ନିଆରା ମଣିଷ ଟିକା ଭାଇ: ଅଭାବ ଅସୁବିଧା ସତ୍ତ୍ୱେ ସମାଜସେବାରେ ବିତୁଛି ଜୀବନ

#ଭଦ୍ରକ(ଏନ୍‌.ଏମ୍‌.): କଥାରେ ଅଛି ଇଚ୍ଛା ତଥା ନିରନ୍ତର ଉଦ୍ୟମ ଥିଲେ ସଫଳତା ହିଁ ପଦ ଚୁମ୍ବନ କରିଥାଏ । ଅର୍ଥାତ ନିଜର ଦୃଢ଼ ମନ ପାଖରେ ଅଭାବ ଅସୁବିଧା ସବୁ କିଛି ହାର ମାନିଥାଏ । ଏଭଳି ପ୍ରମାଣ କରି ଦେଖାଇଛନ୍ତି ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ରାଜଘର ପୋଖରୀ ପଞ୍ଚାୟତର ରାମଚନ୍ଦ୍ର ଜେନା । ଯାହାଙ୍କୁ ଟିକା ଭାଇ ବୋଲି ସବୁଠାରେ ପରିଚିତ । ୭୫ବର୍ଷ ବୟସରେ ବହୁ ଅଭାବ ଅସୁବିଧାରେ ଥାଇ ମଧ୍ୟ ସମାଜସେବାରେ ନିଜକୁ ନିୟୋଜିତ କରି ସାରା ଓଡ଼ିଶା ପାଇଁ ପାଲଟି ଯାଇଛନ୍ତି ଅନନ୍ୟ ଉଦାହରଣ । ସେ ଦିନ ମଜୁରିଆ ହୋଇ ବି ସମାଜସେବାକୁ ଛାଡ଼ି ପାରି ନାହାନ୍ତି । ମୂଲ ଲାଗିଲେ ଚଳେ ତାଙ୍କ ସଂସାର । କିନ୍ତୁ ମୂଲ ଟଙ୍କାରେ କେବଳ ସଂସାର ଚଳାନ୍ତି ନାହିଁ କି ବଡ଼ଲୋକ ହେବା ପାଇଁ ଧନ ସଞ୍ଚୟ କରନ୍ତି ନାହିଁ; ମୂଲ ଟଙ୍କାରୁ କିଛି କିଛି ସେ ସମାଜସେବାରେ ବି ବିନିଯୋଗ କରନ୍ତି । ଯଦି କେଉଁଠୁ ଜାଣିବାକୁ ପାଇଲେ କେହି ଜଣେ ବିପଦରେ ପଡିଛି ଚିକିତ୍ସା ପାଇଁ ଅର୍ଥର ଆବଶ୍ୟକତା ରହିଛି ସେ ବା କେମିତି ଚୁପ ହୋଇ ରହିବେ, ନିସ୍ୱାର୍ଥପର ଭାବେ ତୁରନ୍ତ ନିଜ ସାଇକେଲରେ ଯାଇ ପହଞ୍ଚି ଯାଆନ୍ତି ସେଠାରେ । ନିଜେ ପରିଶ୍ରମ କରି ରଖିଥିବା ପଇସାରୁ ଫଳ, ଔଷଧ ସହ ଆର୍ôଥକ ସହଯୋଗ କରନ୍ତି । ସେଥିରେ ତାଙ୍କର ମନରେ ଥାଏ ଅପୂର୍ବ ଆନନ୍ଦ । କାରଣ ଦୁଃଖ କ’ଣ ସେ ନିଜ ଆଖିରେ ଦେଖୁଛନ୍ତି ଓ ଅନୁଭବ କରୁଛନ୍ତି । ସେ କେବେ ବି ଥକି ପଡ଼ି ନାହାଁନ୍ତି । କେବେ ବି ସେ ଭାଙ୍ଗି ପଡ଼ି ନାହାଁନ୍ତି । ୭୫ ବର୍ଷ ବୟସରେ ନିଜେ ପରିଶ୍ରମ କରି ରୋଜଗାର କରୁଥିବା ଟଙ୍କାକୁ ସେ ଲଗାଇ ଦେଉଛନ୍ତି ସମାଜ ପାଇଁ । ଖଣ୍ଡେ ସାଇକେଲ ହିଁ ତାଙ୍କର ସାହା ଭରଷା । ଏହି ସାଇକେଲରେ ସେ ଦୂର ଦୂରାନ୍ତ ଜାଗାକୁ ଯାଇ ଗରିବ ଅସହାୟଙ୍କ ସେବା କରୁଛନ୍ତି । ତେବେ ସେ ନିଜେ ମଧ୍ୟ ଅତି ଦୟନୀୟ ଅବସ୍ଥାରେ କାଳାତିପାତ କରୁଥିବାରୁ ସରକାର ତାଙ୍କ ଉପରେ ନଜର ଦେଇ ତାଙ୍କୁ ଗୋଟିଏ ବାର୍ଦ୍ଧକ୍ୟ ଭତ୍ତା ଓ ପ୍ରଧାନ ମନ୍ତ୍ରୀ ଆବାସ ଟିଏ ଦେବାକୁ କିଛି ଗ୍ରାମ ବାସୀ ଦାବି ମଧ୍ୟ କରୁଛନ୍ତି । ତେଣୁ ସରକାର ଓ ଜିଲ୍ଲା ପ୍ରଶାସନ ମଧ୍ୟ ରାମଚନ୍ଦ୍ର ଜେନାଙ୍କ ପ୍ରତି ସହାନୁଭୂତି ପ୍ରଦର୍ଶନ ପୂର୍ବକ ଭତ୍ତା ସହ ଆବାସ ଯୋଜନାରେ ଅନ୍ତଭୁକ୍ତ କରିବା ପାଇଁ ଅଞ୍ଚଳର ବୁଦ୍ଧିଜୀବୀ, ମୁରବୀ ତଥା ଅଞ୍ଚଳର ବିଭିନ୍ନ ବର୍ଗର ଲୋକ ସରକାରଙ୍କୁ ନିବେଦନ କରିଛନ୍ତି ।