ଦୀପୁ, ଓମ୍ ହତ୍ୟା ମାମଲା: ତଦନ୍ତକାରୀ ଅଧିକାରୀଙ୍କୁ ଜେରା

#କଟକ(ଏନ୍‌.ଏମ୍‌.): ଦୀପୁ ଓ ଓମ୍ ହତ୍ୟା ମାମଲାରେ ଆଜି ଧଳସାମନ୍ତ ଭ୍ରାତା କଟକ ଜିଲ୍ଲା ଓ ଦୌରାଜଜ୍ ଅଦାଲତରେ ହାଜର ହୋଇଥିଲେ । ମାମଲାର ତଦନ୍ତକାରୀ ଅଧିକାରୀ ଅଜୟ ଦାସ ହାଜର ହୋଇ ସାକ୍ଷ୍ୟ ପ୍ରଦାନ କରିଛନ୍ତି । ତାଙ୍କୁ ଜେରା ଅଧା ରହିଥିବାବେଳେ ଆସନ୍ତା ଜୁଲାଇ ୨୪ର ତାରିଖରେ ମାମଲଶର ପରବର୍ତୀ ଶୁଣାଣି ହେବ । ସୂଚନାଥାଉକି ଗତ ୨୦୧୩ ନଭେମ୍ବର ୧୨ ତାରିଖରେ ଧଳସାମନ୍ତ ଭ୍ରାତା ସେମାନଙ୍କ ସହଯୋଗୀ ଚାଉଳିଆଗଞ୍ଜର ଦୀପୁ ଓରଫ ମନୋଜ ମଲ୍ଲିକ୍ ଏବଂ କଲ୍ୟାଣୀନଗରର ଓମ୍ ଓରଫ ଓମ୍ ପ୍ରକାଶ ସ୍ୱାଇଁଙ୍କୁ ଅପହରଣ କରି ନେଇ ଆଠଗଡର ଖୁଂଟକଟାରେ ଥିବା ଏକ ଫାର୍ମ ହାଉସରେ ପିଟି ପିଟି ହତ୍ୟା କରିଥିବା ନେଇ ଅଭିଯୋଗ ହୋଇଥିଲା । ଧଳସାମନ୍ତ ଭ୍ରାତାଙ୍କ ଟେଣ୍ଡର ଫିକ୍ସିଂ, ଦାଦାବଟି ଆଦି କାର୍ଯ୍ୟ ଦୀପୁ ଓ ଓମ୍ କରୁଥିବାବେଳେ ଧଳସାମନ୍ତ ଭ୍ରାତାଙ୍କ ପ୍ରତି ଆନୁଗତ୍ୟ ପ୍ରଦର୍ଶନ ନ କରିବା କାରଣରୁ ଉଭୟଙ୍କୁ ମାରି ଦିଆଯାଇଥିଲା । ଏହି ମାମଲାରେ ଏସ୍‌ଡିଜେଏମ୍ ଅଦାଲତରେ କମିଶନରେଟ୍ ପୁଲିସ୍ ଗତ ୨୦୧୬ ମସିହା ମଇ ୨୬ ତାରିଖରେ ୧୪ ଜଣଙ୍କ ବିରୋଧରେ ୧୧୨୦ ପୃଷ୍ଠାର ଅଭିଯୋଗ ଫର୍ଦ୍ଦ ଦାଖଲ କରିଥିଲା । ଏଥିରେ ସୁଶିଲ ଧଳ ସାମନ୍ତ, ସୁଶାନ୍ତ ଧଳ ସାମନ୍ତ, ନିର୍ମଳ ରାଉତ, ପିଂଟା ଓରଫ ଶୁଭେନ୍ଦ୍‌ୁ ଦାସ, ଭୋଲାରାମ ଭଗତ, ଆରିଫ୍ ଖାନ୍‌, ସଞ୍ଜୟ ସାହୁ, ଭରତ ବେହେରାଙ୍କ ନାମ ରହିଛି ।