ଚୌଦ୍ୱାର ସ୍ଥିତ ସର୍ଭ୍ୟାଣ୍ଟସ ଅଫ ଇଣ୍ଡିଆ ସୋସାଇଟିର ଅନାଥ ଶିଶୁକନ୍ୟା ସାଇ ମିନାକ୍ଷୀର ନୂଆ ଠିକଣା ଜର୍ମାନୀ
#କଟକ (ଏନ୍.ଏମ୍.): ସରଭ୍ୟାଣ୍ଟସ ଅଫ ଇଣ୍ଡିଆ ସୋସାଇଟିର ଅନାଥ ଶିଶୁକନ୍ୟା ସାଇ ମିନାକ୍ଷୀର ନୂଆ ଠିକଣା ଜର୍ମାନୀର, ଲଣ୍ଡୌଏର ଷ୍ଟ୍ରାବେ-୧୦୦ । ସେ ପାଇଲା ପରିବାର, ଆବାସ,ପିତାମାତା ଓ ସବୁଠାରୁ ଗୁରୁତ୍ୱପୂର୍ଣ୍ଣ ପରିଚୟ ବୋଲି ଶିଶୁଟିକୁ ହସ୍ତାନ୍ତର ଅବସରରେ ଆଜି ପୂର୍ବାହ୍ନରେ ଜିଲ୍ଲାପାଳ ଡଃ.ଭବାନୀ ଶଙ୍କର ଚୟନୀ ଭାବପ୍ରବଣ ହୋଇ ପ୍ରକାଶ କରିଛନ୍ତି । ଜର୍ମାନୀର, ଲଣ୍ଡୌଏର ଷ୍ଟ୍ରାବେ-୧୦୦ ଦମ୍ପତ୍ତି ସର୍ଭାନନ ସର୍ଭାରନ ଥାଙ୍ଗାଭେଲ ଏବଂ ତାଙ୍କ ପତ୍ନୀ ସୁଭାସିନୀ ମୁନିଆ ସାମୀ ସାଇ ମିନାକ୍ଷୀକୁ ପୋଷ୍ୟ ସନ୍ତାନ ରୂପେ ଗ୍ରହଣ କରିଥିବା ଜଣାଯାଇଛି । ୨୦୨୨ ଜୁନ ୮ତାରିଖରେ ଜନ୍ମଗ୍ରହଣ କରିଥିବା ଶିଶୁକନ୍ୟାକୁ ଜିଲ୍ଲା ଶିଶୁ କଲ୍ୟାଣ ସମିତି କଟକ, ସର୍ଭ୍ୟାଣ୍ଟସ ଅଫ ଇଣ୍ଡିଆ ସୋସାଇଟିକୁ ଜୁଲାଇ ୧୨ତାରିଖରେ ହସ୍ତାନ୍ତର କରିଥିଲେ । ଉକ୍ତ ଶିଶୁକନ୍ୟାକୁ ୨୦୨୨ ଅକ୍ଟୋବର ୨୬ତାରିଖରେ ପୋଷ୍ୟସନ୍ତାନ ରୂପେ ଗ୍ରହଣ କରିବା ପାଇଁ ଜିଲ୍ଲା ଶିଶୁ କଲ୍ୟାଣ ସମିତି, କଟକ ଅନୁମତି ପ୍ରଦାନ କରିଥିଲେ । ଏହାପରେ କେନ୍ଦ୍ରୀୟ ପୋଷ୍ୟସନ୍ତାନ ସଂସାଧନ ସଂସ୍ଥା ଚଳିତ ବର୍ଷ ଜାନୁଆରୀ ୨ତାରିଖରେ ବିନା ଆପତ୍ତିରେ ଜର୍ମାନୀର ଦମ୍ପତିଙ୍କୁ ଶିଶୁକନ୍ୟାକୁ ପୋଷ୍ୟ ସନ୍ତାନ ରୂପେ ଗ୍ରହଣ କରିବା ନିମନ୍ତେ ଅନୁମତି ପ୍ରଦାନ କରିଥିଲେ ।
