କୁହୁଳୁଛି ଅଞ୍ଚଳବାସୀଙ୍କ ଅସନ୍ତୋଷ: ଦଲାଲଙ୍କ କବ୍ଜାରେ ଠାକୁର ସମ୍ପତ୍ତି !
#ଚୌଦ୍ୱାର(ଏନ୍.ଏମ୍.): ଟାଙ୍ଗୀ-ଚୌଦ୍ୱାର ବ୍ଲକ୍ ଅନ୍ତର୍ଗତ କୟଲପଡ଼ା ଗ୍ରାମ ପଞ୍ଚାୟତରେ ଠାକୁର ସମ୍ପତ୍ତି ହଡ଼ପ ହୋଇଥିବା ଅଭିଯୋଗ ହୋଇଛି । କିଛି ଦଲାଲ ଚକ୍ରାନ୍ତ କରି ଉକ୍ତ ଜମିକୁ ଯୋରଜବରଦସ୍ତ ମାଡ଼ି ବସିଛନ୍ତି । ସୂଚନା ମୁତାବକ କୟଲପଡ଼ା ଗ୍ରାମରେ ଥିବା ଲକ୍ଷ୍ମୀ ନାରାୟଣ ଦେବୋତ୍ତର ଜମିକୁ ଉକ୍ତ ଗ୍ରାମର ୨ଜଣ ଦଲାଲ ଚଞ୍ଚକତା କରି ବିକ୍ରି ଉଦ୍ଦେଶ୍ୟରେ ଯୋର୍ ଜବରଦସ୍ତ ସେଠାରେ ନିର୍ମାଣ ଧିନ କାର୍ଯ୍ୟ କରୁଛନ୍ତି । ଗ୍ରାମବାସୀଙ୍କ ଅଭିଯୋଗ ଅନୁଯାଇ ଗ୍ରାମର ଲକ୍ଷ୍ମୀ ନାରାୟଣଙ୍କ ନାମରେ ଥିବା ୯ ଏକର ୮୦ ଡିସିମିଲ ଜାଗାକୁ ସେହି ଗ୍ରାମର ଜନୈକ ଦୁଇ ଜଣ ବ୍ୟକ୍ତି ଚଞ୍ଚକତା କରି ଉକ୍ତ ଜାଗା ଉପରେ ନିର୍ମାଣ କାର୍ଯ୍ୟ କରିବା ସହ ସୋଲାର ଲାଇଟ୍ ସାହାଯ୍ୟରେ ତାର ବୁଲାଇ ଅକ୍ତିଆର କରିଛନ୍ତି । ତେବେ ଗ୍ରାମବାସୀମାନେ ଏହାକୁ ପ୍ରଥମେ ସ୍ଥାନୀୟ ସରପଞ୍ଚ ଶୈଳବାଳା ନାୟକଙ୍କୁ ଲିଖିତ ଅଭିଯୋଗ କରିବା ପରେ ଶ୍ରୀମତୀ ନାୟକ ଏଭଳି ଅଭିଯୋଗକୁ ନେଇ ସ୍ଥାନୀୟ ଫାଣ୍ଡି ଅଧିକାରୀ ସମେତ ତହସିଲଦାର ତଥା ଅନ୍ୟାନ୍ୟ ପ୍ରଶାସନିକସ୍ତରରେ ଏହାକୁ ଜଣାଇଥିଲେ । ତେବେ ପ୍ରଶାସନିକ ପକ୍ଷରୁ କିଛି କାର୍ଯ୍ୟାନୁଷ୍ଠାନ ଗ୍ରହଣ କରାନଯିବାରୁ । ଆଜି ଉକ୍ତ ଜମି ନିକଟରେ ଗ୍ରାମର ଶତାଧିକ ଲୋକ ଏକାଠି ହୋଇ ବିରୋଧ କରିବା ଦେଖିବାକୁ ମିଳିଥିଲା । ଗ୍ରାମବାସୀମାନଙ୍କ କହିବା ଅନୁଯାଇ, ଦୀର୍ଘ ୪୦ ବର୍ଷରୁ ଉର୍ଦ୍ଧ ହେବ ଉକ୍ତ ଜମି ଲକ୍ଷ୍ମୀ ନାରାୟଣଙ୍କ ନାମରେ ଥିଲା ଓ ଯାହାର କିଛି ମାର୍ଫତଦାରଙ୍କ ତତ୍ତ୍ୱାବଧାନରେ ରହିଥିଲା । ସେହି ମାର୍ଫତଦାରରେ ଅନେକ ବ୍ୟକ୍ତି ରହିଥିବା ବେଳେ ଜଣେ ଅଂଶୀଦାର ଏହାକୁ ଚଞ୍ଚକତା କରି ବିକ୍ରି କରିବା ପାଇଁ ଉଦ୍ୟମ କରୁଥିବା ବେଳେ ଜବରଦଖଲ କରିବା ଅଭିଯୋଗ ହୋଇଛି । ଉକ୍ତ ଜମିର ରେକର୍ଡ ଅନୁଯାଇ କିଛି ଗ୍ରାମ୍ୟ ଜଙ୍ଗଲ, ଶ୍ମଶାନ, ଖେଳ ପଡିଆ, ପତିତ, ରାସ୍ତା ଆଦି ବିଭିନ୍ନ ପ୍ରକାରର କିସମ ରହିଥିବା ବେଳେ କିଭଳି ଏହାକୁ ବିକ୍ରି କରାଯିବ ବୋଲି ପ୍ରଶ୍ନ କରିଥିବ ବେଳେ ବିଭିନ୍ନ ଗଛ, ସମାଧି ଭାଙ୍ଗିବା ଓ ଖେଳ ପଡିଆକୁ ତାଡ଼ିବାର ମଧ୍ୟ ଗ୍ରାମବାସୀ ମାନେ ଅଭିଯୋଗ କରିଛନ୍ତି । ତେବେ ଗ୍ରାମବାସୀ ଅଭିଯୋଗ କଲା ପରେ ମଧ୍ୟ ତାଙ୍କୁ ପ୍ରସାଶନିକ ସ୍ତରରୁ କିଛି ସୁଫଳ ମିଳିପାରୁନାହିଁ । ତେଣୁ ଏଥିରେ ବଡ଼ ରାଜନୈତିକ ବ୍ୟକ୍ତିବିଶେଷଙ୍କର ହାତ ଥିବାର ଅଭିଯୋଗ କରୁଥିବାର ଦେଖିବାକୁ ମିଳୁଛି । ଯଦି ଆଗାମୀ ଦିନରେ ଏହାର ସମାଧାନ ନହୁଏ, ତେବେ ଗ୍ରାମବାସୀମାନେ ରାଜରାସ୍ତା ସହିତ ତହସିଲ ଅଫିସ, କଲେକ୍ଟର ଅଫିସ ଆଗରେ ଧାରଣା ଦେବେ ବୋଲି ଚେତାବନୀ ଦେଇଛନ୍ତି ।