ଚରିତ୍ରକୁ ସନ୍ଦେହ କରି ସ୍ତ୍ରୀକୁ ଖଣ୍ଡାରେ ହାଣିଲା ସ୍ୱାମୀ
ନୟାଗଡ଼(ଏନ୍.ଏମ୍.): ଚରିତ୍ରକୁ ସନ୍ଦେହ କରି ଖଣ୍ଡାରେ ପତ୍ନୀକୁ ଆକ୍ରମଣ କରିବା ଘଟଣା ସମଗ୍ର ନୟାଗଡ଼ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଏହି ଆକ୍ରମଣରେ ବୋହୁ ଓ ଶାଶୁ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଉଭୟଙ୍କ ଅବସ୍ଥା ଶଙ୍କଟାପନ୍ନ ରହିଛି । ତେବେ ପୁଲିସ ସ୍ୱାମୀ ଶତ୍ରୁଘ୍ନ ପ୍ରଧାନକୁ ଅଟକ ରଖି ପଚରାଉଚରା ଚଳାଇଛି । ଅଭିଯୋଗ ଅନୁଯାୟୀ, ଚରିତ୍ରକୁ ସନ୍ଦେହ କରି ଜଣେ ବ୍ୟକ୍ତି ନିଜ ସ୍ତ୍ରୀକୁ ଖଣ୍ଡାରେ ଆକ୍ରମଣ କରିଛି । ଆକ୍ରମଣ ବେଳେ ବୋହୂକୁ ରକ୍ଷା କରିବାକୁ ଯାଇ ଶାଶୁ ମଧ୍ୟ ଖଣ୍ଡା ଚୋଟ ଖାଇଥିବା ଜଣାପଡ଼ିଛି । ଏପରି ଘଟଣା ଘଟିଛି ନାୟଗଡ଼ ଜିଲ୍ଲା ଦଶପଲ୍ଲା ଥାନା ଅନ୍ତର୍ଗତ ତିଳାବାଡ଼ି ଗାଁରେ । ବୋହୂ ପ୍ରମିଳା ପ୍ରଧାନ ଓ ଶାଶୁ ରଜନୀ ପ୍ରଧାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି । ପୁଲିସ ସ୍ୱାମୀ ଶତ୍ରୁଘ୍ନ ପ୍ରଧାନକୁ ଅଟକ ରଖିଛି । ଶତ୍ରୁଘ୍ନ ନିଜ ସ୍ତ୍ରୀର ଚରିତ୍ରକୁ ସନ୍ଦେହ କରୁଥିଲେ । ଆଜି ସକାଳେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଶତ୍ରୁଘ୍ନ ଉତ୍କ୍ଷିପ୍ତ ହୋଇ ଘରୁ ଖଣ୍ଡା ଆଣି ନିଜ ସ୍ତ୍ରୀକୁ ଆକ୍ରମଣ କରିଥିଲେ । ପ୍ରମିଳା ଦୌଡ଼ି ପଳାଇବାରୁ ଗୋଡ଼େଇ ଗୋଡ଼େଇ ଆକ୍ରମଣ କରିଥିଲେ । ଶାଶୁ ଦୌଡ଼ି ଆସି ବୋହୂକୁ ରକ୍ଷା କରିବାରୁ ଶତ୍ରୁଘ୍ନ ମଧ୍ୟ ତାଙ୍କୁ ଆକ୍ରମଣ କରିଥିଲେ । ଗ୍ରାମବାସୀ ଉଭୟଙ୍କୁ ଗୁରୁତର ଭାବେ ଉଦ୍ଧାର କରି ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ହେଲେ ଅବସ୍ଥା ଗୁରୁତର ହେବାରୁ ସେମାନଙ୍କୁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ପୁଲିସ ଶତ୍ରୁଘ୍ନଙ୍କୁ ଅଟକ ରଖିବା ସହ ଧାରୁଆ ଖଣ୍ଡାକୁ ଜବତ କରିଛି । ତେବେ ଅଭିଯୁକ୍ତ ଶତ୍ରୁଘ୍ନର ଏଭଳି କାଣ୍ଡକୁ ସାଧାରଣରେ ନିନ୍ଦା କରାଯାଇଛି ।