ଡ୍ରିମସ କୋଭିଡ଼୍ କେୟାର ସେଣ୍ଟରରେ ଅଘଟଣ : ଛୁରି ପଶିଥିବା ଯୁବକଙ୍କ ମୃତ୍ୟୁ
କଟକ(ଏନ.ଏମ.): କଟକ ଜିଲ୍ଲା ଟାଙ୍ଗୀ ସ୍ଥିତ ଡ୍ରିମସ କୋଭିଡ଼୍ କେୟାର ସେଣ୍ଟରେ ବେକରେ ଛୁରି ପଶି ଯାଇଥିବା ଜଣେ କୋଭିଡ ଆକ୍ରାନ୍ତ ଯୁବକଙ୍କ ମୃତ୍ୟୁ ହୋଇଛି । ଗତ ୪ତାରିଖ ଦିନ ଉକ୍ତ ଯୁବକଙ୍କ ବେକରେ ଛୁରି ପଶି ଯିବାରୁ ତାଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ଏସସିବିକୁ ଅଣାଯାଇ ଅସ୍ତ୍ରୋପଚାର ପରେ ଆଇସିୟୁରେ ରହିଥିଲେ । ତେବେ ୮ତାରିଖ ଦିନ ଅପରାହ୍ନରେ ତାଙ୍କର ମୃତ୍ୟୁ ହୋଇଥିବା ମେଡ଼ିକାଲ ସୂତ୍ରରୁ ଜଣାପଡ଼ିଛି । ମୃତ ଯୁବକ ଜଣକ ଚୌଦ୍ୱାର ଦେବୀ ନଗରର ସୁକୁମାର ସୁବୁଦ୍ଧିରାୟ (୪୩) ବୋଲି ଜଣା ପଡ଼ିଛି ।
ମିଳିଥିବା ସୂଚନା ଅନୁଯାୟୀ ସୁକୁମାର କରୋନା ଆକ୍ରାନ୍ତ ହେବା ପରେ ଘରେ ସଂଗରୋଧରେ ରହିଥିଲେ । କିନ୍ତୁ ପରବର୍ତ୍ତୀ ସମୟରେ ସେ ଗତ ୨୮ ତାରିଖରେ ଟାଙ୍ଗୀ ସ୍ଥିତ ଡ୍ରିମସ କୋଭିଡ଼୍ କେୟାର ସେଣ୍ଟରରେ ଭର୍ତ୍ତି ହୋଇଥିଲେ । ଆରୋଗ୍ୟ ହେବା ପରେ ୪ତାରିଖ ଦିନ ତାଙ୍କର ସେଠାରୁ ଡିସଚାର୍ଜ ହେବାର ଥିଲା । ତେବେ ଉକ୍ତ ଦିନ ସକାଳେ ହଠାତ୍ ତାଙ୍କ ବେକରେ ଛୁରୀ ପଶି ଯାଇଥିବା ଜଣାପଡ଼ିଥିଲା । ସଂପୃକ୍ତ ଯୁବକ ଜଣକ ଛୁରୀରେ ଆତ୍ମହତ୍ୟା କରିବାକୁ ଚ୍ୟେଷ୍ଟା କରୁଥିବାବେଳେ ତାଙ୍କୁ ରୋକାଯାଇଥିଲା ଓ ବେକରେ ଛୁରୀ ଲାଗିଥିବା ଅବସ୍ଥାରେ ତାଙ୍କୁ ଏସସିବିକୁ ଅଣାଯାଇଥିବା କୋଭିଡ଼୍ କେୟାର ସେଣ୍ଟର ଦାୟିତ୍ୱରେ ଥିବା ଅଧିକାରୀ କହିଥିଲେ । ତେବେ ଅଧିକାରୀଙ୍କ ଏଭଳି ଉତ୍ତରରେ ସୁକୁମାରଙ୍କ ପରିବାର ଲୋକେ ସନୁଷ୍ଟ ନହୋଇ ଏହାର ସିସିଟିଭି ଫୁଟେଜ ଆଧାରରେ ଉପଯୁକ୍ତ ତଦନ୍ତ ଦାବି କରିବା ସହ ତାଙ୍କ ପୁଅକୁ କେହି ହତ୍ୟା ଉଦେ୍ଦଶ୍ୟରେ ଆକ୍ରମଣ କରିଥିବା ଭଳି ଅଭିଯୋଗ ଉଠାଇଛନ୍ତି । ତାଙ୍କ ପୁଅର ଆତ୍ମହତ୍ୟା କରିବା ଭଳି କୌଣସି କାରଣ ନଥିବା ପରିବାର ଲୋକେ ଦର୍ଶାଇବା ସହ ଏ ସଂକ୍ରାନ୍ତରେ ଟାଙ୍ଗୀଥାନାରେ ମଧ୍ୟ ଅଭିଯୋଗ କରିଛନ୍ତି ।
