ଜଗତସିଂହ ପୁରରେ ଚାଷୀ ପରିବାରକୁ ଭେଟିଲା କଂଗ୍ରେସ

କଟକ(ଏନ୍‌.ଏମ୍‌.) : ଗ୍ରାଉଣ୍ଡରେ କଂଗ୍ରେସ। ଅଦିନିଆ ବର୍ଷାରେ କ୍ଷତିଗ୍ରସ୍ତ ଚାଷୀଙ୍କ ପାଖରେ ଯାଇ ଛିଡ଼ା ହୋଇଛି ଦଳ। ବୁଝିଛି ବର୍ଷାରେ କ୍ଷତିଗ୍ରସ୍ତ ହୋଇଥିବା ଫସଲ କଥା। କେତେ ଚାଷ କରିଥିଲେ ଆଉ କେତେ କରିଥିଲେ ଖର୍ଚ୍ଚ। ଯାହାର ହିସାବ କରି ସରକାରଙ୍କ ଉପରେ ବର୍ଷିଛନ୍ତି ବରିଷ୍ଠ କଂଗ୍ରେସ ନେତା ମହମ୍ମଦ ମୋକିମ। ଏଭଳି ଘଟଣା ଦେଖିବାକୁ ମିଳିଛି ଜଗତସିଂପୁର ଜିଲ୍ଲା ସରୋନୋ ଗାଁରେ। କଂଗ୍ରେସ ପରିଚାଳନା କମିଟିର ସଂଯୋଜକ ଇଂ. ମହମ୍ମଦ ମୋକିମ ଦଳର ଅନ୍ୟାନ୍ୟ ବିଶିଷ୍ଟ ନେତାଙ୍କ ସହ ଜଗତସିଂପୁର ଗସ୍ତକରି ଭେଟିଥିଲେ ଅନେକ ଚାଷୀଙ୍କୁ। ଜିଲ୍ଲାର ସରୋନୋ ଗ୍ରାମ ପହଂଚି ଚାଷୀକୁ ଘରକୁ ମଧ୍ୟ ଯାଇଥିଲେ ଦଳୀୟ ଲୋକେ। ଚଳିତ ବର୍ଷ ଭଲ ଧାନ ହୋଇଥିଲା। ହେଲେ ପ୍ରବଳ ବର୍ଷାରେ ଧାନ ଫସଲ ନଷ୍ଟ ହୋଇଯାଇଛି। ଯାହାକୁ ସହି ନପାରି କୃଷକ ଜଣଙ୍କ କରିଥିଲେ ଆତ୍ମହତ୍ୟା। ଏଭଳି ସ୍ଥିତିରେ ମୃତକଙ୍କ ପରିବାରକୁ ଭେଟି ସାନ୍ତ୍ୱନା ଦେଇଥିଲେ କଂଗ୍ରେସର ନେତୃବୃନ୍ଦ। କଂଗ୍ରେସ ପକ୍ଷରୁ ସମ୍ପୃକ୍ତ ପରିବାରକୁ କିଛି ଆର୍ôଥକ ସହାୟତା ପ୍ରଦାନ କରାଯାଇଥିଲା। ସେମାନଙ୍କ ଆଗାମୀ ଦିନରେ ଅଧିକ ସହାୟତା ଯୋଗାଇ ଦେବାକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି ଇଂ. ମୋକିମ। ମୋକିମ କହିଛନ୍ତି ଚାଷୀ ଓ ଚାଷ ଉଭୟ ପରିପୂରକ। ଚାଷ ନରହିଲେ ଚାଷୀ ବଞ୍ଚିବା ଅସମ୍ଭବ। ସେହିପରି ଚାଷୀ ନ ବଞ୍ଚିଲେ ମଧ୍ୟବିତ ଶ୍ରେଣୀ ଓ ଧନୀକ ଶ୍ରେଣୀ ବହୁ ଅସୁବିଧାର ସମ୍ମୁଖିନ ହେବେ ବୋଲି ଉପସ୍ଥିତ ଥିବା ଦଳୀୟ ନେତାମାନେ କହିଛନ୍ତିି।