ଖୋର୍ଦ୍ଧା ଜିଲ୍ଲା ଇପିଏଫ ପେନସନର୍ସ ସଙ୍ଘର ଦ୍ୱିବାର୍ଷିକ ସାଧାରଣ ସଭା

#ଖୋର୍ଦ୍ଧା (ଏନ୍‌.ଏମ୍‌.): ଅଲ ଓଡିଶା ଇପିଏଫ ପେନସନର୍ସ ଆସୋସିଏସନ ଖୋର୍ଦ୍ଧା ଜିଲ୍ଲା କମିଟିର ତୃତୀୟ ଦ୍ୱିବାର୍ଷିକ ସାଧାରଣ ସଭା ସ୍ଥାନୀୟ ବରମୁଣ୍ଡା କାଳୀମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି । ସଭାପତି ପ୍ରଫୁଲ୍ଲ କୁମାର ଦାସଙ୍କ ସଭାପତିତ୍ୱରେ ଆୟୋଜିତ ଏହି ସଭାରେ ଖୋର୍ଦ୍ଧା ଜିଲ୍ଲାରୁ ଶତାଧିକ ସଦସ୍ୟ ଏହି ସଭାରେ ଯୋଗ ଦେଇଥିଲେ । ରାଜ୍ୟ କମିଟି ସଭାପତି ବିଜୟ କୁମାର ଜେନା ଓ ସର୍ବଭାରତୀୟ ଉପସଭାପତି ତଥା ସାଧାରଣ ସମ୍ପାଦକ ଭାଗ୍ୟଧର ବ୍ରହ୍ମା ଏହି ସଭାରେ ଅତିଥି ଭାବେ ଯୋଗଦେଇ ରାଜ୍ୟର ସମସ୍ତ ଇପିଏଫ ପେନସନଧାରୀ ଏକତ୍ରିତ ହୋଇ ଦାବି ହାସଲ ପାଇଁ ଗଣତାନ୍ତ୍ରିକ ପଦ୍ଧତିରେ ଲଢେଇ କରିବାକୁ ଆହ୍ୱାନ ଦେଇଥିଲେ । କେନ୍ଦ୍ର ସରକାର ଇପିଏଫ ପେନସନଧାରୀଙ୍କ ପ୍ରତି ସର୍ବନିମ୍ନ ପେନସନ ୯ହଜାର ଟଙ୍କା ସହ ମହଙ୍ଗା ଭତ୍ତା ପ୍ରଦାନ ନକରିବା ପର୍ଯ୍ୟନ୍ତ ଏ ଲଢେଇ ଚାଲୁରହିବ । ଆଗାମୀ ଦିନରେ ଏ ଆନ୍ଦୋଳନକୁ ଆହୁରି ଜୋରଦାର କରିବାକୁ ଗୁରୁତ୍ୱ ଦେଇଥିଲେ । ବର୍ଦ୍ଧିତ ପେନସନ ପ୍ରଦାନରେ ଇପିଏଫ କର୍ମକର୍ତ୍ତାଙ୍କ ଟାଳଟୁଳ ନିତିକୁ ଘୋର ନିନ୍ଦା କରିଥିଲେ । ଏହି ଅବସରରେ ଆସନ୍ତା ଦୁଇ ବର୍ଷ ପାଇଁ ସର୍ବସମ୍ମତି କ୍ରମେ କର୍ମକର୍ତ୍ତା ଓ ୧୪ ଜଣିଆ କାର୍ଯ୍ୟକାରୀ କମିଟି ସଭ୍ୟ ମନୋନୀତ କରାଗଲା । ପ୍ରଫୁଲ୍ଲ କୁମାର ଦାସ ସଭାପତି, ପ୍ରକାଶ ପଟ୍ଟନାୟକ ସମ୍ପାଦକ, ସଚ୍ଚିଦାନନ୍ଦ ସାମନ୍ତରାୟ ଓ ସରୋଜକାନ୍ତ ମଲ୍ଲିକ ଉପସଭାପତି, ବିଜୟ ପଟ୍ଟନାୟକ ଓ ନବକିଶୋର ରଣା ଯୁଗ୍ମସମ୍ପାଦକ ମିହିର ରାୟ ସଂଗଠକ ସମ୍ପାଦକ ଭାବେ ମନୋନୀତ ହୋଇଥିଲେ । ଏହି ସଭାରେ ଉପଦେଷ୍ଟା ବିପିନ ପାଢ଼ୀ ଓ ନଟବର ଆଚାର୍ଯ୍ୟ ଉପସ୍ଥିତ ରହି ଆଗାମୀ ଦିନରେ ସଂଘର ଭବିଷ୍ୟତ ଉଜ୍ୱଳ କାମନା ସହ ଆଗକୁ ଦାବି ହାସଲ ପାଇଁ ଏକତ୍ରିତ ହୋଇ ଲଢେଇ କରିବାକୁ ପରାମର୍ଶ ଦେଇଥିଲେ । ସଭାକାର୍ଯ୍ୟ ସକାଳ ୧୧ଘଟିକାରେ ଆରମ୍ଭ କରି ଅପରାହ୍ନ ୨ଘଟିକାରେ ଶେଷ ହୋଇଥିଲା । ଶେଷରେ ସଚ୍ଚିଦାନନ୍ଦ ସାମନ୍ତରାୟ ଧନ୍ୟବାଦ ଦେଇଥିଲେ ।