କିଟ ବିଶ୍ୱବିଦ୍ୟାଳୟ ଛାତ୍ରୀ ମୃତ୍ୟୁ ଘଟଣାର ଉଚ୍ଚସ୍ତରୀୟ ତଦନ୍ତ ଦାବି
ନେପାଳ ଛାତ୍ରଛାତ୍ରୀଙ୍କୁ ଅମାନୁଷିକ ଭାବେ ବିତାଡିତ କରିଥିବା କର୍ତ୍ତୃପକ୍ଷଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନିମନ୍ତେ ଏଆଇଡିଏସଓ ପକ୍ଷରୁ ବିକ୍ଷୋଭ
କଟକ(ଏନ୍.ଏମ୍.): କିଟ ବିଶ୍ୱବିଦ୍ୟାଳୟରେ ଅଧ୍ୟୟନରତ ନେପାଳର ଜଣେ ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ଘଟଣାର ନିରପେକ୍ଷ ଉଚ୍ଚସ୍ତରୀୟ ତଦନ୍ତ କରିବା ସହ ଏଥିରେ ସଂପୃକ୍ତ ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ, ବିଦେଶୀ ଛାତ୍ରଛାତ୍ରୀ ସମେତ ସମସ୍ତ ଛାତ୍ର ଛାତ୍ରୀମାନଙ୍କୁ କ୍ୟାମ୍ପସରେ ସୁରକ୍ଷା ପ୍ରଦାନ, କ୍ୟାମ୍ପସ ଚାରିପଟେ ସମସ୍ତ ମଦ ଓ ମାଦକ ଦ୍ରବ୍ୟ ବିକ୍ରି କରୁଥିବା ଦୋକାନଗୁଡିକ ତୁରନ୍ତ ବନ୍ଦ କରିବା, କ୍ୟାମ୍ପସରେ ଶୈକ୍ଷିକ, ସାଂସ୍କୃତିକ ଓ ଗଣତାନ୍ତ୍ରିକ ବାତାବରଣ ପାଇଁ ପଦକ୍ଷେପ ଗ୍ରହଣ କରିବା ତଥା ଶିକ୍ଷାର ଘରୋଇକରଣ ଓ ବ୍ୟବସାୟୀକରଣ ବନ୍ଦ କରିବା ଦାବିରେ ଏଆଇଡିଏସଓ ପକ୍ଷରୁ ଆଜି କଟକ କଲେଜ ଛକଠାରେ ଏକ ବିକ୍ଷୋଭ ଅନୁଷ୍ଠିତ ହୋଇଯାଇଛି। ଏଆଇଡିଏସଓ ସର୍ବଭାରତୀୟ ସାଧାରଣ ସମ୍ପାଦକ ଶିବାଶିଷ ପ୍ରହରାଜ, ସଂଗଠନର ରାଜ୍ୟ ସମ୍ପାଦକ ସିଦ୍ଧାର୍ଥ ରଥ, ରାଜ୍ୟ ଉପ ସଭାପତି ଭଗ୍ୟରବି ଦାସ, ରାଜ୍ୟ ସମ୍ପାଦକ ମଣ୍ଡଳୀ ସଭ୍ୟ ବିନୋଦ ସେଠୀ, ସଂଗଠନର କଟକ ଜିଲ୍ଲା କମିଟି ସଭାପତି ଈଶା ଧର, କଟକ ଜିଲ୍ଲା ସମ୍ପାଦକ ତରୁଣସେନ ନାୟକ, ଉପ-ସଭାପତି ଶିବାନୀ ସାହୁ, ଛାତ୍ରନେତା ଭଗ୍ୟଶ୍ରୀ ପ୍ରଧାନ ପ୍ରମୁଖ ନେତୃତ୍ୱ ନେଇଥିଲେ। ଏହି ଛାତ୍ରୀ ମୃତ୍ୟୁ ଘଟଣାରେ ମର୍ମାହତ ପ୍ରତିବାଦକାରୀ ନେପାଳର ଛାତ୍ରଛାତୀମାନଙ୍କ ଉପରେ ବିଶ୍ୱବିଦ୍ୟାଳୟର କର୍ତ୍ତୃପକ୍ଷଙ୍କ ଅମାନବୀୟ ବର୍ବର ଆକ୍ରମଣ, ଧମକ ଓ ସେମାନଙ୍କୁ ଜୋରଜବରଦସ୍ତ ହଷ୍ଟେଲରୁ ବାହାର କରି ବିଶ୍ୱବିଦ୍ୟାଳୟ ବସରେ ନେଇ କଟକ ରେଳ ଷ୍ଟେସନରେ ଛାଡିବା ଘଟଣାକୁ ବକ୍ତାମାନେ ତୀବ୍ର ନିନ୍ଦା କରିଥିଲେ। ବକ୍ତାମାନେ କହିଥିଲେ ଯେ, ଏହି ଅମାନବୀୟ ନୃଶଂସ ଘଟଣା ଶିକ୍ଷାର ଘରୋଇକରଣ ଓ ବ୍ୟବସାୟୀକରଣର କ୍ରୁର ପରିଣତି ଅଟେ। ଏହାଦ୍ୱାରା ଛାତ୍ରଛାତ୍ରୀମାନଙ୍କ ଜୀବନ ନଷ୍ଟ ହେବା ସହ ଭାରତର ଗଣତାନ୍ତ୍ରିକ ଭାବମୂର୍ତ୍ତି କ୍ଷୁର୍ଣ୍ଣ ହେବ ଏବଂ ବିଦେଶରେ ପଢୁଥିବା ଭାରତୀୟ ଛାତ୍ରଛାତ୍ରୀମାନଙ୍କ ପାଇଁ ବିପଦ ସୃଷ୍ଟି ହେବ। ଏଣୁ ଉପରୋକ୍ତ ଦାବି ପୂରଣ ପାଇଁ ଏଆଇଡିଏସଓ ପକ୍ଷରୁ କୁହାଯାଇଛି ନଚେତ ବ୍ୟାପକ ଛାତ୍ର ଆନ୍ଦୋଳନ ଗଢ଼ି ତୋଳିବା ପାଇଁ ସଂଗଠନ ପକ୍ଷରୁ ଚେତାବନୀ ଦିଆଯାଇଛି।