ଗୋପବନ୍ଧୁ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟରେ ମାସିକ ଋତୁସ୍ରାବ ସ୍ୱଚ୍ଛତା ନିମନ୍ତେ ସଚେତନତା
#ଆଠଗଡ଼ (ଏନ୍.ଏମ୍.): ଗୋପବନ୍ଧୁ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟର ଯୁବ ରେଡକ୍ରସ ଆନୁକୁଲ୍ୟରେ ମାସିକ ଋତୁସ୍ରାବ ସ୍ୱଚ୍ଛତା ନିମନ୍ତେ ଏକ ସ୍ୱତନ୍ତ୍ର ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଯୁବ ରେଡକ୍ରସ ଉପଦେଷ୍ଟା ପୁଷ୍ପମଞ୍ଜରୀ ଦାସଙ୍କ ପୌରୋହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ସମନ୍ୱିତ ଶିଶୁ ବିକାଶ ଅଧିକାରିଣୀ ନିବେଦିତା ରାୟ ଯୋଗଦେଇ ମାସିକ ଋତୁସ୍ରାବ ସ୍ୱଚ୍ଛତା ସମ୍ପର୍କରେ ଛାତ୍ରମାନଙ୍କୁ ବହୁ ଉପାଦେୟ ପରାମର୍ଶ ଦେଇଥିଲେ । ଗୋପବନ୍ଧୁ ମହିଳା ମହାବିଦ୍ୟାଳୟର ଅଧ୍ୟକ୍ଷା ସଂଯୁକ୍ତା ମହାପାତ୍ର, ପରିଦର୍ଶିକା ଭାଗ୍ୟଲତା ସେଠୀ, ଅଙ୍ଗନବାଡି କର୍ମୀ ଅର୍ମିତା ନିଶାଙ୍କ ପ୍ରମୁଖ ସହଯୋଗ କରିଥିଲେ । ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଯୋରନ୍ଦା ସେକ୍ଟରର ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ୍ ଅସ୍ଲମ୍ କାର୍ଯ୍ୟକ୍ରମ ପରିଚାଳନା କରିଥିଲେ । ଉକ୍ତ ମହିଳା ଉଚ୍ଚମାଧ୍ୟମିକ ବିଦ୍ୟାଳୟର ସମସ୍ତ ବିଦ୍ୟାର୍ଥୀମାନଙ୍କୁ ନିଶୁଳ୍କ ସାନିଟାରୀ ନାପ୍କିନ୍ (ଖୁସି) ପ୍ରଦାନ କରାଯାଇଥିଲା । ଝିଅମାନେ ୧୧-୧୩ବର୍ଷ ବୟସରେ ପ୍ରାୟତଃ ନୂଆ କରି ଋତୁସ୍ରାବ ଲାଭ ପ୍ରାପ୍ତି କରିଥାନ୍ତି । ଏଣୁ ଏହି ସମୟରେ ସେମାନଙ୍କର ମାନସିକ, ଶାରୀରିକ ଅଭିବୃଦ୍ଧି ଓ ସ୍ୱଭାବରେ ପରିବର୍ତ୍ତନ ଘଟିଥାଏ । ସେମାନଙ୍କର ଏହି ସମୟରେ ଋତୁସ୍ରାବ ସଂକ୍ରାନ୍ତୀୟ ସ୍ୱଚ୍ଛତା, ପ୍ୟାଡର ବ୍ୟବହାର ଓ ପରିଚାଳନା ଦେଖାଯାଉଥିବା ସମସ୍ୟା ଯଥା ତଳିପେଟରେ ଯନ୍ତ୍ରଣା ଅନିୟମିତତା, ଅତ୍ୟଧିକ ସ୍ରାବ, ଋତୁରୋଧ, ଦୁର୍ବଳତା, ରକ୍ତହୀନତା, ପୁଷ୍ଟିହୀନତା, କୃମି ସମସ୍ୟା ଓ ମାନସିକ ସମ୍ବନ୍ଧୀୟ ବିରକ୍ତି ଭାବ, ଲାଜ କରିବା ଇତ୍ୟାଦି ସଚେତନ କରାଯାଇଥିଲା । ସାଧାରଣତଃ ଋତୁଚକ୍ର ୨୮ଦିନ ବ୍ୟବଧାନରେ ୫ଦିନ ବ୍ୟାପୀ ହୋଇଥାଏ । ଋତୁୁସ୍ରାବ ସମୟରେ ସାଧାରଣ ପରିଚ୍ଛନ୍ନତା ସମ୍ପର୍କରେ ସଚେତନତା କରାଯାଇ ଏହି ସମୟରେ ନିୟମିତ ସ୍ନାନ କରିବା ଏବଂ ପରିଷ୍କାର ପରିଚ୍ଛନ୍ନ ରହିବା, ୪-୬ଘଣ୍ଟା ଅନ୍ତରରେ ସାନିଟାରୀ ପ୍ୟାଡର ବ୍ୟବହାର କରିବା, ବ୍ୟବହୃତ ପ୍ୟାଡକୁ କାଗଜରେ ଗୁଡାଇ ଆବର୍ଜନା କୁଣ୍ଡରେ ପକାଇବା କିମ୍ବା ପୋତିଦେବା, ପ୍ୟାଡ ବ୍ୟବହାର ପୂର୍ବରୁ ଓ ପରେ ହାତକୁ ହ୍ୟାଣ୍ଡୱାସ୍ ବା ସାବୁନରେ ଭଲଭାବରେ ଧୋଇବା, ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ କିଶୋରୀମାନଙ୍କ ପାଇଁ ସରକାରୀ ବିଦ୍ୟାଳୟରେ ସାନିଟାରୀ ପ୍ୟାଡ (ଖୁସି) ବିନାମୂଲ୍ୟରେ ଯୋଗାଇ ଦିଆଯିବା ସମ୍ପର୍କରେ ସୂଚନା ଦିଆଯାଇଥିଲା । ବିଶ୍ୱ ସ୍ୱାସ୍ଥ୍ୟ ସଂଗଠନ ସବୁବର୍ଷପରି ଚଳିତବର୍ଷର ବାର୍ତ୍ତା ରଖିଛନ୍ତି ଏହି ମାସିକ ଋତୁସ୍ରାବ ହେଉଛି ଏକ ସାଧାରଣ ଜୀବନର ବାସ୍ତବତା ତେଣୁ ୨୦୩୦ସୁଦ୍ଧା ପ୍ରତ୍ୟକ ଝିଅ ବା ମହିଳାମାନେ ଏହି ମାସିକ ଋତୁସ୍ରାବ ସ୍ୱଚ୍ଛତା ଜ୍ଞାନ ସମ୍ବନ୍ଧୀୟ ସଚେତନତା କରଯିବାର ଲକ୍ଷ୍ୟ ରଖାଯାଇଛି । ଗ୍ରାମମାନଙ୍କରେ ଆଶା ଦିଦିଙ୍କ ମାଧ୍ୟମରେ ସ୍ୱଳ୍ପ ମୂଲ୍ୟରେ କିଶୋରୀମାନଙ୍କୁ ମଧ୍ୟ ଏହି ପ୍ୟାଡ ଯୋଗାଇ ଦିଆଯାଏ ଓ ତତ୍ସଂପର୍କୀୟ ସଚେତନତା କରାଯାଏ । ଋତୁରୋଧ ବା ମାସିକ ଋତୁସ୍ରାବ ୫ଦିନରୁ କମ୍ ହେଲେ ବା କମ୍ମାତ୍ରାରେ ହେଲେ କିମ୍ବା ପ୍ରତିମାସରେ ନିୟମିତ ନହେଲେ ତାହାକୁ ଋତୁରୋଧ କୁହାଯାଏ । ଅନାର୍ତ୍ତବ, ନିରାର୍ତ୍ତବ ଓ ମହିଳାମାନଙ୍କ ମାନସିକ ଋତୁସ୍ରାବର ଅନବସ୍ଥିତିକୁ ମଧ୍ୟ ଋତୁରୋଧ କୁହାଯାଏ । ଏହା ୨ ପ୍ରକାରର ପ୍ରଥମଟି ହେଉଛି ପ୍ରାଥମିକ ଅନାର୍ତ୍ତବ, ଏହି କ୍ଷେତ୍ରରେ ଯୌନବୟଃ ପ୍ରାପ୍ତି ସତ୍ତ୍ୱେ ଜଣେ ଝିଅ ଋତୁ ଉଦୟ ଏବଂ ମାସିକ ଋତୁଚକ୍ର ଆଦୌ ହୁଏନାହିଁ । ଦ୍ୱିତୀୟଟି ହେଉଛି ନିରାର୍ତ୍ତବ, ଏହି କ୍ଷେତ୍ରରେ କେତେଜଣ ଝିଅଙ୍କର ଯୌନକ୍ରାନ୍ତି ପୂର୍ବରୁ ଆର୍ତ୍ତବର ପ୍ରଶ୍ନ ଉଠେ ନାହିଁ । କିନ୍ତୁ ପ୍ରାରମ୍ଭିକ ଋତୁସ୍ରାବ ହେବା ପରେ ଯେଉଁ କାରଣ ଯୋଗୁଁ ସାମୟିକ ବା ସବୁଦିନ ପାଇଁ ବନ୍ଧ ହୋଇଯାଏ । ସେହିପରି ଅତ୍ୟଧିକ ଋତୁସ୍ରାବ ସାଧାରଣତଃ ୩-୭ଦିନ ପର୍ଯ୍ୟନ୍ତ ରକ୍ତକ୍ଷରଣ ହୋଇଥାଏ ଏବଂ ଏହା କେତେକ କ୍ଷେତ୍ରରେ ୨୫-୩୫ଦିନ ବ୍ୟବଧାନରେ ଘଟିଥାଏ । କିନ୍ତୁ ଏହା ଋତୁସ୍ରାବର ୭ ଦିନରୁ ଅଧିକ କିମ୍ବା ସେହି ୭ଦିନ ଭିତରେ ବେଶୀ ପରିମାଣରେ ହୁଏ । ଏହାକୁ ମେନୋରେଜିଆ ବୋଲି ଧରାଯାଏ । ଏହା ହରମୋନର ଅସନ୍ତୁଳନ ଯୋଗୁଁ ହୋଇଥାଏ । ତେବେ ଏଭଳି ସମସ୍ୟା ପାଇଁ ଉପଖଣ୍ଡ ଚିକିତ୍ସାଳୟରେ ଥିବା (ଶ୍ରଦ୍ଧା) ଫ୍ରେଣ୍ଡ୍ଲି କ୍ଲିନିକ୍ରେ ମିଳୁଥିବା ନିଶୁଳ୍କ ସଚେତନତା ସହ ଅଭିଜ୍ଞ ଡାକ୍ତରଙ୍କ ଦ୍ୱାରା ରୋଗ ନିରୂପଣ ନିଦାନ ଓ ଚିକିତ୍ସା ନିତ୍ୟାନ୍ତ ଜରୁରୀ ଅଟେ । ଗ୍ରାମମାନଙ୍କରେ ନିର୍ଦ୍ଧାରିତ ମଙ୍ଗଳ ଓ ଶୁକ୍ରବାର ଗ୍ରାମୀଣ ସ୍ୱାସ୍ଥ୍ୟ, ପରିମଳ ଓ ପୁଷ୍ଟିକର ଦିବସ(ମମତା ଦିବସ) ଶିବିରରେ ମଧ୍ୟ କିଶୋରୀମାନଙ୍କୁ ତତ୍ ସମ୍ପର୍କୀୟ ସଚେତନତା ଓ ପରାମର୍ଶ ସହ ମାଗଣା ପ୍ୟାଡ ବଣ୍ଟନ, ଚିକିତ୍ସା ଓ ପ୍ରେରଣ କରାଯାଇଥାଏ । ଋତୁ ବିରତୀ ହେଉଛି ସ୍ତ୍ରୀମାନଙ୍କର ରଜଃ ନିବୃତ୍ତ ସମୟ । ଏହାକୁ ଅସ୍ତ ମଧ୍ୟ କୁହାଯାଇଥାଏ । ସ୍ତ୍ରୀଲୋକମାନଙ୍କ ଠାରେ ସାଧାରଣତଃ ଦୁଇଟି ଚକ୍ର ଯଥା ଡିମ୍ବାଣୁ ଚକ୍ର ଓ ମାସିକିଆ ଚକ୍ର ପରିଲକ୍ଷିତ ହୋଇଥାଏ । ଏହି ୨ଟି ଚକ୍ର ୧୧ରୁ ୧୪ବର୍ଷ ମଧ୍ୟରେ ଆରମ୍ଭ ହୋଇ ୪୦-୪୫ବର୍ଷ ପର୍ଯ୍ୟନ୍ତ ଚାଲିଥାଏ । କିନ୍ତୁ ବାର୍ଦ୍ଧକ୍ୟରେ ପ୍ରାୟ ୪୫-୫୫ବର୍ଷ ମଧ୍ୟରେ ବନ୍ଦ ହୋଇଯାଏ ।ା ଏହାକୁ ମେନାପଜ୍ କୁହାଯାଏ ।