ପ୍ରକାଶଥାଉକି ସାଇମିନାକ୍ଷୀର ବର୍ତ୍ତମାନର ପିତା ପେଷାରେ ଜଣେ ବ୍ୟବସାୟୀ ଓ ମାତା ପେଷାରେ ସୂଚନା ଓ ପ୍ରଯୁକ୍ତି ବିଦ୍ୟା କ୍ଷେତ୍ରରେ ପରାମର୍ଶଦାତା ଭାବେ କାର୍ଯ୍ୟରତ ବୋଲି ଜଣାଯାଇଛି । ଇତି ମଧ୍ୟରେ ସାଇ ମିନାକ୍ଷୀର ପାସପୋର୍ଟ ଭୁବନେଶ୍ୱର ପାସପୋର୍ଟ କାର୍ଯ୍ୟାଳୟକୁ ଆବେଦନ କରାଯାଇଥିବା ବେଳେ ଶିଶୁକନ୍ୟାଟିର ଭିସା ଉପଲବ୍ଧ କରିବା ପାଇଁ ଦିଲ୍ଲୀରେ ପ୍ରକ୍ରିୟା ଜାରି ରହିଛି । ନିଜ ପ୍ରତିକ୍ରିୟାରେ ଥାଙ୍ଗାଭେଲ ଦମ୍ପତି ପ୍ରତିକ୍ରିୟା ପ୍ରକାଶକରି କହିଛନ୍ତି ଯେ, ସାଇ ମିନାକ୍ଷୀ ସର୍ଭାନନ ସେମାନଙ୍କୁ ଖୁବ ଭଲ ପାଉଛି ଏବଂ ସେମାନେ ମଧ୍ୟ ସାଇମିନାକ୍ଷୀଙ୍କୁ ତତୋଧିକ ଭଲ ପାଉଛନ୍ତି । ଜିଲ୍ଲାପାଳଙ୍କୁ ଗଭୀର କୃତଜ୍ଞତା ଜଣାଇ ସାଇ ମିନାକ୍ଷୀର ନୂତନ ଜୀବନ ଯାତ୍ରାରେ ଜିଲ୍ଲାପାଳଙ୍କ ସହଯୋଗ ଓ ଆଶୀର୍ବାଦ ଏକ ନୂତନ ପ୍ରେରଣା ବୋଲି କହିଛନ୍ତି । ସାଇମିନାକ୍ଷୀଙ୍କୁ ଏକ ନୂତନ ଜୀବନ ଓ ଦିଗ୍ଦର୍ଶନ ପ୍ରଦାନ ନିମନ୍ତେ କଟକ ଜିଲ୍ଲା ଶିଶୁ ମଙ୍ଗଳ କମିଟିର ଅଧ୍ୟକ୍ଷ ଓ ସଭ୍ୟ-ସଭ୍ୟା,ଜିଲ୍ଲା ଶିଶୁ ସୁରକ୍ଷା ଅଧିକାରୀ ପ୍ରଗତୀ ମହାନ୍ତି, ସିଏଆରଏର ସମସ୍ତ କର୍ମଚାରୀ, ଜିଲ୍ଲାକୋର୍ଟ, ପାସପୋର୍ଟ ଅଧିକାରୀ ଭୁବନେଶ୍ୱରଙ୍କ ସମେତ ପୋଷ୍ୟସନ୍ତାନ ଗ୍ରହଣ ନିମନ୍ତେ ଦୀର୍ଘଯାତ୍ରାରେ ଅତ୍ୟନ୍ତ ସହଯୋଗ କରୁଥିବା, ତାଙ୍କୁ ଅଭିଭୂତ କରିଛି ବୋଲି ପ୍ରକାଶ କରିଛନ୍ତି । ଜିଲ୍ଲାପାଳଙ୍କ କାର୍ଯ୍ୟାଳୟ କକ୍ଷରେ ଅନୁଷ୍ଠିତ ଶିଶୁହସ୍ତାନ୍ତର କାର୍ଯ୍ୟକ୍ରମରେ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀଲଲାଟେନ୍ଦୁ ମହାପାତ୍ର ଉପସ୍ଥିତ ଥିଲେ ।
