କୁମ୍ଭକର୍ଣ୍ଣ ନିଦ୍ରାରେ ସିଏମସି : ତ୍ରି-ଛକ ରାସ୍ତା ମଝି ଡ୍ରେନ ଉପରେ ସ୍ଲାବ ଭାଙ୍ଗି ପାଲଟିଛି ମରଣଯନ୍ତା

#ଜଗତପୁର(ଏନ୍‌.ଏମ୍‌.): କଟକ ସହରରେ ରାସ୍ତାଘାଟ ସମସ୍ୟା ନେଇ ମେୟର କୁମ୍ଭୀର କାନ୍ଦଣା କାନ୍ଦୁଥିବା ଭଳି ଅଭିଯୋଗ ହୋଇଛି । ମାସମାସ ଧରି ରାସ୍ତାଘାଟ ମରଣଯନ୍ତା ପାଲଟିଥିଲେ ମଧ୍ୟ ଏଗୁଡ଼ିକର ମରାମତି କରିବାରେ ସିଏମସିର ଆନ୍ତରିକତା ନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । କଟକ ମହାନଗର ନିଗମ ଅନ୍ତର୍ଗତ ୪୮ନମ୍ବର ୱାର୍ଡ ଫକିରପୁର ପଣ୍ଡାସାହିରେ ରାସ୍ତା ମଝିରେ ଯାଇଥିବା ଏକ ଡ୍ରେନ ଉପରେ ପଡିଥିବା ୮ଗୋଟି ସ୍ଳାବ ପ୍ରାୟ ୨ମାସ ହେବ ଭାଙ୍ଗି ପଡି ରହିଥିବା ଦେଖିବାକୁ ମିଳିଛି । ହେଲେ ଆଜି ପର୍ଯ୍ୟନ୍ତ ସିଏମସି ପକ୍ଷରୁ ସେଗୁଡ଼ିକ ହଟାଇ ନୂଆ ସ୍ଲାବ ପଡ଼ିପାରୁନାହିଁ । ଫଳରେ ଉକ୍ତ ରାସ୍ତାରେ କାର, ବାଇକ ଆଦି ଯାତାୟତ କରିବା ଅସମ୍ଭବ ହୋଇ ପଡ଼ିଛି । ଏ ନେଇ ବାରମ୍ବାର ଅଭିଯୋଗ କରାଗଲେ ମଧ୍ୟ ସିଏମସି କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା ଜନସାଧାରଣ ଅଭିଯୋଗ କରିଛନ୍ତି । ତେବେ ଜନସାଧାରଣଙ୍କ ବିଭିନ୍ନ ସମସ୍ୟାର ସମାଧାନ ପାଇଁ ମୋ’ ସରକାର ଓ ଫାଇପ-ଟି ଆଧାରରେ ଯେଉଁଭଳି ତତ୍ପରତା ଦେଖାଇବା କଥା ସିଏମସି ସେଭଳି କରୁନଥିବା କୁହାଯାଉଛି । ସ୍ଥାନୀୟ ଫକିରପୁର ଅଞ୍ଚଳର ଆରାଧ୍ୟ ଦେବତା ଗୋପାଳଜୀଉଙ୍କ ଦୋଳ ମଣ୍ଡପ ସମ୍ମୁଖରୁ ପ୍ରାୟ ୨ ମାସରୁ ଉର୍ଦ୍ଧ୍ୱ ଦିନ ଧରି ରାସ୍ତା ମଝିରୁ କୌଣସି କାରଣ ବଶତଃ ପ୍ରାୟ ୮ଗୋଟି ଡ୍ରେନ ସ୍ଲାବ ଭାଙ୍ଗି ଯାଇଥିଲା । ଏହି ରାସ୍ତାଟି ତ୍ରି-ଛକି ହୋଇଥିବାରୁ ଏହି ରାସ୍ତା ଦେଇ ପ୍ରତିଦିନ ଶତାଧିକ ଲୋକେ ଶ୍ରୀ ଶ୍ରୀ ସାଇ ବାବାଙ୍କ ମନ୍ଦିର, ପୁରୁଣା