ଜଗତପୁର ବୈକୁଣ୍ଠ ବିହାର ପ୍ରତି ପ୍ରଶାସନିକ ଅବହେଳା : ହାତରୁ ବାଲି, ଗୋଡି ଓ ସିମେଣ୍ଟ କିଣି ରାସ୍ତା କାମ କଲେ କୋପନାଗୁଣୀ ଯୁବ ସଂଙ୍ଗଠନ
#ଜଗତପୁର(ଏନ୍.ଏମ୍.): କଟକ ମହାନଗର ନିଗମ ଅନ୍ତର୍ଗତ ୪୮ ନମ୍ବର ୱାର୍ଡ ବୈକୁଣ୍ଠ ବିହାର କେନାଲ ବନ୍ଧ ଗଡା ରାସ୍ତା ଦୀର୍ଘ ବର୍ଷ ଧରି କଦର୍ଯ୍ୟ ଅବସ୍ଥାରେ ପଡିରହିଥିବା ସତ୍ତ୍ୱେ ସିଏମସିର ଦୃଷ୍ଟି ନପଡ଼ିବା ଦୁର୍ଭାଗ୍ୟ ଜନକ ବୋଲି ଅଭିଯୋଗ ଉଠିଛି । ବର୍ଷ ବର୍ଷ ଧରି ପ୍ରଶାସନିକ ଅବହେଳାର ପ୍ରତିବାଦ କରି ଆଜି ସ୍ଥାନୀୟ କୋପନାଗୁଣୀ ଯୁବକ ସଂଗଠନ ପକ୍ଷରୁ ଏହି ବନ୍ଧ ଗଡା ରାସ୍ତାକୁ ଯୁବକମାନେ ନିଜ ତରଫରୁ ମରାମତି କରିଛନ୍ତି । ସାହିର ଯୁବକମାନେ ନିଜ ହାତରୁ ପଇସା ଖର୍ଚ୍ଚ କରି ସିମେଣ୍ଟ, ବାଲି ଓ ଗୋଡି କିଣି ଏହି କେନାଲ ବନ୍ଧ ରାସ୍ତା ମରାମତି କରିଛନ୍ତି । କଟକ ଅଞ୍ଚଳର ଅନ୍ୟ ସବୁ ୱାର୍ଡ ମାନଙ୍କରେ କେଉଁଠି କଂକ୍ରିଟ ରାସ୍ତା ତ ଆଉ କେଉଁଠି ଫେବର ବ୍ଲକ ରାସ୍ତା ନିର୍ମାଣ କରାଯାଉଛି । କିନ୍ତୁ ଏହି ବୈକୁଣ୍ଠ ବିହାର କୋପ ଅଞ୍ଚଳରେ ଫେବର ବ୍ଲକ ରାସ୍ତା ସାତ ସପନ ପାଲଟି ଯାଇଛି । ଏହି ଗ୍ରାମବାସୀମାନେ ଆଜି ପ୍ରର୍ଯ୍ୟନ୍ତ ରାସ୍ତା, ଡ୍ରେନ ଓ ପିଇବା ପାଣି ଭଳି ସମସ୍ତ ମୌଳିକ ସୁବିଧାରୁ ବଞ୍ଚିତ ରହିଛନ୍ତି । ଆଉ ରହିଲା ଡ୍ରେନ କଥା ଯେଉଁଠି ଆଜି ପର୍ଯ୍ୟନ୍ତ ରାସ୍ତା ଖଣ୍ଡେ ହୋଇପାରିଲା ନାହିଁ ସେଠାରେ ଡ୍ରେନେଜ କଥା କିଛି ନ କହିବା ଭଲ । ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ ଏହି ଅଞ୍ଚଳକୁ ଗତ ସାଧାରଣ ନିର୍ବାଚନ ସମୟରେ ଆସି ଭୋଟ ଭିକ୍ଷା କରିବା ନିମନ୍ତେ ସମସ୍ତ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେଇଥିଲେ । ଆଉ ବିଧାୟକ ଭାବେ ବିଜୟୀ ହେବା ପରେ ଜଗତପୁର ବୈକୁଣ୍ଠ ବିହାରରେ ତାଙ୍କ ପାଦ କେବେ ହେଲେ ପକାଇ ନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ଏହି ଅଞ୍ଚଳର ବାସିନ୍ଦା ରାଜସ୍ୱ ବାବଦ ରୋଡ ଟ୍ୟାକ୍ସ, ଜମିବାଡି ଖଜଣା ଠାରୁ ଆରମ୍ଭ କରି ସମସ୍ତ ପ୍ରକାର ଟ୍ୟାକ୍ସ ରାଜ୍ୟ ସରକାରଙ୍କୁ ଦେଉଥିଲେ ମଧ୍ୟ ସେମାନଙ୍କୁ ମୌଳିକ ସୁବିଧା ଯୋଗାଇ ଦିଆନଯିବା ଅପାରଗ ପ୍ରଶାସନ ବୋଲି ଚର୍ଚ୍ଚା ହେଉଛି । କେବଳ ନିର୍ବାଚନ ସର୍ବସ୍ୱ ନୀତିରେ ରାଜନେତାମାନେ କେବଳ ପ୍ରତିଶ୍ରୁତି ଦେଇ ନିର୍ବାଚନ ବୈତରଣୀ ପାର ହେବା ପରେ ସମସ୍ତ ପ୍ରତିଶ୍ରୁତି ତାଙ୍କ ପାଇଁ ପାଣିର ଗାର ସାବ୍ୟସ୍ତ ହେଉଥିବା ଅଞ୍ଚଳବାସୀ କହିଛନ୍ତି ।