ଗୋଟିଏ ଦିନ ବଢ଼ିଲା କଟକର ଐତିହାସିକ ବାଲିଯାତ୍ରା
#କଟକ(ଏନ୍.ଏମ୍.): ଚଳିତ ବର୍ଷ କଟକର ଐତିହାସିକ ବାଲିଯାତ୍ରା ଗୋଟିଏ ଦିନ ବୃଦ୍ଧି ପାଇଛି । ଆଜି ଶେଷ ହେବାକୁ ଥିବା ବାଲିଯାତ୍ରା ଆଉ ଗୋଟିଏ ଦିନ ବୃଦ୍ଧି ପାଇବା ପରେ ଆସନ୍ତା କାଲି ଶେଷ ହେବ ବୋଲି ଜଣାପଡ଼ିଛି । ଜନସାଧାରଣଙ୍କ ଆଗ୍ରହକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟକର ଐତିହାସିକ ବାଲିଯାତ୍ରାକୁ ଆଉ ଗୋଟିଏ ଦିନ ବଢ଼ାଇବାକୁ ନିଷ୍ପତ୍ତି ନେଇଛନ୍ତି । ଏନେଇ ଆବଶ୍ୟକ ପଦକ୍ଷେପ ନେବାକୁ ସେ କଟକ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ସୂଚନା ଯୋଗ୍ୟ ଯେ, ଗତକାଲି ସିଏମସି ମେୟର ସୁବାସ ସିଂହ ଐତିହାସିକ ବାଲିଯାତ୍ରାକୁ ୨ଦିନ ବୃଦ୍ଧି କରିବା ପାଇଁ ମୁଖ୍ୟମନ୍ତ୍ରୀଙ୍କ ପତ୍ର ଦ୍ୱାରା ନିବେଦନ କରିଥିଲେ । ତେବେ ବାଲିଯାତ୍ରା ପାଇଁ ଜନସାଧାରଣଙ୍କ ଆଗ୍ରହକୁ ହୃଦବୋଧ କରି ମେୟରଙ୍କ ନିବେଦନ ଅନୁରୋଧକୁ ସମ୍ମାନ ଦେଇ ମୁଖ୍ୟମନ୍ତ୍ରୀ ଏହି ଐତିହାସିକ ବିପଣି ମେଳାକୁ ଆଉ ଗୋଟିଏ ଦିନକୁ ବୃଦ୍ଧି କରିଛନ୍ତି । ସୂଚନା ଯୋଗ୍ୟ ଯେ, କାର୍ତ୍ତିକ ପୂର୍ଣ୍ଣିମାଠାରୁ ଆରମ୍ଭ ହୋଇଛି କଟକ ବାଲିଯାତ୍ରା । ଏହା ଆଜି ଶେଷ ହେବାର ଥିଲା । ତେବେ ମୁଖ୍ୟମନ୍ତ୍ରୀ ଗୋଟିଏ ଦିନ ବଢ଼ାଇ ଦେଇଥିବାରୁ ଏହା ଆସନ୍ତାକାଲି ଶେଷ ହେବ । ସବୁ ବର୍ଷ ପରି ଏଥର ମଧ୍ୟ କଟକ ବାଲିଯାତ୍ରାରେ ଲୋକଙ୍କ ପ୍ରବଳ ସମାଗମ ଦେଖିବାକୁ ମିଳିଛି । ରାଜ୍ୟ ତଥା ରାଜ୍ୟ ବାହାରୁ ମଧ୍ୟ ଜନସାଧାରଣ ଏଠାକୁ ଆସିବା ସହ ବିଭିନ୍ନ ଖାଦ୍ୟର ମଜା ସହିତ ଦେଶର କୋଣ ଅନୁକୋଣରୁ ବିଭିନ୍ନ ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପ୍ରସ୍ତୁତ ସାମଗ୍ରୀ କ୍ରୟ କରୁଛନ୍ତି । ତେବେ ବାଲିଯାତ୍ରା ଗୋଟିଏ ଦିନ ବୃଦ୍ଧି ପାଇବା ଖବର ଜାଣିବା ପରେ ବ୍ୟବସାୟୀ ଓ ଜନସାଧାରଣଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଥିବା ଦେଖିବାକୁ ମିଳିଛି ।