ଶିଳ୍ପାଞ୍ଚଳ, ଆଇବି ରୋଡ ବା ଭିଆଇପି ରୋଡ ଓ ବିଶ୍ୱସ୍ତରୀୟ ସାଇ ୱାଟର ସ୍ପୋଟ୍ସକୁ ଯାଇଥାନ୍ତି । ଏହି ରାସ୍ତା ଉପରେ ବହୁ ଜନସାଧାରଣ ନିର୍ଭର କରନ୍ତି । ତେବେ ଦୀର୍ଘ ୨ ମାସରୁ ଉର୍ଦ୍ଧ୍ୱ ଦିନ ହେଲାଣି ଏହି ରାସ୍ତା ମଝିରେ ଯାଇଥିବା ଡ୍ରେନର ସ୍ଲାବ ଭାଙ୍ଗିଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ସ୍ଥାନୀୟ କର୍ପୋରେଟର ଏ ନେଇ ପଦକ୍ଷେପ ନନେବା ଦୁର୍ଭାଗ୍ୟଜନକ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି । ପୂର୍ବରୁ ମୁକୁଳା ଡ୍ରେନରେ ପଡି କେତେ ଲୋକ ନିଜ ଜୀବନ ହରାଇଛନ୍ତି । ତେବେ ସମ୍ପ୍ରତି ଜଗତପୁର ଅଞ୍ଚଳରେ ରାସ୍ତାଘାଟ ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡ଼ିଥିବାବେଳେ ସିଏମସି ମେୟର କଟକ ସହର ପାଇଁ ଯେଉଁ ଡିଣ୍ଡିମ ପିଟୁଛନ୍ତି ତାହା ପାଣିରେ ମିଳେଇ ଯାଉଥିବା ଚର୍ଚ୍ଚା ହେଉଛି । ଗୋଟିଏ ପଟେ ସିଏମସି ମେୟର ସହରର ସମସ୍ତ ସମସ୍ୟାର ତ୍ୱରିତ ସମାଧାନ କରିବା ନିମନ୍ତେ ବିଭିନ୍ନ ୱାର୍ଡ଼ ପରିଦର୍ଶନରେ ଯାଇ ଲୋକଙ୍କ ସହ ମିଶୁଥିବା ବିଭିନ୍ନ ସୋସିଆଲ ମିଡିଆରେ ଭାଇରାଲ ହେଉଛି । ମାତ୍ର ଏହି ଅଞ୍ଚଳ ପ୍ରତି ମେୟର ଦୃଷ୍ଟି ନଦେବା ନେଇ ଅଞ୍ଚଳବାସୀଙ୍କ ଅସନ୍ତୋଷ ତେଜିବାରେ ଲାଗିଛି । ତେଣୁ ସମ୍ପ୍ରତି ମେୟର କେବଳ ଲୋକଦେଖାଣିଆ ପ୍ରଚାର ସର୍ବସ୍ୱ ନୀତିରେ ଜନସାଧାରଣଙ୍କ ସମସ୍ୟା ବୁଝୁଥିବାର ଭିଡିଓ ଏବଂ ଫଟୋ ଭାଇରାଲ କରାଉଥିବାବେଳେ ପ୍ରକୃତରେ ସମସ୍ୟାର ସମାଧାନ ହେଉନଥିବା ସହରବାସୀ ଚର୍ଚ୍ଚା କରୁଛନ୍ତି । ଆଗାମୀ ଦିନରେ ମେୟରଙ୍କ ଯୋଗୁଁ ସରକାରଙ୍କ ଉପରେ ସହରବାସୀଙ୍କ ଆସ୍ଥା ତୁଟୁଥିବା ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି ।