କ୍ୟାଣ୍ଡେଲ ଜଳାଇ ପ୍ରତିବାଦ କଲେ ବିଦ୍ୟୁତ ବିଭାଗରେ କାର୍ଯ୍ୟରତ ଇଞ୍ଜିନିୟର
#କଟକ(ଏନ୍.ଏମ୍.): ବିଦ୍ୟୁତ ବିଭାଗରେ କାର୍ଯ୍ୟରତ କର୍ମଚାରୀ, ଅଫିସର ତଥା ଇଞ୍ଜିନିୟରମାନେ ନିଜର ସମସ୍ତ ସୁଖ ଦୁଃଖକୁ ଜଳାଞ୍ଜଳି ଦେଇ ଜନସାଧାରଣଙ୍କୁ ସେବା ଯୋଗାଇ ଆସୁଥିଲେ ମଧ୍ୟ ସେମାନଙ୍କ ପ୍ରତି ବିଭାଗୀୟ ଉଦାସୀନତା ତଥା ବୈମାତୃକ ମନୋଭାବ ଅସହ୍ୟ ହୋଇ ପଡ଼ୁଛି । ଏ ନେଇ ଉଚ୍ଚକର୍ତ୍ତୃପକ୍ଷଙ୍କୁ ଯେତେ ଦାବି କଲେ ମଧ୍ୟ ସେମାନଙ୍କ ଦୁଃଖ ଅରଣ୍ୟରୋଦନରେ ପରିଣତ ହୋଇଛି । ଏହାର ପ୍ରତିବାଦରେ ଇଞ୍ଜିନିୟରମାନେ କଳାବ୍ୟାଚ ପରିଧାନ ପୂର୍ବକ ଶୃଙ୍ଖଳିତ ଭାବେ କାର୍ଯ୍ୟ କରିଥିଲେ ମଧ୍ୟ ବିଦ୍ୟୁତ ନିଗମ କିମ୍ବା ସରକାର ଏଥି ପ୍ରତି କେହି ଦୃଷ୍ଟି ଦେଉ ନାହାନ୍ତି । ଫଳରେ ଆଜି ବିଦ୍ୟୁତ ଇଞ୍ଜିନିୟର ଓ ଅଫିସରମାନେ କ୍ୟାଣ୍ଡେଲ ଜଳାଇ ନିଆରା ଢଙ୍ଗରେ ପ୍ରତିବାଦ କରିଛନ୍ତି ।
ସେସକୋ ଇଞ୍ଜିନିୟରର୍ସ ସର୍ଭିସ ଆସୋସିଏସନ, ଓଡ଼ିଶା ଇଲେକ୍ଟ୍ରିକାଲ ଇଞ୍ଜନିୟର୍ସ ଆସୋସିଏସନ ଏବଂ ଅଲ ଓଡ଼ିଶା ପାୱାର ଇଞ୍ଜିନିୟର୍ସ ଫେଡେରେସନ ପକ୍ଷରୁ କ୍ୟାଣ୍ଡେଲ ଲାଇଟ ଶୋଭାଯାତ୍ରା କରାଯାଇଥିଲା । ଅଭିଯୋଗ ଅନୁଯାୟୀ, ବିପଦ ସଙ୍କୁଳ ଅବସ୍ଥାରେ ବିଦ୍ୟୁତ୍ ଇଞ୍ଜିନିୟର ମାନେ ପର୍ବ ପର୍ବାଣୀରେ ଯେତେ ବେଳେ ସମସ୍ତେ ଉତ୍ସବ ମୁଖର ଥାନ୍ତି, ସେତେବେଳେ ନିରବଚ୍ଛିନ୍ନ ବିଦ୍ୟୁତ୍ ସେବା ଯୋଗାଇ ଦେବା ପାଇଁ ଦିନ ରାତି କରିବା ସମ୍ପାଦନ କରନ୍ତି । ଆଉ ବିଶେଷ କରି ବାତ୍ୟା ଓ ବନ୍ୟା ପରବର୍ତ୍ତୀ ସମୟରେ ନିଜ ପରିବାରକୁ ଭୁଲିଯାଇ ବିଦ୍ୟୁତ୍ ସେବାର ପୁନରୁଦ୍ଧାର ପାଇଁ ଅତ୍ୟନ୍ତ କଷ୍ଟକର ଓ ବିପଦ ସଙ୍କୁଳ ପରିସ୍ଥିତିରେ ନିଜ ଜୀବନକୁ ବାଜି ଲଗାଇ ଦିନ ରାତି ଏକାକାର କରି କାର୍ଯ୍ୟ କରନ୍ତି । ଭାରତ ବର୍ଷର ସବୁ ରାଜ୍ୟରେ ବିଦ୍ୟୁତ୍ କ୍ଷେତ୍ରରେ କାମ କରୁଥିବା ଇଞ୍ଜିନିୟର, ଅଫିସର୍ ଓ କର୍ମଚାରୀଙ୍କୁ ବିଶେଷ ମାନ୍ୟତା ପ୍ରଦାନ ସ୍ୱରୂପ, ସେମାନଙ୍କୁ ସରକାରୀ କର୍ମଚାରୀଙ୍କ ଠାରୁ ଉଚ୍ଚ ବେତନ ହାର, ୪ ଟି ସମୟ ଭିତ୍ତିକ ବେତନ, ଜରୁରୀ କାଳୀନ ଭତ୍ତା ଓ ପ୍ରତି ୪-୫ ବର୍ଷରେ ବେତନ ସଂଶୋଧନ ଇତ୍ୟାଦି ସୁବିଧା ସୁଯୋଗ ମିଳିଆସୁଛି । ବର୍ଷ ବର୍ଷ ଧରି ଏସବୁଥିରୁ ଓଡ଼ିଶା ବିଦ୍ୟୁତ୍ କ୍ଷେତ୍ରରେ କାମ କରୁଥିବା ଇଞ୍ଜିନିୟର ଓ ଅଫିସର୍ ମାନେ ବଞ୍ଚିତ ହୋଇଛନ୍ତି । ଏପରିକି ଓ ଏସଇବିଓ ପରବର୍ତ୍ତୀ କାଳରେ ସୃଷ୍ଟି ହୋଇଥିବା ବିଦ୍ୟୁତ୍ ନିଗମରେ ପ୍ରଚଳିତ ୫ ବର୍ଷିଆ ବେତନ ସଂଶୋଧନ ପ୍ରକ୍ରିୟାରୁ ମଧ୍ୟ ସେମାନଙ୍କୁ ଦୂରରେ ରଖା ଯାଇଛି । ସରକାରୀ ବିଭାଗ ଗୁଡିକରେ ଉନ୍ନତ ପଦୋନ୍ନତି ପାଇଁ ୨୦୨୧ରୁ ହୋଇଥିବା କ୍ୟାଡ଼ର ପୁନଃଗଠନ ପ୍ରକ୍ରିୟାରୁ ବିଦ୍ୟୁତ୍ ଇଞ୍ଜିନିୟର ଓ ଅଫିସର ମାନେ ମଧ୍ୟ ବାଦ୍ ପଡିଛନ୍ତି । ଏପରିକି ୨୦୧୩ ରେ ସରକାରୀସ୍ତରରେ ମୂଳ ପଦବୀ, ସହକାରୀ ଯନ୍ତ୍ରୀରୁ ସହକାରୀ ନିର୍ବାହୀ ଯନ୍ତ୍ରୀ ପଦବୀକୁ ଉନ୍ନୀତ ହୋଇଥିବାବେଳେ ବିଦ୍ୟୁତ୍ ନିଗମ ଗୁଡିକରେ ତାହା ଅଦ୍ୟାବଧି ଲାଗୁ ହୋଇ ନାହିଁ । ଟାଟା ପାୱାରକୁ ବିଦ୍ୟୁତ୍ ନିଗମ ଗୁଡ଼ିକର ମାଲିକାନା ହସ୍ତାନ୍ତର ହେବାପରେ ମୂଳ ଇଞ୍ଜିନିୟର ଓ ଅଫିସରମାନଙ୍କ ଦୁର୍ଦ୍ଦଶା