ନୀଳିମାରାଣୀ ସମାଜସେବା ସମ୍ମାନ -୨୦୨୩ ପ୍ରଦାନ ସମାରୋହ

#କଟକ ସଦର(ଏନ୍‌.ଏମ୍‌.): ଗ୍ରାମର ବିକାଶ, ସମାଜର ବିକାଶ, ପ୍ରତିଭାର ବିକାଶର ଜଣେ ଉଦାହରଣୀୟ ବ୍ୟକ୍ତିତ୍ୱ ଥିଲେ ମା’ ନୀଳିମାରାଣୀ ସାମନ୍ତ । ତାଙ୍କର ଏହି ଉଲ୍ଲେଖନୀୟ କାର୍ଯ୍ୟସବୁ ତାଙ୍କୁ ଚିର ଅମର କରି ରଖିବ ବୋଲି ଆଜି କଟକ ଜିଲ୍ଲା ସ୍ଥିତ ଆଦର୍ଶ ଗ୍ରାମ କଲରାବାଙ୍କରେ ଅନୁଷ୍ଠିତ ମା’ ନୀଳିମା ରାଣୀ ସମାଜସେବା ସମ୍ମାନ-୨୦୨୩ ପ୍ରଦାନ ସମାରୋହରେ ମତପ୍ରକାଶ ପାଇଛି । ମା’ ନୀଳିମାରାଣୀ ସାମନ୍ତଙ୍କ ୯୪ତମ ଜୟନ୍ତୀ ଅବସରରେ କଲରାବାଙ୍କ ସ୍ଥିତ ନୀଳିମାରାଣୀ ମେମୋରିଆଲ ଚାରିଟେବଲ ଟ୍ରଷ୍ଟ ପକ୍ଷରୁ ଆୟୋଜିତ ଏକ ଭବ୍ୟ ସମାରୋହରେ କଟକ ଏସସିବି ମେଡିକାଲର ଆଦର୍ଶ ସ୍ଥାନୀୟା ମହିଳା ସମାଜସେବୀ ଶାନ୍ତିଲତା ନାୟକଙ୍କୁ ସମ୍ମାନଜନକ ‘ନୀଳିମାରାଣୀ ସମାଜସେବା ସମ୍ମାନ-୨୦୨୩’ ପ୍ରଦାନ କରାଯାଇଛି । ସମ୍ମାନସ୍ୱରୂପ ୫୦ହଜାର ଟଙ୍କାର ଅର୍ଥରାଶି ସମେତ ମାନପତ୍ର ଓ ଉପଢୌକନ ଦିଆଯାଇଥିଲା । ଏହି ସମ୍ମାନ ପ୍ରଦାନ କରିଥିଲେ ନୀଳିମାରାଣୀ ମେମୋରିଆଲ ଚାରିଟେବଲ ଟ୍ରଷ୍ଟର ପ୍ରତିଷ୍ଠାତା ତଥା ସାଂସଦ ଡ. ଅଚ୍ୟୁତ ସାମନ୍ତ । କାର୍ଯ୍ୟକ୍ରମରେ ସଭାପତି ଅନ୍ତର୍ଯ୍ୟାମୀ ସାମନ୍ତ ଓ ସମ୍ପାଦିକା ତଥା ସୁସାହିତ୍ୟିକା ଡ. ଇତି ସାମନ୍ତ ବିଶିଷ୍ଟ ଆଧ୍ୟାତ୍ମିକ ଗୁରୁ ବାବା ରାମଦାସ ମହାରାଜ, ଅଞ୍ଜନ ସାମନ୍ତ, ଅଭିନ୍ନ ଚନ୍ଦ୍ର କେଶ, ଡା.ରବିନାରାୟଣ ସାମନ୍ତ, ଜ୍ୟୋତ୍ସ୍ନା ମିତ୍ର, ନିରୁପମା ସାମନ୍ତ, ତୃପ୍ତିରାଣୀ ସାମନ୍ତ, ସିପ୍ରା ସାମନ୍ତ, ନାରାୟଣ ପରିଡା ଏବଂ ବିଜୟ ସ୍ୱାଇଁ ପ୍ରମୁଖ ଉପସ୍ଥିତଥିଲେ । ଏହି ଅବସରରେ ମା’ ନୀଳିମାରାଣୀଙ୍କ ଦ୍ୱାରା ପ୍ରତିଷ୍ଠିତ କଳିଙ୍ଗ ଇଂଲିଶ ମିଡିୟମ ସ୍କୁଲ ଓ କଲରାବାଙ୍କ ହାଇସ୍କୁଲର ଛାତ୍ରଛାତ୍ରୀମାନେ ସୁନ୍ଦର ସାଂସ୍କୃତିକ କାର୍ଯ୍ୟକ୍ରମମାନ ପରିବେଷଣ କରିଥିଲେ ।