କୁମ୍ଭକର୍ଣ୍ଣ ନିଦ୍ରାରେ ଚୌଦ୍ୱାର ପୌର କର୍ତ୍ତୃପକ୍ଷ: ଫାଇଲରେ ବାନ୍ଧି ହୋଇ ଯାଉଛି ହଇଜା ନିରାକରଣ
ସଫେଇ ବାବଦ ରାଜସ୍ୱ ହଜମ ପାଇଁ ଲୋକପ୍ରତିନିଧିଙ୍କ ପ୍ରତିଯୋଗିତା

ଚୌଦ୍ୱାର(ଏନ୍‌.ଏମ୍‌.) : ଚୌଦ୍ୱାର ପୌରାଞ୍ଚଳରେ ସମ୍ଭାବ୍ୟ ହଇଜା ସଂକ୍ରମଣକୁ ନେଇ ଜନସାଧାରଣ ଆତଙ୍କିତ ଥିବାବେଳେ ପୌର କର୍ତ୍ତୃପକ୍ଷଙ୍କୁ କୁମ୍ଭକର୍ଣ୍ଣ ନିଦ୍ରା ଭାଙ୍ଗୁନଥିବା ଅଭିଯୋଗ ହୋଇଛି। ଏପରିକି ଚୌଦ୍ୱାରର ଜନସାଧାରଣଙ୍କ ଦ୍ୱାରା ନିର୍ବାଚିତ ପ୍ରତିନିଧିମାନେ ମଧ୍ୟ ଅଚିନ୍ତାରେ ରହିବା ଦୁର୍ଭାଗ୍ୟଜନକ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି। ଗୋଟିଏ ପଟେ କିଛି ନିର୍ବାଚିତ ପ୍ରତିନିଧିମାନେ ଆବର୍ଜନା ପରିଚାଳନା କ୍ଷେତ୍ରରୁ କିଭଳି ସରକାରୀ ଅର୍ଥ ବାଟମାରଣା କରିବେ ସେଥିପାଇଁ ପ୍ରତିଯୋଗିତା ଚଳାଇଥିବାବେଳେ ଅନ୍ୟପଟେ ଚୌଦ୍ୱାର ପୌରପାଳିକା ହଇଜାକୁ ଆମନ୍ତ୍ରଣ କରୁଥିବା କୁହାଯାଉଛି। ଚୌଦ୍ୱାର ଅଞ୍ଚଳରେ ନାଳ ନର୍ଦ୍ଦମା ସଫେଇ ବାବଦକୁ ଲକ୍ଷାଧିକ ଟଙ୍କା ବ୍ୟୟ କରାଯାଉଥିବା କାଗଜପତ୍ରରେ ଦର୍ଶାଯାଇଥିବାବେଳେ ଏହାର ପ୍ରକୃତ ସ୍ୱରୂପ ଦେଖିଲେ ସହଜରେ ବୁଝାପଡ଼ିଯାଉଛି ଯେତେ କେତେ ଟଙ୍କା ବାଟମାରଣା ହେଉଛି। ଏପରିକି ସଫେଇ କର୍ମଚାରୀଙ୍କ ମୁଣ୍ଡ ଗଣତି ଅନୁସାରେ ରାଜସ୍ୱ ଖର୍ଚ୍ଚ ହେଉଥିଲେ ସୁଦ୍ଧା ଏଥିରେ ମଧ୍ୟ ବାଟମାରଣା ହେଉଛି ଏବଂ ଏହି ଅର୍ଥ ନିର୍ବାଚିତ ପ୍ରତିନିଧିମାନଙ୍କ ପକେଟକୁ ଯାଉଛି ବୋଲି ଏବେ ବଜାର ଘାଟରେ ଚର୍ଚ୍ଚା ହେଉଛି। ମାତ୍ର ହଇଜା ଭଳି ସଂକ୍ରାମକ ରୋଗ ଦ୍ୱାର ଦେଶରେ ପହଞ୍ଚିଥିଲେ ମଧ୍ୟ କୌଣସି ଆଖିଦୃଶିଆ ପଦକ୍ଷେପ ନିଆଯାଉ ନାହିଁ। କଥାକଥିତ କିଛି ନେତାମାନେ ପୌରପାଳିକାର ମଙ୍ଗ ଧରିଥିଲେ ମଧ୍ୟ କାମ ନକରି କେବଳ ଭାଷଣ ମାଧ୍ୟମରେ ସବୁ ସମସ୍ୟାର ସମାଧାନ କରି ଦେଉଥିବା କୁହାଯାଉଛି। ଅନ୍ୟପକ୍ଷରେ ଚୌଦ୍ୱାର ପୌରପାଳିକାର ଓଟିଏମ କଲୋନୀ ଅଞ୍ଚଳ ସବୁଠାରୁ ଅଧିକ ବିପର୍ଯ୍ୟୟ ହୋଇଥିଲେ ମଧ୍ୟ ପୌର କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଉ ନାହାନ୍ତି। ଏପରିକି ପୌରାଧ୍ୟକ୍ଷାଙ୍କ ପକ୍ଷପାତ ନୀତି ଯୋଗୁଁ ଓଟିଏମ କଲୋନୀର ଏଭଳି ଅବସ୍ଥା ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ତେବେ ସ୍ଥାନୀୟ ବିଧାୟକଙ୍କ ପକ୍ଷପାତ ନୀତି ଯୋଗୁଁ ଓଟିଏମ କଲୋନୀରେ ବସବାସ କରୁଥିବା ଜନସାଧାରଣଙ୍କୁ ମୌଳିକ ସୁବିଧା ମିଳୁନଥିବା କୁହାଯାଉଛି। ସେହିଭଳି ହଇଜା ନିରାକରଣ ଦିଗରେ ସ୍ଥାନୀୟ ଲୋକପ୍ରତିନିଧିଙ୍କ ନିଷ୍କ୍ରିୟତା ଓ ଅଧିକାରୀଙ୍କ ଅପାରଗତା ଯୋଗୁଁ ଖୁବ ଶିଘ୍ର ଚୌଦ୍ୱାରେ ହଇଜା ମହାମାରୀର ରୂପ ନେବ ବୋଲି କୁହାଯାଉଛି। ତେଣୁ ବେଳ ଥାଉ ସାବଧାନ ରହିବା ଜରୁରୀ ହୋଇ ପଡ଼ିଛି।