ତିଗିରିଆରେ ବିଜୁ ଜନତା ଦଳର ନିର୍ବାଚନୀ ପ୍ରଚାର: କେନ୍ଦ୍ର ସରକାରଙ୍କ ଉପରେ ବର୍ଷିଲେ ସଂତୃପ୍ତ ଓ ରଣେନ୍ଦ୍ର

– କେନ୍ଦ୍ର ସରକାରଙ୍କ ପ୍ରତିଶ୍ରୁତି ପାଣିର ଗାର

– ଖଟିଖିଆଙ୍କ ଦାନା କାଟି ପୁଞ୍ଜିପତିଙ୍କୁ ପୋଷୁଛି ବିଜେପି

– କେନ୍ଦ୍ର ସରକାରଙ୍କ ଘୋଷଣା ସବୁ କ୍ଷଣସ୍ଥାୟୀ ଓ ଧୁଆଁବାଣ

– ଯୋଡି ଶଙ୍ଖ ବିକାଶଧାରାକୁ ଅପରିବର୍ତ୍ତିତ ରଖିବ

ତିଗିରିଆ (ଏନ୍‌.ଏମ୍‌.): କେନ୍ଦ୍ର ସରକାରଙ୍କ ଓଡିଶା ପ୍ରତି ବୈମାତୃକ ମନୋଭାବ ଦିନକୁ ଦିନ ବୃଦ୍ଧି ପାଉଛି । ଗତ ୧୦ବର୍ଷ ଶାସନ କାଳରେ ବିଜେପି ସରକାର କୌଣସି ପ୍ରତିଶ୍ରୁତି ପୂରଣ କରିନାହିଁ । ଜନସାଧାରଣଙ୍କ ସ୍ୱାର୍ଥ ପାଇଁ ବିଜେପି ଯେଉଁ ସବୁ ପ୍ରତିଶ୍ରୁତି ଦେଇଥିଲା ତାହା ପାଣିର ଗାର ସାବ୍ୟସ୍ତ ହୋଇଛି । ଦେଶରେ ବେକାରୀଙ୍କ ସଂଖ୍ୟା ବୃଦ୍ଧି ପାଇଲାଣି । ନିତ୍ୟବ୍ୟବହୃତ ସାମଗ୍ରୀର ଦର ଆକାଶଛୁଆଁ ହେଉଛି । ଗରିବ ଖଟିଖିଆଙ୍କ ଅବସ୍ଥା ଶୋଚନୀୟ ହେଲାଣି । କିନ୍ତୁ ପୁଞ୍ଜିପତିଙ୍କ ପୁଞ୍ଜି କେମିତି ବୃଦ୍ଧି ପାଇବ ତାହାକୁ ଦୃଷ୍ଟି ଦେଉଛନ୍ତି କେନ୍ଦ୍ର ସରକାର । ଗରିବ ଖଟିଖିଆ ଶ୍ରେଣୀର ଲୋକଙ୍କ ପେଟରୁ ଦାନା କାଟି କେନ୍ଦ୍ର ସରକାର ପୁଞ୍ଜିପତିଙ୍କୁ ପୋଷୁଛନ୍ତି । ଓଡ଼ିଶାରେ ବିଜୁ ଜନତା ଦଳର ସରକାର ପ୍ରତି ଜନସମର୍ଥନ ଦେଖି କେନ୍ଦ୍ର ସରକାର ଏବେ ଯେଉଁ ସବୁ ଘୋଷଣା କରୁଛନ୍ତି, ତାହା କ୍ଷଣସ୍ଥାୟୀ ଓ କେବଳ ଧୁଆଁବାଣ ବୋଲି ବିଜେଡି ପକ୍ଷରୁ ଅଭିଯୋଗ ହୋଇଛି ।  ଏହାର ପ୍ରତିକାର ପାଇଁ ରାଜ୍ୟରେ ଯୋଡ଼ି ଶଙ୍ଖ ବାଜିବା ଦରକାର ବୋଲି ଆହ୍ୱାନ ଦିଆଯାଇଛି । ଆସନ୍ତା ଦିନରେ ଏକ ସୁସ୍ଥ ସବଳ ସାମାଜିକ, ରାଜନୈତିକ ତଥା ଅର୍ଥନୈତିକ ସ୍ଥିରାବସ୍ଥା ଆଣିବାକୁ ହେଲେ ରାଜ୍ୟରେ ଯୋଡି ଶଙ୍ଖର ଆବଶ୍ୟକତା ରହିଛି । ଏଣୁ ବିକାଶର ଧାରାକୁ ଅପରିବର୍ତ୍ତିତ ରଖିବାକୁ ଉଭୟ ସାଂସଦ ପ୍ରାର୍ଥୀ ଡଃ ସଂତୃପ୍ତ ମିଶ୍ର ଓ ବିଧାୟକ ପ୍ରାର୍ଥୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ ଶଙ୍ଖ ଚିହ୍ନରେ ମୋହର ମାରି ବିଜୟୀ କରିବାକୁ ତିଗିରିଆରେ ଅନୁଷ୍ଠିତ ଜନସମାବେଶରେ ମତ ପ୍ରକାଶ ପାଇଛି । ବୁଧବାର ଠାରୁ ତିଗିରିଆ ବ୍ଲକ ଅଧୀନ ୧୪ ନଂ ଜୋନ୍‌ରେ ବିଜୁ ଜନତା ଦଳ ତାର ନିର୍ବାଚନୀ ପ୍ରଚାର କାର୍ଯ୍ୟ ଆରମ୍ଭ କରିଛି । ପୂର୍ବାହ୍ନରେ ରଣେନ୍ଦ୍ର ଓ ଡଃ ସନ୍ତୃପ୍ତ ମିଶ୍ର ତିଗିରିଆ ବ୍ଲକ ନୂଆପାଟଣା ଅଧିନ ମା କଳାପାଟଙ୍କ ମନ୍ଦିରରେ ପୂଜାର୍ଚ୍ଚନା କରି ଏକ ବିରାଟ ଶୋଭାଯାତ୍ରାରେ ବାହରିଥିଲେ । ହଜାର ହଜାର ଜନସାଧାରଣଙ୍କ ଉପସ୍ଥିତିରେ ଉଭୟ ପ୍ରାର୍ଥୀ ନୁଆପାଟଣା, ଭୋଗଡା, ସୁରେନ୍ଦ୍ରପାଟଣା, ଜେମାଦେଇପରୁ, ପଙ୍କାଳ ଛକ, ବିରିପୁଟ, ବାଲିପୁଟ, ଭୁତିଆଡିହ, ବାଣେଶ୍ୱରପଡା, ବିନ୍ଧାଣିମା, କଳିବିର, କଣ୍ଠିପୁର, ବିଷ୍ନୁପୁର, ରଘୁରାମପୁର, ଗଦାଧରପୁର, ସାନନାଉପୁଟ, ଶୁଣ୍ଠିପାଳ, ହାଟମାଳ, ଚାରିବାଟିଆ ହରିଜନ ସାହି, ନନ୍ଦପୁର, ସାମପୁର, ବଡନାଉପୁଟ, ଶାଳିଜଙ୍ଘା, ବଉଳାଙ୍ଗ, ବାହାରବିଲ୍ଲା, ଖଣ୍ଡହତା ଆଦି ଗ୍ରାମ ପରିକ୍ରମା କରି ବିଜେପି ସରକାରଙ୍କ ଜନସ୍ୱାର୍ଥ ବିରୋଧି ନୀତି ଉପରେ ମତବ୍ୟକ୍ତ କରିବା ସହ ଓଡିଶାର ବିକାଶ ଧାରାକୁ ତ୍ୱରାନ୍ୱିତ କରିବା ତଥା ଏକ ସୁସ୍ଥ ସାମାଜିକ ରାଜନୈତିକ ବାତାବରଣ ପ୍ରତିଷ୍ଠା ଦିଗରେ ବିଜୁ ଜନତା ଦଳ ଏକମାତ୍ର ଦଳ ବୋଲି ମତାମତ ଦେଇଥିଲେ । ଆସନ୍ତା ଦିନରେ ଏହି ବିକାଶର ଧାରକୁ ଆଗକୁ ନେବାକୁ ବିଧାୟକ ପ୍ରାର୍ଥୀ ରଣେନ୍ଦ୍ର ପ୍ରତାପ ସ୍ୱାଇଁ ଓ ସାଂସଦ ପ୍ରାର୍ଥୀ ସଂତୃପ୍ତ ମିଶ୍ରଙ୍କୁ ବିପୁଳ ସଂଖ୍ୟାରେ ମତଦାନ କରିବାକୁ ନିବେଦନ କରିଥିଲେ । ପ୍ରଚାର କାର୍ଯ୍ୟରେ ଶେଷ ପର୍ଯ୍ୟାୟରେ ବଡନାଉପୁଟ ପଞ୍ଚାୟତ ଅନ୍ତର୍ଗତ ଖଣ୍ଡହତା ଜଗନ୍ନାଥ ମନ୍ଦିର ନିକଟରେ ଆୟୋଜିତ ଏକ ସାଧାରଣ ସଭାରେ ଉଭୟ ପ୍ରାର୍ଥୀ ବିଜେପି ସରକାରଙ୍କୁ ତୀବ୍ର ଭର୍ତ୍ସନା କରିବା ସହ କେନ୍ଦ୍ର ସରକାରଙ୍କ ପାଇଁ ଆଜି ଭାରତର ଆର୍ଥିକସ୍ଥିତି ଅବସ୍ଥା ଶୋଚନୀୟ ହୋଇପଡିଛି ବୋଲି ମତବ୍ୟକ୍ତ କରିଥିଲେ । କାର୍ଯ୍ୟକ୍ରମରେ ତିଗିରିଆ ବ୍ଲକ ଅଧ୍ୟକ୍ଷା ସଂଧ୍ୟାରାଣୀ ନାୟକ, ଉପାଧ୍ୟକ୍ଷ ମାନସ କୁମାର ସାହୁ, ୧୪ନଂ ଜିଲ୍ଲା ପରିଷଦ ସଭ୍ୟ ସଂଜୟ କୁମାର ମଲ୍ଲିକ, ୧୫ ନଂ ଜିଲ୍ଲା ପରିଷଦ ସଭ୍ୟା ସସ୍ମିତା ରାଉତ, ମିଶନ ଶକ୍ତି ସଭାନେତ୍ରୀ ସମସୁରା ବେଗମ, ପୂର୍ବତନ ବ୍ଲକ ଅଧ୍ୟକ୍ଷ ଭାଗିରଥି ନନ୍ଦ ପ୍ରମୁଖ ଉପସ୍ଥିତ ଥିଲେ ।