Smruti Ranjan Tripathy (Choudwar)

ଚୌଦ୍ୱାର ଡିହସାହି କାର୍ତ୍ତିକେଶ୍ୱର ମେଢ଼ ଯାତ୍ରା ନେଇ ପ୍ରସ୍ତୁତି ବୈଠକ

Smruti Ranjan Tripathy (Choudwar)

#ଚୌଦ୍ୱାର(ଏନ୍‌.ଏମ୍‌.): ଟାଙ୍ଗୀ-ଚୌଦ୍ୱାର ବ୍ଳକ କୟଳପଡ଼ା ପଞ୍ଚାୟତ ଡିହସାହି ଗ୍ରାମରେ କାର୍ତ୍ତିକେଶ୍ୱର ମେଢ଼ ଯାତ୍ରା ନିମନ୍ତେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ସ୍ଥାନୀୟ ନୂଆ ପାଟଣା ସ୍ଥିତ ଡାକବଙ୍ଗଳା ଠାରେ ଯାତ୍ରା କମିଟି ପକ୍ଷରୁ ଆୟୋଜିତ ଏହି ବୈଠକରେ ଚଳିତ ବର୍ଷ କିଭଳି ମେଳଣ ଉତ୍ସବ ଶାନ୍ତିଶୃଙ୍ଖଳାର ସହ ପାଳନ ହେବ ସେ ନେଇ ବିସ୍ତୃତ ଆଲୋଚନା କରାଯାଇଥିଲା । ଏହି ଯାତ୍ରାରେ ଅଞ୍ଚଳର ବିଭିନ୍ନ ମଣ୍ଡପରେ ନିର୍ମିତ ହରପାର୍ବତୀଙ୍କ ସମେତ କାର୍ତ୍ତିକେଶ୍ୱର ଅନ୍ୟ ଦେବଦେବୀଙ୍କ ମୃଣ୍ମୟୀ ମୂର୍ତ୍ତିକୁ ନେଇ ମେଳଣ ଓ ଭସାଣି ହୋଇଥାଏ । କମିଟିର ମୁଖ୍ୟ ଉପଦେଷ୍ଟା ତଥା ପୂର୍ବତନ ଜିଲ୍ଲା ପରିଷଦ ସଦସ୍ୟ ଶ୍ରୀଧର ରାଉଳଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ମୁଖ୍ୟଅତିଥି ଭାବେ ଚୌଦ୍ୱାର ଥାନା ଅଧିକାରୀ ସସ୍ମିତା ଖିଲାର ଯୋଗ ଦେଇଥିଲେ । ସମ୍ପାଦକ ନରେଶ ମହାରଣା ସ୍ୱାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ । ଯାତ୍ରା କମିଟି ସଭାପତି ମନମୋହନ ପରିଡ଼ା ଯୋଗ ଦେଇ ଚଳିତ ଡିସେମ୍ବର ୨୩ ଓ ୨୪ ତାରିଖ ଦୁଇ ଦିନଧରି ଏହି ମେଳଣ ହେବା ସମ୍ପର୍କରେ ବୈଠକରେ ସୂଚନା ଦେଇଥିଲେ । ଚଳିତ ବର୍ଷ ଏହି ଯାତ୍ରାରେ ନୂତନ ୨ଖଣ୍ଡ ମେଢ଼ ସାମିଲ ହେଉଥିବା ସଭାପତି ଶ୍ରୀ ପରିଡ଼ା କହିଥିଲେ । ଆସନ୍ତା ବର୍ଷ ଠାରୁ ବିଧିବଦ୍ଧ ଭାବେ ପ୍ରଥମାଷ୍ଟମୀ ଅବସରରେ ଭସାଣୀ ଯାତ୍ରା ଭାବେ ପାଳନ ହେବା ନିମନ୍ତେ ଉକ୍ତ ବୈଠକରେ ସର୍ବସମତି କ୍ରମେ ଘୋଷଣା କରାଯାଇଛି । ଏହି ମେଳଣରେ ଉପରସାହି, ମଠସାହି, ଭୁଆସୁଣୀ ଛକ, ନୂଆସାହି, ମଳିକ ସାହି, ମଙ୍ଗଳା ସାହି, ମା’ ମଙ୍ଗଳା ସାହି, ପୁଜାରୀ ସାହି(ଥାନପତି), ଚୌଧୁରି ସାହି, ମଲ୍ଲିକ ସାହି, ଛକ ସାହି, ଦଧିବାବନ ସାହି, ପାଟଣା ସାହି, ହରିଜନ ସାହି ପ୍ରମୁଖ ସାହିରୁ ୧୪ଖଣ୍ଡ ମେଢ଼କୁ ନେଇ ଏହି ଯାତ୍ରା ଅନୁଷ୍ଠିତ ହେବାକୁ ଯାଉଛି । ପ୍ରଥମ ଦିନ ମେଢ଼ଗୁଡ଼ିକ ନିଜ ନିଜ ଆସ୍ଥାନରୁ ବାହାରି ଶୋଭାଯାତ୍ରାରେ ପଡ଼ିଆରେ ଏକତ୍ରିତ ହେବେ, ତା’ପର ଦିନ ସମୟ ନିର୍ଘଣ୍ଟ ଏବଂ ନମ୍ବର ଅନୁଯାଇ ଶନି ମନ୍ଦିର ସ୍ଥିତ ନଦୀ କୂଳ ଠାରେ ନିର୍ମିତ ଅସ୍ଥାୟୀ ପୋଖରୀରେ ବିସର୍ଜନ ନିମନ୍ତେ ଶୋଭାଯାତ୍ରାରେ ବାହାରିବେ । ତେବେ ଏହି ଦୁଇ ଦିନରେ କିଭଳି ଶାନ୍ତି ଶୃଙ୍ଖଳା ରକ୍ଷା କରାଯିବ ସେ ନେଇ ଚୌଦ୍ୱାର ପୁଲିସ ପକ୍ଷରୁ ସ୍ୱତନ୍ତ୍ର ନିୟମ ଲାଗୁ କରାଯାଇଛି । ନିୟମାନୁଯାୟୀ ଭସାଣି ପୂର୍ବରୁ ଲାଇସେନ୍ସ ନିମନ୍ତେ ଆବେଦନ କରିବା, ୬ଟି ସ୍ପିକର ସହ ୬୫ ଡେସିମିଲ କ୍ଷମତାରେ ସାଉଣ୍ଡ ବଜାଇବା, ଡିଜେ ଉପରେ ରୋକ ଲଗାଇବା, ରାତି ୧୦ଟା ସୁଦ୍ଧା ସମସ୍ତ ମେଢ଼ ବିସର୍ଜନ ହେବା, ବାଣ ନଫୁଟାଇବା, ଟ୍ରାଫିକ ସମସ୍ୟା ନହେବା ନିମନ୍ତେ ଯାତ୍ରା କମିଟି ଓ ଶାନ୍ତି କମିଟି ତରୁଫରୁ ନିୟୋଜିତ ସମସ୍ତ ଭଲ୍ୟୁଣ୍ଟରମାନଙ୍କ ସହଯୋଗ କାମନା କରାଯାଇଥିଲା । ନିଶାମୁକ୍ତ ଯାତ୍ରା ହେବା ପାଇଁ ଚୌଦ୍ୱାର ପୁଲିସ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ଏହି ବୈଠକରେ ସମସ୍ତ ପୂଜାମଣ୍ଡପ କର୍ମକର୍ତ୍ତାଙ୍କ ସମେତ ସାହି ମୁରବୀ, ବୁଦ୍ଧିଜୀବୀ, ଯାତ୍ରା କମିଟି ଏବଂ ଶାନ୍ତିକମିଟିର କର୍ମକର୍ତ୍ତା ଉପସ୍ଥିତଥିଲେ । ଟିପିଏମ୍ ଫାଣ୍ଡି ଅଧିକାରୀ ମାନସ ରଞ୍ଜନ ମହାରଣା ସଭା ପରିଚାଳନା କରିଥିଲେ ।

By admin

Leave a Reply

Your email address will not be published. Required fields are marked *