ଗୋଖା ମହାସଂଘ ପକ୍ଷରୁ ପ୍ରଥମ ବାର୍ଷିକ ସମ୍ମିଳନୀ
#ଭୁବନେଶ୍ୱର (ଏନ୍.ଏମ୍.): ସ୍ଥାନୀୟ ଭୁବନେଶ୍ୱର ମଧୁସୂଦନ ମାର୍ଗ, ବୁଦ୍ଧ ମନ୍ଦିର ଠାରେ ମତ୍ସ୍ୟଜୀବୀ ଗୋଖା ସମ୍ପ୍ରଦାୟକୁ ନେଇ ଗଢ଼ି ଉଠିଥିବା “ଗୋଖା ମହାସଂଘ’ର ପ୍ରଥମ ବାର୍ଷିକ ସମ୍ମିଳନୀ ଅନୁଷ୍ଠିତ ହୋଇଯାଇଛି। ରାଜ୍ୟ ସଭାପତି ରାମଚନ୍ଦ୍ର ମଲ୍ଲିକଙ୍କ ସଭାପତିତ୍ୱରେ ଆୟୋଜିତ ଏହି ସମ୍ମିଳନୀରେ ଓଡ଼ିଶାର ସମସ୍ତ ଜିଲ୍ଲା କମିଟି, ବ୍ଲକ କମିଟି ସହ ସାଧାରଣ ସଦସ୍ୟ ଯୋଗ ଦେଇଥିଲେ। ମୁଖ୍ୟଅତିଥି ଭାବେ ଅବସର ପ୍ରାପ୍ତ ଅତିରିକ୍ତ ଡିଜିପି ଗୋପବନ୍ଧୁ ମଲ୍ଲିକ ଯୋଗଦେଇ ଜାତିର ସଦଭାବନା, ଭାଇଚାରା, ସହଯୋଗ, ଗ୍ରାମ୍ୟ ଜୀବନର ଅବସ୍ଥା ଓ ଏହାର ନିରାକରଣ ଉପରେ ଗୁରୁତ୍ୱ ଦେଇଥିଲେ। ଏଥି ସହିତ ସମସ୍ତ ଜିଲ୍ଲାକୁ ସୌହାର୍ଦ୍ଦପୂର୍ଣ୍ଣ ବାତାବରଣ ଆଣିବା ପାଇଁ ଅନୁରୋଧ କରିଥିଲେ। ମଣିଷର ଦୁଷ୍ଟ ଚରିତ୍ରକୁ ପରିବର୍ତ୍ତନ କରି ଶିକ୍ଷା,ସ୍ୱାସ୍ଥ୍ୟ ଉପରେ ଗୁରୁତ୍ୱ ଦେଇଥିଲେ। ଅନ୍ୟତମ ମୁଖ୍ୟ ବକ୍ତା ଭାବେ ମହିଳା ନେତ୍ରୀ ମାମିନା ମଲ୍ଲିକ ଯୋଗଦେଇ ନାରୀ ସମାଜର ଉନ୍ନତି, ଶିକ୍ଷା, ଶିଶୁ ସ୍ୱାସ୍ଥ୍ୟ ଉପରେ ଗୁରୁତ୍ୱାରୋପ କରିଥିଲେ। ଓଡ଼ିଶାର ବିଭିନ୍ନ ଅଞ୍ଚଳର ବୁଦ୍ଧିଜୀବୀ, ରାଜନୀତିଜ୍ଞ, ଶିକ୍ଷାବିତ୍ ବହୁ ଉପାଦେୟ ଅଭିଭାଷଣ ରଖିଥିଲେ। ବିଶ୍ୱ କେଶନ ବେହେରା, ଶତ୍ରୁଘ୍ନ ମଲ୍ଲିକ, ବିଶ୍ୱନାଥ ମଲ୍ଲିକ(ବାଲେଶ୍ୱର), ଅକ୍ଷୟ ମଲ୍ଲିକ(ଭଦ୍ରକ), ପଞ୍ଚୁ ମଲ୍ଲିକ, ପ୍ରଣବ କୁମାର ପଟେଲ, ଯୋଗୀନାଥ ମଲ୍ଲିକ, ସୁଧିର କୁମାର ସେଠୀ(କଟକ), ହଳଧର ସେଠୀ (କେନ୍ଦ୍ରାପଡ଼ା) ପ୍ରମୁଖ ଉଦବୋଧନ ଦେଇଥିଲେ। ମୂଳତଃ ଶିକ୍ଷା, ସ୍ୱାସ୍ଥ୍ୟ, ଅର୍ଥ, ପରିବେଶ, ସଂରକ୍ଷଣ, ଦଳିତ ଅତ୍ୟାଚାର, ନାରୀ ଶିକ୍ଷା, ଏକତା ତଥା ଶୃଙ୍ଖଳା ଉପରେ ଆଲୋଚନା କରାଯାଇଥିଲା। ଏହି ଅବସରରେ ବିଭିନ୍ନ କ୍ଷେତ୍ରରେ ପାରଦର୍ଶିତା ପାଇଁ ସେବା ସମ୍ମାନ-୨୦୨୪ରେ ମୁଖ୍ୟ ଅତିଥି, ସଭାପତି, ଉପଦେଷ୍ଟା ମଣ୍ଡଳୀ ସଦସ୍ୟ ପ୍ରଫୁଲ୍ଲ କୁମାର ସେଠୀ, ନାରାୟଣ ସେଠୀଙ୍କ ତତ୍ତ୍ୱାବଧାନରେ ସମ୍ମାନିତ ହୋଇଥିଲେ। ସଂଘ ସାଧାରଣ ସମ୍ପାଦକ ସଂଗଠନର ବିଗତ କାର୍ଯ୍ୟକ୍ରମ ଓ ଆସନ୍ତା କାର୍ଯ୍ୟକ୍ରମ ବିଷୟରେ ବର୍ଣ୍ଣନା କରିଥିଲେ। ପରମେଶ୍ୱର ମଲ୍ଲିକ, ସଂଗଠନର ପ୍ରଚାର ସମ୍ପାଦକ ସମସ୍ତଙ୍କୁ ଧନ୍ୟବାଦ୍ ଦେଇଥିଲେ।