାୟ ସାଢେ ୧୧ଟା ସମୟରେ ସନ୍ତୋଷର ପ୍ରିୟତମାଙ୍କ ମଧ୍ୟରେ କୌଣସି କାରଣରୁ ପାଟିତୁଣ୍ଡ ହୋଇଥିଲା। ଏହି ଘଟଣାରେ ସନ୍ତୋଷ ମହିଳାଙ୍କ ଉପରେ ରାଗିଯାଇ ପାଖରେ ଥିବା ଏକ ଧାରୁଆ ପନିକିରେ ଚୋଟ ମାରଥିଲା । ଘଟଣାରେ ଗୁରୁତର ଆହତ ହୋଇ ସାହାଯ୍ୟ ନିମନ୍ତେ ମହିଳା ଜଣକ ଚିତ୍କାର କରୁଥିବାବେଳେ ଅଭିଯୁକ୍ତ ସନ୍ତୋଷର ମାଆ ଘଟଣା ସ୍ଥଳରେ ସନ୍ତୋଷକୁ ଅଟକାଇଥିଲେ। ହେଲେ ସେତେବେଳକୁ ସନ୍ତୋଷ ଉକ୍ତ ମହିଳାଙ୍କୁ ଚୋଟ ପରେ ଚୋଟ ମାରି ଲହୁ ଲୁହାଣ କରି ଦେଇଥିଲା । ଅଭିଯୁକ୍ତ ଏପରି ଜଘଣ୍ୟ କାଣ୍ଡ ଘଟାଇ ଘଟଣାସ୍ଥଳରୁ ଫେରାର ହୋଇଯାଇଥିଲା। ଏ ସମ୍ପର୍କରେ ଖବର ପାଇ ସିଆର୍ଆର୍ଆଇ ପୁଲିସ୍ ଘଟଣା ସ୍ଥଳରେ ପହଞ୍ଚି ମୃତ ଦେହକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି। ତେବେ ଅଭିଯୁକ୍ତ ଜଣକ ଫେରାର ହୋଇଯାଉଥିବାବେଳେ ପୁଲିସ୍ ତାକୁ ଧରିବାରେ ସଫଳ ହୋଇଛି। ଅଭିଯୁକ୍ତ ସନ୍ତୋଷ ଜଣେ ଅଭ୍ୟାସଗତ ନିଶାଡ଼ି ବୋଲି ଜଣାପଡ଼ିଛି। ସେ ଅଧିକାଂଶ ସମୟରେ ନିଶାସକ୍ତ ହୋଇ ରହୁଥିଲା। ତେବେ ହତ୍ୟାକାଣ୍ଡର ପ୍ରକୃତ କାରଣ ଏଯାଏ ସ୍ପଷ୍ଟ ହୋଇନଥିବାବେଳେ ପୁଲିସ୍ ଘଟଣାର ଖୋଳତାଡ ଆରମ୍ଭ କରିଛି।