ଅନ୍ୟପକ୍ଷରେ ଡ୍ରିମସ କୋଭିଡ଼ କେୟାର ସେଣ୍ଟରରେ ଅବ୍ୟବସ୍ଥା ଲାଗି ରହୁଥିବା ନେଇ ଅନେକ ସମୟରେ ଅଭିଯୋଗ ହେଉଛି । କେଉଁ ପରିସ୍ଥିତିରେ ଓ କିପରି ସଂପୃକ୍ତ ଯୁବକଙ୍କ ବେକରେ ଛୁରୀ ପଶିଲା ତାହାକୁ ନେଇ ସନେ୍ଦହ ଓ ସଂଶୟ ଲାଗି ରହିଛି । ସେଣ୍ଟର ପକ୍ଷରୁ ସେ ଆତ୍ମହତ୍ୟା କରିବାକୁ ଉଦ୍ୟମ କରୁଥିଲା ବୋଲି କୁହାଯାଉଥିବା ବେଳେ ସେ କାହିଁକି ଆତ୍ମହତ୍ୟା ଉଦ୍ୟମ କଲେ ବୋଲି ପରିବାର ପକ୍ଷରୁ ପ୍ରଶ୍ନ କରାଯାଉଛି । ତାଙ୍କର ଚୌଦ୍ୱାର ମହାବିଦ୍ୟାଳୟ ସମ୍ମୁଖରେ ଏକ ବଡ଼ ଅଟୋମୋବାଇଲ ସ୍ପେୟାର ପାର୍ଟସ ଦୋକାନ ରହିଛି । ତେଣୁ ଆର୍ଥିକ ଅବସ୍ଥା ଖରାପ ନଥିବାବେଳେ ତାଙ୍କ ଉପରେ ସେଭଳି କୌଣସି ଚାପ ନଥିବା ପରିବାର ପକ୍ଷରୁ କୁହାଯାଇଛି । ତେବେ କୌଣସି କାରଣରୁ କେହି ତାଙ୍କୁ ଆକ୍ରମଣ କରିଥାଇ ପାରନ୍ତି ବୋଲି ପରିବାର ପକ୍ଷରୁ ଅଭିଯୋଗ କରାଯିବା ସହ ସେଣ୍ଟରର ସିସିଟିଭି ଫୁଟେଜ ଯାଞ୍ଚ କରାଯାଇ ପୁଙ୍ଖାନୁପୁଙ୍ଖ ତଦନ୍ତ କରାଯିବାକୁ ଦାବି କରାଯାଇଛି । ଏହି ଘଟଣା ପରେ ଡ୍ରିମସ କୋଭିଡ କେୟାର ସେଣ୍ଟର ଦାୟିତ୍ୱରେ ଥିବା ଡାକ୍ତରଙ୍କ ଠାରୁ ଏକ ପୁଙ୍ଖାନୁ ପୁଙ୍ଖ ରିପୋର୍ଟ ମଗାଯାଇଥିବା ଜିଲ୍ଲା କୋଭିଡ୍ ନୋଡ଼ାଲ ଅଧିକାରୀ ଡାକ୍ତର ଉମେଶ ରାୟ କହିଛନ୍ତି । ତେବେ ଏନେଇ ତଦନ୍ତ ଚାଲିଥିବା ଟାଙ୍ଗୀ ଥାନା ଅଧିକାରୀ ସୁଚିତ୍ରବିର‌୍ୟ୍ୟ ଦାସ କହିଛନ୍ତି । ସେ ପୁଣି କହିଛନ୍ତି ଯେ, କୋଭିଡ କେୟାର ସେଣ୍ଟରରେ ସିସିଟିଭି ନଥିବା ଯୋଗୁଁ ତଦନ୍ତରେ ସମସ୍ୟା ହେଉଛି । ତଥାପି କେୟାର ସେଣ୍ଟରରେ ରହିଥିବା ଅନ୍ୟ ଆକ୍ରାନ୍ତମାନଙ୍କୁ ମଧ୍ୟ ଏ ନେଇ ପଚରାଉଚରା ଚାଲିଛି । ସେ ଆତ୍ମହତ୍ୟା କରିଛନ୍ତି କି ତାଙ୍କୁ କେହି ଆକ୍ରମଣ କରିଛି ତାହା ତଦନ୍ତ ପରେ ଜଣାପଡ଼ିବ ।