କଟକ ଜିଲ୍ଲା ସାଧାରଣ ନିର୍ବାଚନର ପ୍ରାର୍ଥୀଙ୍କ ସହ ପର୍ଯ୍ୟବେକ୍ଷକଙ୍କ ବୈଠକ
ସ୍ୱଚ୍ଛ ଓ ଅବାଧ ନିର୍ବାଚନ ନିମନ୍ତେ ପର୍ଯ୍ୟବେକ୍ଷକମାନଙ୍କ ଗୁରୁତ୍ୱାରୋପ

କଟକ(ଏନ୍‌.ଏମ୍‌.): ଏକକାଳୀନ ସାଧାରଣ ନିର୍ବାଚନ-୨୦୨୪ ନିମନ୍ତେ ଜିଲ୍ଲାକୁ ଆସିଥିବା ସମସ୍ତ ନିର୍ବାଚନ ପର୍ଯ୍ୟବେକ୍ଷକଙ୍କୁ ନେଇ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଏକ ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲାର ବିଭିନ୍ନ ନିର୍ବାଚନ ମଣ୍ଡଳୀରେ ପ୍ରତିଦ୍ୱନ୍ଦିତା କରୁଥିବା ପ୍ରାର୍ଥୀ ଏବଂ ତାଙ୍କ ପ୍ରତିନିଧିମାନଙ୍କ ସହ ଏକ ବୈଠକରେ ମିଳିତ ହୋଇ ସ୍ୱଚ୍ଛ ତଥା ଅବାଧ ନିର୍ବାଚନ ପରିଚାଳନା ନିମନ୍ତେ ପରାମର୍ଶ ଦେବା ସହ ସେମାନଙ୍କର ବିଭିନ୍ନ ପ୍ରଶ୍ନର ଉତ୍ତର ରଖିଥିଲେ । ବୈଠକ ପ୍ରାରମ୍ଭରେ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଅରିନ୍ଦମ ଡାକୁଆ ନିମନ୍ତ୍ରିତ ପ୍ରତିନିଧୀମାନଙ୍କର ପର୍ଯ୍ୟବେକ୍ଷକମାନଙ୍କ ସହ ପରିଚୟ କରାଇଥିଲେ । ପର୍ଯ୍ୟବେକ୍ଷକମାନେ ରାଜ୍ୟ ବାହାରୁ ଆସିଥିବା ନିରପେକ୍ଷ ବରିଷ୍ଠ ଅଧିକାରୀ ହୋଇଥିବାରୁ ଆଗାମୀ ଦିନରେ ପ୍ରାର୍ଥୀ ବା ତାଙ୍କ ପ୍ରତିନିଧିମାନେ ଅନ୍ତତଃ ହିନ୍ଦୀ କିମ୍ବା ଇଂରାଜୀରେ ବାର୍ତ୍ତାଳାପ କରିବା ନିମନ୍ତେ ଜିଲ୍ଲାପାଳ ଶ୍ରୀ ଡାକୁଆ ଆଶା ପୋଷଣ କରିଥିଲେ । ନିର୍ବାଚନରେ କୌଣସି ପ୍ରକାରର ଗଣ୍ଡଗୋଳକୁ ପ୍ରଶୟ ନଦେବା ପାଇଁ ପ୍ରାର୍ଥୀମାନେ ନିଜନିଜ ନିର୍ବାଚନ ମଣ୍ଡଳୀର ଚିନ୍ତା ଜନକ ବୁଥ ଅଞ୍ଚଳ ବିଷୟରେ ରିଟର୍ଣ୍ଣିଂ ଅଧିକାରୀଙ୍କୁ ତୁରନ୍ତ ଜଣାଇବା ନିମନ୍ତେ ସାଧାରଣ ପର୍ଯ୍ୟବେକ୍ଷକ ବରିଷ୍ଠ ଭାରତୀୟ ପ୍ରଶାସନିକ ଅଧିକାରୀ ଉମା ଶଙ୍କର ସିଂହ ପରାମର୍ଶ ଦେଇଥିଲେ । ଖର୍ଚ୍ଚ ପର୍ଯ୍ୟବେକ୍ଷକ ଆଇ.ଆର.