କେନ୍ଦ୍ରାପଡ଼ା-ପଟ୍ଟାମୁଣ୍ଡାଇ କେନାଲ ସଫେଇରେ ଅନିୟମିତତା ନେଇ ତେଜୁଛି ଅସନ୍ତୋଷ

#ଜଗତପୁର(ଏନ୍‌.ଏମ୍‌.):କଟକ ମହାନଗର ନିଗମ ୪୮ନମ୍ବର ୱାର୍ଡ ଜଗତପୁର ଅଞ୍ଚଳର ମହାନଦୀରୁ ବାହାରିଥିବା କେନ୍ଦ୍ରାପଡା-ପଟ୍ଟାମୁଣ୍ଡେଇ ହାଇ ଲେବୁଲ କେନାଲ ସଫେଇ କାମରେ ନିୟମିତତା ନେଇ ଅଞ୍ଚଳରେ ଜନ ଅସନ୍ତୋଷ କୁହୁଳିବାରେ ଲାଗିଛି । ତେବେ କେନାଲ ସଫେଇ ନାମରେ ଲକ୍ଷାଧିକ ଟଙ୍କା ହରିଲୁଟ ହେବା ଭଳି ଅଞ୍ଚଳବାସୀ ସଂଗୀନ ଅଭିଯୋଗ ଉଠାଇଛନ୍ତି । କେନାଲର ଜିରୋ ପଏଣ୍ଟ ଠାରୁ କିଛି ବାଟ ପର୍ଯ୍ୟନ୍ତ କେନାଲ ମଝିରେ ମାଟି ଭର୍ତ୍ତି ହୋଇ ପଠା ସଦୃଶ ସୃଷ୍ଟି ହୋଇଛି । ଫଳରେ କେନାଲ ଅବରୋଧ ହେବା ସହ ପାଣି ଯିବାରେ ବ୍ୟାଘାତ ସୃଷ୍ଟି ହେଉଛି । ଫଳରେ ଏବେ ମହାନଦୀ ନର୍ଥ ଇରିଗେସନ ବିଭାଗ ପକ୍ଷରୁ ବର୍ଷା ଦିନ ପୂର୍ବରୁ କେନାଲ ଭିତର ସଫେଇ କାର୍ଯ୍ୟ ଆରମ୍ଭ ହୋଇଛି । କେନାଲ ଭିତରେ ଜମିଥିବା ମାଟିକୁ କାଟି ସେଗୁଡ଼ିକୁ କେନାଲ ବାହାରକୁ ପକାଇବା ପାଇଁ ନିୟମ ଥିବାବେଳେ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶ କ୍ରମେ ଜେସିବିରେ ମାଟିକୁ କାଟି ବାହାରକୁ ପକାଇବା ପରିବର୍ତ୍ତେ ସେହି କେନାଲ ମଧ୍ୟରେ ମାଟିକୁ ଖେଳାଇ ଦିଆ ଯାଉଛି । ଆଉ ପାଣି ଆସିଲେ ତାହା ତଳମୁଣ୍ଡକୁ ଚାଲିଯିବ ବୋଲି କୁହାଯାଉଛି । ତେବେ ମାଟି ସ୍ଥାନାନ୍ତର କଲେ ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ୁଥିବାରୁ ସେହି ଠାରେ ଖେଳାଇ ଦିଆଯାଉଛି । ଫଳରେ କିଛି ଦିନ ମଧ୍ୟରେ କେନାଲରେ ମାଟି ଜମି ପୁଣି ଜଳ ଅବରୋଧ କରିବ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି । ତେବେ ବିଭାଗୀୟ ଅଧିକାରୀ ଓ ଠିକା ସଂସ୍ଥା ମଧ୍ୟରେ ଭିତିରିଆ ସମ୍ପର୍କ ରଖି ରାଜସ୍ୱ ହଡ଼ପର ଏକ ମାଧ୍ୟମ ବୋଲି ଚର୍ଚ୍ଚା ହେଉଛି । ତେଣୁ ଏହାକୁ ଉଚ୍ଚସ୍ତରୀୟ ତଦନ୍ତ କରାଯାଇ ରାଜସ୍ୱ ହଡ଼ପର ବାଟ ବନ୍ଦ କରିବା ନିମନ୍ତେ ବିଭିନ୍ନ ମହଲରେ ଦାବି ହେଉଛି । ଏପରିକି ଏଭଳି କାମକୁ ବାରଣ କରିବାକୁ ବିଭାଗୀୟ ଅଧିକାରୀ ଓ ଠିକା ସଂସ୍ଥା ଜନସାଧାରଣଙ୍କୁ ନାଲି ଆଖି ଦେଖାଉଥିବା ଭଳି ସଂଗୀନ ଅଭିଯୋଗ ଉଠିଛି । ତେବେ ଏ ନେଇ ବିଭାଗୀୟ ଯନ୍ତ୍ରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନଥିଲା । ସୂଚନା ଯୋଗ୍ୟ ଯେ, କେନାଲ ଦ୍ୱାରା ଚାଷ ଜମିକୁ ପର୍ଯ୍ୟାପ୍ତ ପାଣି ଯୋଗାଇ ଦେବା ନିମନ୍ତେ ରାଜ୍ୟସରକାର ସମସ୍ତ କେନାଲ ଗୁଡ଼ିକର ଉନ୍ନତିକରଣ କରିବା ସହ ବନ୍ଧଗୁଡ଼ିକୁ ମଧ୍ୟ ସୁଦୃଢ଼ିକରଣ ନିମନ୍ତେ ଗୁରୁତ୍ୱ ଦେଉଛନ୍ତି । ତେବେ ଏ ନେଇ ଜିଲ୍ଲାସ୍ତରୀୟ ବୈଠକରେ ମଧ୍ୟ ବାରମ୍ବାର ଆଲୋଚନା ହେଉଛି । ମାତ୍ର ବିଭାଗୀୟ ଅଧିକାରୀ ଓ ଠିକା ସଂସ୍ଥା ମିଲିଭଗତ ଭାବେ ସରକାରୀ ଅର୍ଥକୁ ଚଳୁ କରୁଥିବା ଅଞ୍ଚଳର ବୁଦ୍ଧିଜୀବୀ ଅଭିଯୋଗ କରିବା ସହ ଏହାର ତଦନ୍ତ କରାଯାଇ ତୁରନ୍ତ କାର୍ଯ୍ୟାନୁଷ୍ଠାନ ନିମନ୍ତେ ଦାବି ହେଉଛି ।