ଦୀର୍ଘ ୧୫ବର୍ଷ ପରେ ପୁଣି ଆରମ୍ଭ ହେଲା ବାରବାଟୀ ଦୁର୍ଗ ଖନନ: ମିଳିଲା ତ୍ରୟୋଦଶ ଓ ଚତୁର୍ଦ୍ଦଶ ଶତାବ୍ଦୀର ପଥର ମୂର୍ତ୍ତି
#କଟକ(ଏନ୍.ଏମ୍.): ଦୀର୍ଘ ୧୫ ବର୍ଷ ପରେ ପୁଣି ଐତିହାସିକ ବାରବାଟୀ ଦୁର୍ଗରେ ଖନନ କାର୍ଯ୍ୟ ଆରମ୍ଭ ହୋଇଛି । ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ) ପକ୍ଷରୁ ଏହି ଖନନ କାର୍ଯ୍ୟ ଆରମ୍ଭ ହୋଇଥିବା ବେଳେ ପ୍ରଥମ ଦିନରେ ମଧ୍ୟଯୁଗୀୟ ସଂସ୍କୃତିର ତ୍ରୟୋଦଶ ଓ ଚତୁର୍ଦ୍ଦଶ ଶତାବ୍ଦୀର ବିରଳ ଭଗ୍ନ ପଥର ମୂର୍ତ୍ତି ମିଳିଛି । ଏହି ଖନନ ପ୍ରକ୍ରିୟା ଜାରି ରହିବ ଏବଂ ଏହାକୁ ନେଇ ଏଏସ୍ଆଇ ଅଧିକ ଅନୁସନ୍ଧାନ କରିବ ବୋଲି ସୂଚନା ମିଳିଛି । ବାରବାଟୀ ଦୁର୍ଗ ନିର୍ମାଣରେ ମଧ୍ୟଯୁଗୀୟ ସଂସ୍କୃତିର ଛାପ ରହିଥିଲା । ସେହି ସମୟରେ ଦକ୍ଷିଣ ପୂର୍ବ ଏସୀୟ ରାଷ୍ଟ୍ରମାନଙ୍କ ସହ ନୌବାଣିଜ୍ୟ ସମ୍ପର୍କୀୟ ରହିଥିଲା । ତେଣୁ ସେ ସମ୍ପର୍କରେ ଅଧିକ ଜାଣିବା ପାଇଁ ଏହି ଖନନ ଆରମ୍ଭ ହୋଇଛି । ସକାଳେ ପୂଜାର୍ଚ୍ଚନା ପରେ ଖନନ ପ୍ରକ୍ରିୟା ଆରମ୍ଭ ହୋଇଥିବା ବେଳେ ସୁପରିଟେଣ୍ଡିଙ୍ଗ ଆର୍କିଓଲୋଜିଷ୍ଟ ଡକ୍ଟର ଡି. ଗଡ଼ନାୟକ ଉପସ୍ଥିତ ଥିଲେ । ସୂଚନାଯୋଗ୍ୟ ଯେ, ଇତିହାସର ଅନେକ ସ୍ମୃତିବହନ କରୁଥିବା ବାରବାଟୀ ଦୁର୍ଗ ସମ୍ପର୍କରେ ଅଧିକ ଅନୁସନ୍ଧାନ ପାଇଁ ଏଏସ୍ଆଇ ପକ୍ଷରୁ ୧୯୮୯ରେ ବାରବାଟୀ ଦୁର୍ଗ, ଗଡ଼ଖାଇର ଖନନ ପ୍ରକ୍ରିୟା ଆରମ୍ଭ ହୋଇଥିଲା । ପରବର୍ତ୍ତୀ ସମୟରେ ୧୯୯୭, ୨୦୦୩ ଓ ୨୦୦୭ରେ ଖନନ କରାଯାଇଥିଲା । ଏହି ଖନନ ସମୟରେ ଅନେକ ଗୁଢ଼ ରହସ୍ୟ ମଧ୍ୟ ପଦାକୁ ଆସିଥିଲା । କିନ୍ତୁ ଏହାପରେ ଏହି ପ୍ରକ୍ରିୟା ବନ୍ଦ ରହିଥିଲା । ତେବେ ଦୀର୍ଘ ବର୍ଷ ପରେ ପୁଣି ଖନନ କାର୍ଯ୍ୟ ଆରମ୍ଭ ନେଇ କଟକ ସହରବାସୀ ଅତ୍ୟନ୍ତ ଖୁସି ବ୍ୟକ୍ତ କରିବା ସହ ଐତିହାସିକ ବାରବାଟୀ ବିଷୟରେ ଅଧିକ ତଥ୍ୟ ଲୋକ ଲୋଚନକୁ ଆସିପାରିବ ବୋଲି ମତପ୍ରକାଶ କରିଛନ୍ତି ।
