ଚୌଦ୍ୱାର କଲେଜରେ ସମନ୍ୱିତ ଯୁବ ବିକାଶ ଓ ନୂଆ-ଓ କାର୍ଯ୍ୟକ୍ରମ
#ଚୌଦ୍ୱାର(ଏନ୍.ଏମ୍.): ଚୌଦ୍ୱାର କଲେଜରେ ଆଜି ସମନ୍ୱିତ ଯୁବ ବିକାଶ କାର୍ଯ୍ୟକ୍ରମ ସହିତ ଯୁବ ଓଡିଶା ନବୀନ ଓଡିଶା କାର୍ଯ୍ୟକ୍ରମର ଉଦ୍ଯାପନୀ ଉତ୍ସବ ଅନୁଷ୍ଠିତ ହୋଇ ଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଓଡ଼ିଆ ସିନେ ଅଭିନେତ୍ରୀ ସୁପ୍ରିୟା ନାୟକ ଏବଂ ମୁଖ୍ୟବକ୍ତା ଭାବେ ବିଶିଷ୍ଟ ସାହିତ୍ୟିକ ସମ୍ପାଦକ ବିଜୟ ମଲ୍ଲ ଯୋଗ ଦେଇଥିଲେ । ଏହି ଅବସରରେ ପ୍ରାରମ୍ଭରୁ କଲେଜ ପିଲାମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମରେ ଆଧୁନିକ ଗୀତର ତାଳେ ତାଳେ ପରିବେଷିତ ନୃତ୍ୟରେ ଉଛୁଳି ପଡ଼ିଥିଲା କଲେଜ ପରିସର । କଲେଜର ପ୍ରଫେସର ପ୍ରଫୁଲ୍ଲ ସାହୁଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଅନ୍ୟପକ୍ଷରେ ଅଭିନେତ୍ରୀ ସୁପ୍ରିୟା ନିଜ ଭାଷଣ ମାଧ୍ୟମରେ ଛାତ୍ର ଛାତ୍ରୀମାନଙ୍କର ମନୋରଞ୍ଜନ କରିଥିଲେ । ମୁଖ୍ୟବକ୍ତା ଶ୍ରୀ ମଲ୍ଲ ପିଲାମାନେ କିପରି ଭାବେ ନିଜର ଭବିଷ୍ୟତକୁ ନିଜେ ଗଢିବେ ଏବଂ ପ୍ରତ୍ୟେକ ଜଣେ ଜଣେ ଭଲ ମଣିଷଟିଏ ହେବେ ତାହା ଉପରେ ବିସ୍ତୃତ ଭାବେ ବୁଝାଇଥିଲେ । ଏଥିସହିତ କଲେଜରେ ହୋଇଥିବା ବାର୍ଷିକ ସାଂସ୍କୃତିକ ପ୍ରତିଯୋଗିତାରେ କୃତକାର୍ଯ୍ୟ ହୋଇଥିବା ଛାତ୍ରୀମାନଙ୍କୁ ଅତିଥିମାନଙ୍କ ଦ୍ୱାରା ପୁରସ୍କାର ବିତରଣ କରାଯାଇଥିଲା । ଏହି ଉତ୍ସବରେ ଅନ୍ୟମାନଙ୍କ ମଧ୍ୟରେ ପଶୁପତି ଆଗ୍ରୋର ଆଇନଜୀବୀ ଓ ଅବସରପ୍ରାପ୍ତ କ୍ୟାପଟେନ ନିର୍ମଳ କୁମାର ରାଉତ, କେନ୍ଦ୍ରୀୟ ସାହିତ୍ୟ ଏକାଡେମୀର ମୁଖପାତ୍ର ପ୍ରକାଶ ମହାପାତ୍ର, ନୂଆ-ଓ’ର ନୋଡାଲ ଅଫିସର ସଞ୍ଜୟ କୁମାର ଧଳ, ବିଧାୟକଙ୍କ ପ୍ରତିନିଧି ବିଷ୍ଣୁଚରଣ ପରିଡା, ଉପାଧ୍ୟକ୍ଷ ଶୁଭେନ୍ଦୁ ସାମଲ, ସୁବ୍ରତ ସାମଲ, ୱାର୍ଡର କାଉନସିଲର ଆଶୁତୋଷ ଦାସ, କଲେଜର ପ୍ରିନ୍ସପାଲ ଉମେଶ ଚନ୍ଦ୍ର ଦେବତାଙ୍କ ସମେତ ବହୁ ବିଜେଡି କର୍ମୀ ଓ କଲେଜର ସମସ୍ତ ଛାତ୍ରଛାତ୍ରୀମାନେ ଉପସ୍ଥିତ ଥିଲେ ।