ବଢ଼ି ଯାଇଛି । ସବୁ ନିଯୁକ୍ତି କ୍ୟାଡ଼ର ବାହାରେ ହେଉଛି, ମୂଳ ଇଞ୍ଜିନିୟରମାନଙ୍କ ପଦବୀ ତଥା ପଦୋନ୍ନତି ସଙ୍କୁଚିତ ହେଉଛି । ଏପରିକି ସେମାନଙ୍କ ପଦବୀ ଗୁଡିକୁ ମ୍ୟାନେଜର ବଦଳରେ ଇଞ୍ଜିନିୟର ନାମରେ ନାମିତ କରିବା ଦାବିକୁ ମଧ୍ୟ ଉପେକ୍ଷା କରାଯାଉଛି । ଏ ନେଇ ସଂଘ ପକ୍ଷରୁ ବାରମ୍ବାର ଦୃଷ୍ଟି ଆକର୍ଷଣ କରାଯାଇ ଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି । ଏହାର ପ୍ରତିବାଦରେ ଗତ ଗତ ୨୪ ।୪ ।୨୩ ରୁ ୨ ।୫ ।୨୩ ପର୍ଯ୍ୟନ୍ତ ଓପିଜିସି, ଓଏଚପିସି, ଓପିଟିସିଏଲ, ଗ୍ରୀଡକୋ, ଟିପିସିଓଡିଏଲ୍, ଟିପିଏସଓଡ଼ିଏଲ, ଟିପିଡବ୍ଲ୍ୟୁଡିଏଲ୍ ଓ ଟିସିଏନଓଡ଼ିଏଲରେ କାର୍ଯ୍ୟରତ ସମସ୍ତ ଇଞ୍ଜିନିୟର ଓ ଅଫିସର୍ମାନେ ସପ୍ତାହ ବ୍ୟାପି କଳା ବ୍ୟାଚ ପରିଧାନ କରି ଥିଲେ ମଧ୍ୟ ଅଦ୍ୟାବଧି ସରକାରଙ୍କ ତରଫରୁ କୌଣସି ତତ୍ପରତା ପ୍ରକାଶ ପାଇନାହିଁ । ତେଣୁ ପ୍ରତିବାଦକୁ ଆହୁରି ଶାଣିତ କରିବା ପାଇଁ, ସାରା ଓଡ଼ିଶାରେ ଥିବା ଓପିଜିସି, ଓଏଚପିସି, ଓପିଟିସିଏଲ, ଗ୍ରୀଡ଼କୋ, ଟିପିସିଓଲ, ଟିସିଏନ ଓଡ଼ିଏଲ, ଚିପିଡ଼ବ୍ଲ୍ୟୁଡିଏଲ ଓ ଟିପିଏସଓଡ଼ିଏଲର ସମସ୍ତ ଦପ୍ତର ସମ୍ମୁଖରେ ସନ୍ଧ୍ୟା ସମୟରେ ପ୍ରତିବାଦ ସ୍ୱରୂପ କ୍ୟାଣ୍ଡେଲ ଲାଇଟ ଜଳାଇ ବିରୋଧ କରାଯାଇଥିଲା । ଏଥିରେ ସିଇଏସଏର ସଭାପତି ଇଂ. ନବୀନ କୁମାର ମିଶ୍ର, ସାଧାରଣ ସମ୍ପାକ ଇଂ. ବାସୁଦେବ ପଣ୍ଡା, ଉପସଭାପତି ଇଂ. ଚନ୍ଦ୍ରଭାନୁ ମହାନ୍ତିଙ୍କ ସମେତ ଡିଗ୍ରୀ ଓ ଡିପ୍ଲୋମା ଇଞ୍ଜିନିୟର ଆସୋସିଏସନର ବହୁ ଇଞ୍ଜିନିୟରମାନେ ଉପସ୍ଥିତଥିଲେ ।