ଛାତ୍ରୀଙ୍କୁ ଅସଦାଚରଣ କରି ଥିବା ଅଭିଯୋଗରେ ସହକାରୀ ଶିକ୍ଷକ ଗିରଫ

#ଭଦ୍ରକ (ଏନ୍‌.ଏମ୍‌.): ଗୁରୁ ଶିଷ୍ୟଙ୍କ ପବିତ୍ର ସମ୍ପର୍କ ମଧ୍ୟରେ ଏବେ ସୃଷ୍ଟି ହୋଇଛି ଅବିଶ୍ୱାସ । ଯାହାକୁ ନେଇ ଏବେ ଶିକ୍ଷକ ସମାଜ କଳଙ୍କିତ ହେବାରେ ଲାଗିଛି । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ବାସୁଦେବ ପୁର ବ୍ଲକ ଅଞ୍ଚଳରେ । ଗୋଟିଏ ପ୍ରାଥମିକ ବିଦ୍ୟାଳୟରେ ୫ମ ଶ୍ରେଣୀର ଛାତ୍ରୀଙ୍କୁ ଉକ୍ତ ସ୍କୁଲର ଜଣେ ଶିକ୍ଷକ ଅସଦାଚରଣ କରିଥିବା ଭଳି ସଙ୍ଗୀନ ଅଭିଯୋଗ ଆସିଛି । ତେବେ ଏ ନେଇ ସ୍ଥାନୀୟ ଥାନାରେ ଅଭିଯୋଗ ହେବାରୁ ସମ୍ପୃକ୍ତ ଶିକ୍ଷକଙ୍କୁ ପୁଲିସ ଗିରଫ କରି କୋର୍ଟ ଚାଲଣ କରିଥିବା ଜଣାପଡ଼ିଛି । ଅଭିଯୋଗ ଅନୁଯାୟୀ ଭଦ୍ରକ ଜିଲ୍ଲାର ବାସୁଦେବପୁର ବ୍ଲକର ବାଲିମୁଣ୍ଡା ପଞ୍ଚାୟତର ଛିପଆଡିଆ ସରକାରୀ ପ୍ରାଥମିକ ବିଦ୍ୟାଳୟରେ ଏଭଳି ଅଭାବନୀୟ ଘଟଣା ଘଟିଛି । ଏହି ବିଦ୍ୟାଳୟରେ ରହିଛି ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଥିବାବେଳେ ମୋଟ ୨୯ ଜଣ ଛାତ୍ରଛାତ୍ରୀ ଅଧ୍ୟୟନ କରନ୍ତି । ତେବେ ଉକ୍ତ ସ୍କୁଲରେ ୨ଜଣ ଶିକ୍ଷକ ଶିକ୍ଷାଦାନ କରନ୍ତି । ଗତ ମଙ୍ଗଳବାର ଦିନ ପ୍ରଧାନ ଶିକ୍ଷକ ଅନୁପସ୍ଥିତ ଥିବାବେଳେ ସହକାରୀ ଶିକ୍ଷକ ଏଭଳି ଅଭାବନୀୟ ଘଟଣା ଘଟାଇଥିବା ଅଭିଯୋଗ ହୋଇଛି । ଉକ୍ତ ସ୍କୁଲର ଜନୈକା ପଞ୍ଚମ ଶ୍ରେଣୀର ଛାତ୍ରୀଙ୍କୁ ପାଠ ପଢ଼ାଇଦେବାକୁ ଡାକି ଶିକ୍ଷକ ଜଣକ ଅସଦାଚରଣ ଆଚରଣ ପ୍ରଦର୍ଶନ କରିଥିଲେ । ତେବେ ଛାତ୍ରୀ ଜଣଙ୍କ ଶିକ୍ଷକଙ୍କ ଏଭଳି ଆଚରଣକୁ ଗ୍ରହଣ କରିପାରିନଥିଲା । ତେଣୁ ପରିବାର ଲୋକମାନଙ୍କ ଆଗରେ କହିବାରୁ ପରଦିନ ଉକ୍ତ ଛାତ୍ରୀଙ୍କ ବାପା ସ୍କୁଲ ପ୍ରଧାନ ଶିକ୍ଷକଙ୍କୁ ଏ ନେଇ ଜଣାଇଥିଲେ । ମାତ୍ର ଅଭିଯୁକ୍ତ ଶିକ୍ଷକ ସେଦିନ ଅନୁପସ୍ଥିତ ଥିବାରୁ ସେ ଆସିଲେ ବୁଝାଯିବ ବୋଲି କହି ପ୍ରଧାନ ଶିକ୍ଷକ ପୀଡ଼ିତା ଛାତ୍ରୀଙ୍କ ବାପାଙ୍କୁ ଫେରାଇ ଦେଇଥିଲେ । ପ୍ରଧାନ ଶିକ୍ଷକଙ୍କ ପାଖରୁ ନ୍ୟାୟ ନପାଇ ନିରାଶରେ ଫେରିଥିଲେ । ଏବଂ ସ୍ଥାନୀୟ ନାହାକାଣୀଡିହି ଥାନାରେ ଲିଖିତ ଅଭିଯୋଗ କରିଥିଲେ । ତେବେ ପୁଲିସ ଏଭଳି ସମ୍ବେଦନଶୀଳ ଘଟଣାକୁ ଗୁରୁତ୍ୱ ସହ ନେଇ ତଦନ୍ତ ଆରମ୍ଭ କରିଥିଲା । ତେବେ ଅଭିଯୋଗର ସତ୍ୟାସତ୍ୟ ସମ୍ପର୍କରେ ସୂଚନା ପାଇବା ପରେ ପୁଲିସ ଅଭିଯୁକ୍ତ ଶିକ୍ଷକଙ୍କୁ ଗିରଫ କରି କୋର୍ଟ ଚାଲଣ କରିଥିବା ଜଣାପଡ଼ିଛି । ଅଭିଯୁକ୍ତ ଶିକ୍ଷକ ଜଣକ ଅଜୟ କୁମାର ବେହେରା ବୋଲି ପୁଲିସ ସୂତ୍ରରୁ ପ୍ରକାଶ । ତେବେ ଏଭଳି ଘଟଣାକୁ ସାଧାରଣରେ ନିନ୍ଦା କରାଯିବା ସହ ଅଭିଯୁକ୍ତ ଶିକ୍ଷକ ଜଣକ ପାଇଁ ସମଗ୍ର ଶିକ୍ଷକମାନଙ୍କ ପ୍ରତି ଛାତ୍ରଛାତ୍ରୀଙ୍କ ଶ୍ରଦ୍ଧା, ଭକ୍ତି ଆଉ ପୂଜ୍ୟ ମନୋଭାବ ରହିବ ନାହିଁ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।