ଚୌଦ୍ୱାର ଅଞ୍ଚଳରେ ଝାଡ଼ାବାନ୍ତି ନେଇ ପଦକ୍ଷେପ ଶୂନ
ଚିଠି ଓ ଆଲୋଚନାରେ ଚାଲିଛି ନିରାକରଣ

ଚୌଦ୍ୱାର (ଏନ୍‌.ଏମ୍‌.): କଟକ ପରେ ଏବେ ଟାଙ୍ଗୀ-ଚୌଦ୍ୱାର ବ୍ଲକ ଅଞ୍ଚଳରେ ଏବେ ଝାଡ଼ାବାନ୍ତି ବ୍ୟାପୁଥିବା ଦେଖିବାକୁ ମିଳିଛି। ଯେଉଁ ଅଞ୍ଚଳରେ ଝାଡ଼ାବାନ୍ତି ହେଉଛି କେବଳ ସେହି ଅଞ୍ଚଳରେ ପ୍ରଶାସନ ବୁଲି ଏହାର ନିରାକରଣ ନିମନ୍ତେ ପରାମର୍ଶ ଦେବା ବାହାଘର ବେଳେ ବାଇଗଣ ରୁଆ ବୋଲି ଚର୍ଚ୍ଚା ହେଉଛି। ଏହି ସଂକ୍ରାମକ ରୋଗ ବ୍ୟାପିବା ପୂର୍ବରୁ କୌଣସି ପଦକ୍ଷେପ ନେବାକୁ ସତେ ଯେମିତି ଭୁଲି ଯାଇଛି ପ୍ରଶାସନ। ବିଶେଷ କରି ଚୌଦ୍ୱାର ପୌରାଞ୍ଚଳର ବିଭିନ୍ନ ୱାର୍ଡ଼ରେ ଝାଡ଼ାବାନ୍ତି ରୋଗ ବ୍ୟାପୁଥିଲେ ମଧ୍ୟ ନିଘୋଡ଼ ନିଦରେ ଶୋଇଛି ପୌରପାଳିକା। ଏଥି ପାଇଁ ନା ପୌର ଅଧିକାରୀ ନାଁ ପାରିଷଦ କାହାରି ତତ୍ପରତା ଦେଖିବାକୁ ମିଳୁନାହିଁ। ଏପରିକି ଏ ସଂକ୍ରାନ୍ତରେ ଗଣମାଧ୍ୟମ ପ୍ରତିନିଧି ପ୍ରଶ୍ନ କରିବାବେଳେ ପୌରାଧ୍ୟକ୍ଷା ଏବଂ ଉପାଧ୍ୟକ୍ଷା ମଧ୍ୟ ବିଭିନ୍ନ ଆଳ ଦେଖାଇ ଏଡାଇଯିବା ଅଞ୍ଚଳବାସୀଙ୍କୁ ହତାସ କରିଛି। ଏଭଳିକି ପୌର ନିର୍ବାହୀ ଅଧିକାରୀଙ୍କୁ ପଚାରିବାରେ ସେ କୁଆଡେ ଜିଲ୍ଲା ପ୍ରଶାସନକୁ ଚିଠି ଲେଖି ଜନସ୍ୱାସ୍ଥ୍ୟ ବିଭାଗ, ସଫେଇ ବିଭାଗର ଅଧିକାରୀଙ୍କ ସହ ଆଲୋଚନା କରିଛନ୍ତି। ଯଦି କାଗଜପତ୍ର ଆଉ ଆଲୋଚନା ମାଧ୍ୟମରେ ସବୁ ସମସ୍ୟାର ସମାଧାନ ହୋଇ ପାରନ୍ତା ତେବେ ଏଥିପାଇଁ ରାଜସ୍ୱ କାହିଁକି ଖର୍ଚ୍ଚ ହେଉଛି ବୋଲି ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି। ଚୌଦ୍ୱାର ଭଳି ଗୋଟିଏ ସମ୍ବେଦନ ଶୀଳ ଅଞ୍ଚଳରେ ଆବର୍ଜନା ପରିଚାଳନା ସମ୍ପୂର୍ଣ୍ଣ ବିଫଳ ହୋଇଥିବାବେଳେ ପାନୀୟଜଳ ଯୋଗାଣ ମଧ୍ୟ ଠିକ ଭାବେ ହେଉନାହିଁ। ସରକାର ଡ୍ରିଙ୍କ ଫ୍ରମ ଟ୍ୟାପ ଯୋଜନା ନିମନ୍ତେ ଲକ୍ଷାଧିକ ଟଙ୍କା ବ୍ୟୟ କରି ଜନସାଧାରଣଙ୍କୁ ଶୁଦ୍ଧ ପାନୀୟଜଳ ଯୋଗାଇବା ନିମନ୍ତେ ବ୍ୟବସ୍ଥା କରିଥିଲେ ମଧ୍ୟ ଚୌଦ୍ୱାର ଅଞ୍ଚଳରେ ଜନସାଧାରଣଙ୍କୁ ଶୁଦ୍ଧ ପାନୀୟଜଳ ବୁନ୍ଦାଏ ପାଇବା ସାତ ସପନ ହୋଇଛି। ଝାଡ଼ାବାନ୍ତି ଭଳି ପ୍ରାଣଘାତୀ ସଂକ୍ରାମକ ରୋଗ ନିରାକଣ ପାଇଁ ଚୌଦ୍ୱାର ପୌରପାଳିକା ଆଖିଦୃଶିଆ ପଦକ୍ଷେପ ନନେବା, ଅଞ୍ଚଳରେ ବହୁ ବ୍ୟବସାୟୀ ଅସ୍ୱାସ୍ଥ୍ୟକର ପରିବେଶରେ ଖାଦ୍ୟ ପ୍ରସ୍ତୁତି ଓ ବିକ୍ରୟ କରୁଥିଲେ ମଧ୍ୟ ଯାଞ୍ଚ କରାନଯିବା, ବିଭିନ୍ନ ୱାର୍ଡ଼ରେ ଏସବୁ ସମସ୍ୟା ଥିଲେ ମଧ୍ୟ ସ୍ଥାନୀୟ ଲୋକପ୍ରତିନିଧି ଜାଣି ଅଜଣା ରହିବା ପଛରେ କି ଉଦ୍ଦେଶ୍ୟ ରହିଛି ତାହା ଚୌଦ୍ୱାରବାସୀଙ୍କୁ ଚକିତ କରିଛି।