ଏସ ଅଧିକାରୀ ପିୟୁଷ ବାରାସୁ ବାଧେ ପ୍ରାର୍ଥୀପତ୍ର ଦାଖଲ ପୂର୍ବରୁ ନିର୍ବାଚନ ନିମନ୍ତେ କରିଥିବା ଖର୍ଚ୍ଚ ମଧ୍ୟ ନିଜ ଖର୍ଚ୍ଚ ତାଲିକାରେ ଯୋଗ କରିବା ନିମନ୍ତେ ପାର୍ଥୀମାନଙ୍କୁ କହିଥିଲେ । ସେହିପରି ଖର୍ଚ୍ଚ ପର୍ଯ୍ୟବେକ୍ଷକ ଆଇ.ଆର.ଏ.ଏସ. ସୁପ୍ରିୟା ସୁରେନ୍ଦ୍ରନାଥ ଘାଗ୍ ଖର୍ଚ୍ଚ ଲିପିବଦ୍ଧ ନିମନ୍ତେ ପ୍ରାର୍ଥୀମାନଙ୍କୁ ଦିଆଯାଇଥିବା ରେଜିଷ୍ଟରରେ ନିର୍ଦ୍ଧିଷ୍ଟ ରଙ୍ଗର ପୃଷ୍ଠାରେ ନିର୍ଦ୍ଦେଶିତ ପରିମାଣ ଲିପିବଦ୍ଧ କରିବା ସହ ଆବଶ୍ୟକୀୟ ଭାଉଚର ସଂଲଗ୍ନ କରିବା ପାଇଁ କହିଥିଲେ । ପୁଲିସ ପର୍ଯ୍ୟବେକ୍ଷକ ବରିଷ୍ଠ ଆଇ.ପି.ଏସ ଅଧିକାରୀ ଆର. ଶିବ କୁମାର ନିର୍ବାଚନରେ ଶୃଙ୍ଖଳିତ ଆଚରଣ ପ୍ରଦର୍ଶନ ସହ କୌଣସି ନିୟମ ବିରୁଦ୍ଧ କାର୍ଯ୍ୟର ସୂଚନା ତୁରନ୍ତ ଜଣାଇବା ନିମନ୍ତେ ପ୍ରାର୍ଥୀମାନଙ୍କୁ କହିଥିଲେ । ସଭା/ଶୋଭାଯାତ୍ରା ନିମନ୍ତେ ଆବଶ୍ୟକୀୟ ଅନୁମତି ପତ୍ର ନେବାକୁ ସେ ମଧ୍ୟ ପରାମର୍ଶ ଦେଇଥିଲେ । ବରିଷ୍ଠ ଆଇ.ଏ.ଏସ ଅଧିକାରୀ ସାଧାରଣ ପର୍ଯ୍ୟବେକ୍ଷକ ଗୁରାଲା ଶ୍ରୀନିବାସୁଲୁ ପ୍ରାର୍ଥୀମାନଙ୍କୁ ସି-ଭିଜିଲ ଆପର ବ୍ୟବହାର ସହ ସୋସିଆଲ ମିଡିଆ ପ୍ରଚାର ନିମନ୍ତେ ଏମସିଏମସିର ଅନୁମତି ନେବାକୁ ଉପଦେଶ ଦେଇଥିଲେ । ପ୍ରଚାରରେ ବ୍ୟବହୃତ ପୋଷ୍ଟର, ପାମ୍ପଲେଟ ଆଦିରେ ପ୍ରକାଶକ/ମୁଦ୍ରକଙ୍କ ନାମ ନିଶ୍ଚିନ୍ତ ଉଲ୍ଲେଖ ନିମନ୍ତେ ସେ କହିଥିଲେ । ପ୍ରାର୍ଥୀମାନଙ୍କର ଖର୍ଚ୍ଚର ହିସାବ ଚଳିତ ମାସ ୧୧ତାରିଖ, ୧୬ତାରିଖ ଏବଂ ୨୨ତାରିଖରେ ପର୍ଯ୍ୟବେକ୍ଷକମାନେ ତଦାରଖ କରିବା ପାଇଁ ସ୍ଥିରୀକୃତ ହୋଇଛି । ବୈଠକରେ ଅନ୍ୟମାନଙ୍କ ମଧ୍ୟରେ ଡିସିପି ପ୍ରକାଶ ଆର., ଏସପି ଏଲ. ଦିବ୍ୟା, ଅତିରିକ୍ତ ଜିଲ୍ଲାପାଳ ଶିବ ଟପୋ, ମୁଖ୍ୟ ଉନ୍ନୟନ ଅଧିକାରୀ ସୁବାସ ଚନ୍ଦ୍ର ରାୟ, ସଦର ଉପଜିଲ୍ଲାପାଳ ଜ୍ୟୋତିଶଙ୍କର ରାୟ ପ୍ରମୁଖ ଉପସ୍ଥିତ ରହି ଆବଶ୍ୟକୀୟ ସୂଚନା ପ୍ରଦାନ କରିଥିଲେ ।