ଗୁଳିକାଣ୍ଡରେ ରକ୍ତ ରଞ୍ଜିତ ହେଲା ବହଳଦା: ଜଣକୁ ମାଡ଼ିବସିଲେ ଗ୍ରାମବାସୀ, ମାଉଜର ସହ ୬ ଗୁଳି ଜବତ
#ରାଇରଙ୍ଗପୁର(ଏନ୍.ଏମ୍.): ଦିନକୁ ଦିନ ଅଶାନ୍ତ ହେଉଛି ବାମନଘାଟୀ ଉପଖଣ୍ଡ । ପଡୋଶୀ ଝାଡଖଣ୍ଡ ଅଞ୍ଚଳର ଦୁବୃର୍ତ୍ତଙ୍କ ଚରାଭୂଇଁ ପାଲଟିଛି ବାମନଘାଟୀ ଉପଖଣ୍ଡର ସିମାନ୍ତ ଅଞ୍ଚଳ । ମୟୂରଭଞ୍ଜ ଜିଲ୍ଲାର ବହଳଦା ଥାନା ଅନ୍ତର୍ଗତ ବାଇପାସ ରୋଡ଼ ପାର୍ଶ୍ୱ କୁଲଗି ଛକ ନିକଟରେ ଘଟିଛି ଗୁଳିକାଣ୍ଡ । ୩ ଅଜଣା ଦୁବୃର୍ତ୍ତ ଏକ ପଲସର ବାଇକରେ ଆସି ଜନୈକ ବ୍ୟକ୍ତିଙ୍କ ଘରେ ପଶି ଗୃହ ମାଲିକଙ୍କ ସହ ଗଣ୍ଡଗୋଳ କରି ଗୁଳିକାଣ୍ଡ କରିବା ନେଇ ଅଭିଯୋଗ ହୋଇଛି । ସୂଚନାଯୋଗ୍ୟ ସୋମବାର ରାତି ୯.୪୫ ସମୟ ପାଖାପାଖିରେ ବହଳଦାର କାର୍ତ୍ତିକ ସ୍ୱାଇଁଙ୍କ ଘରେ ଏକ ପଲସର ବାଇକରେ ୩ ଜଣ ଅଜଣା ଦୁବୃର୍ତ୍ତ ଆସି ଘରେ ପହଞ୍ଚି ଗଣ୍ଡଗୋଳ କରୁଥିବା ସମୟରେ ପଡୋଶୀ ଗୌରବ ଦାସ ପାଖକୁ ଆସିବାରୁ ଦୁବୃର୍ତ୍ତମାନେ ୯ଏମଏମ ପିସ୍ତଲରୁ ତାଙ୍କ ପେଟକୁ ଗୁଳି ମାରିଥିଲେ । ଘଟଣାସ୍ଥଳରେ ଗୌରବ ରକ୍ତ ଜୁଡୁବୁଡୁ ଅବସ୍ଥାରେ ତଳେ ଟଳିପଡି ଯାଇଥିଲେ । କାର୍ତ୍ତିକ ସ୍ୱାଇଁ ମଧ୍ୟ ଦୁବୃର୍ତ୍ତଙ୍କ ମାଡ଼ରେ ଆହତ ହୋଇଥିଲେ । ଖବର ପାଇ ଗାଁ ଲୋକେ ଆସିବା ଫଳରେ ଗୁଳିକାଣ୍ଡ କରି ଦୁବୃର୍ତ୍ତ ମାନେ ଭୟରେ ପଲସରରେ ଖସି ପଳାଇ ଯାଉଥିବା ସମୟରେ ଜଣେ ଦୁବୃର୍ତ୍ତଙ୍କୁ ସ୍ଥାନୀୟ ଲୋକେ ମାଡ଼ି ବସି ପ୍ରବଳ ମାରିଥିଲେ । ଗୁରୁତର ଗୌରବଙ୍କୁ ଟାଟା ମେମୋରିଆଲ ହସ୍ପିଟାଲକୁ ଚିକିତ୍ସା ପାଇଁ ପଠାଯାଇଥିଲା । ଅପର ପକ୍ଷରେ ଅଜଣା ଦୁବୃର୍ତ୍ତକୁ ଗୁରୁତର ଅବସ୍ଥାରେ ରାଇରଙ୍ଗପୁର ହସ୍ପିଟାଲରେ ଭର୍ତ୍ତି କରାଯାଇଥିଲା । ଖବର ପାଇ ରାଇରଙ୍ଗପୁର ଏସଡିପିଓ ଗୋକୁଳାନନ୍ଦ ସାହୁ, ବହଳଦା ଥାନାଧିକାରୀ ରଂଜନ ବେହେରା ଏବଂ ରାଇରଙ୍ଗପୁର ଟାଉନଥାନା ଆଇଆଇସି ସ୍ୱର୍ଣ୍ଣଲତା ମିଞ୍ଜ ଘଟଣାସ୍ଥଳରେ ପହଞ୍ଚି ଛାନଭିନ କରିବା ସହ ତଦନ୍ତ ଜାରି ରଖିଛନ୍ତି । ଦୁବୃର୍ତ୍ତଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ବାରିପଦା ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଧରାପଡ଼ିଥିବା ଦୁର୍ବୃତ୍ତ ପାଖରୁ ମୋବାଇଲ, ମାଉଜର ଏବଂ ୬ଟି ଗୁଳି ଜବତ ହୋଇଛି । ସେହିଭଳି ଆଜି ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ ।ତେବେ ଗୁଳିକାଣ୍ଡ ନେଇ ବହଳଦା ବାସୀ ଭୟଭୀତ ହୋଇ ପଡିଛନ୍ତି । ସୂଚନା ଅନୁଯାୟୀ, ଝାଡ଼ଖଣ୍ଡ ରାଜ୍ୟର ଦୁବୃର୍ତ୍ତ, ଲୁଟେରା, ଅସାମାଜିକଙ୍କ ନକ୍ସା ଭିତରେ ବାମନଘାଟୀ ଉପଖଣ୍ଡ । ସେମାନଙ୍କ ମାତ୍ରାଧିକ ଅସାମାଜିକ କାର୍ଯ୍ୟକଳାପ ଯୋଗୁଁ ଦିନକୁ ଦିନ ବାମନଘାଟୀ ଅଶାନ୍ତ ହେଉଛି । ନିକଟରେ ବହଳଦାରୁ ରାଇରଙ୍ଗପୁର ଅଞ୍ଚଳର ଯୁବକଙ୍କୁ ଫୁସୁଲାଇ ନେଇ ଜଘନ୍ୟ ହତ୍ୟାକାଣ୍ଡ କରିବା, ପେଟ୍ରୋଲ ପମ୍ପରେ ଲୁଟ ଉଦ୍ୟମ, ବନ୍ଧନ ଫାଇନାନ୍ସିଆଲ୍ ବ୍ୟାଙ୍କ କର୍ମଚାରୀଙ୍କୁ ରାସ୍ତାରେ ଅଟକାଇ ଟଙ୍କା ବ୍ୟାଗ ଲୁଟ, ବାଇକ ଚୋରି ଇତ୍ୟାଦି ଘଟଣାକୁ ନେଇ ଚିନ୍ତାରେ ବାମନଘାଟୀ ପୋଲିସ ପ୍ରଶାସନ ।