କଟକ ଜିଲ୍ଲାରେ ଅର୍ପଣ ରଥ ପରିକ୍ରମାର ପଞ୍ଚମ ଦିନ: ହୁଳୁହୁଳି ଓ ଶଙ୍ଖଧ୍ୱନି ସହ ଭବ୍ୟ ସ୍ୱାଗତ
#କଟକ(ଏନ୍.ଏମ୍.): ଆସନ୍ତା ୧୭ ତାରିଖରେ ଲୋକାର୍ପିତ ହେବାକୁ ଥିବା ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ରାଜ୍ୟର ପ୍ରତ୍ୟେକ ଘରୁ ସଂଗ୍ରହ ହେଉଛି ଗୁଆ ଓ ଚାଉଳ । ଏଥିପାଇଁ ଜୟ ଜଗନ୍ନାଥ ଅର୍ପଣ ରଥ ଘରକୁ ଘର ବୁଲି ଗୁଆ ଓ ଚାଉଳ ସଂଗ୍ରହ କରୁଛି । ଅତ୍ୟନ୍ତ ଉତ୍ସାହ ଉଦ୍ଦୀପନାର ସହ ରଥକୁ ସ୍ୱାଗତ କରିବା ସହ ସ୍ୱଇଚ୍ଛାରେ ଲୋକେ ଅର୍ପଣ କରୁଛନ୍ତି ଗୁଆ ଓ ଅରୁଆ ଚାଉଳ । ଭାବ ଭକ୍ତିର ପରିବେଶ ମଧ୍ୟରେ ବଡଠାକୁରଙ୍କ ପାଇଁ ଶ୍ରଦ୍ଧାର ନୈବେଦ୍ୟ ଅର୍ପଣ କରୁଛନ୍ତି ଶ୍ରଦ୍ଧାଳୁ । ହରିବୋଲ ହୁଳହୁଳି ସାଙ୍ଗକୁ ଜୟ ଜଗନ୍ନାଥ ଧ୍ୱନିରେ ରଥକୁ ସ୍ୱାଗତ କରାଯାଉଛି । କେଉଁଠି ଝୋଟି, ଚିତା ତ ପୁଣି କେଉଁଠି ପୂର୍ଣ୍ଣ କୁମ୍ଭ ବସାଇ ରଥକୁ ଜୟ ଜଗନ୍ନାଥ ରଥକୁ ପୋଛୋଟି ନେଉଛନ୍ତି ଗ୍ରାମବାସୀ ।
ଆଜି କଟକ ମହାନଗର ନିଗମ ସମେତ ଜିଲ୍ଲାର ବିଭିନ୍ନ ଗ୍ରାମ ପଞ୍ଚାୟତ ପରିଭ୍ରମଣ କରି ଅର୍ପଣ ରଥ ଗୁଆ ଓ ଅରୁଆ ଚାଉଳ ସଂଗ୍ରହ କରିଛି । ଜୟ ଜଗନ୍ନାଥ ଅର୍ପଣ ରଥ ଭ୍ରମଣର ପଞ୍ଚମ ଦିବସ ସୁଦ୍ଧା ସିଏମସି ଅନ୍ତର୍ଗତ ବିଭିନ୍ନ ୱାର୍ଡ଼ ସମେତ ଜଗତପୁର ଅଞ୍ଚଳରେ ଆଜି ସକାଳ ୯ ଘଟିକାରୁ ଶୂନ୍ୟବ୍ରହ୍ମ ଆଶ୍ରମରୁ ପରିକ୍ରମା ରଥ ବାହାରି ଶିକାରୀ ପୁର, ନଜରପୁର, ଭୂବନପୁର, ଫକିରପୁର, ଲକ୍ଷ୍ମଣପୁର ଓ ପୁରୁଣା ଜଗତପୁର ବିଭିନ୍ନ ସାହି ପରିକ୍ରମା କରିଥିଲା । ସେହିଭଳି ଚୌଦ୍ୱାର ପୌରାଞ୍ଚଳ ସହିତ ଆଠଗଡ଼ ବ୍ଲକରେ ୨୪ ଗୋଟି, ବଡମ୍ବା ବ୍ଲକରେ ୨୮ଗୋଟି, ବାଙ୍କି ବ୍ଲକରେ ୧୬ଗୋଟି, ବାଙ୍କି-ଡମପଡା ବ୍ଲକରେ ୧୪ଗୋଟି, ବାରଙ୍ଗ ବ୍ଲକରେ ୧୬ଗୋଟି, କଟକ ସଦର ବ୍ଲକରେ ୨୦ଗୋଟି, କଣ୍ଟାପଡା ବ୍ଲକରେ ୧୪ଗୋଟି, ମାହାଙ୍ଗା ବ୍ଲକରେ ୩୭ଗୋଟି, ନରସିଂହପୁର ବ୍ଲକରେ ୩୦ଗୋଟି, ନିଆଳି ବ୍ଲକରେ ୧୯ଗୋଟି, ନିଶ୍ଚିନ୍ତକୋଇଲି ବ୍ଲକରେ ୩୯ଗୋଟି, ସାଲେପୁର ବ୍ଲକର ୨୯ଗୋଟି, ଟାଙ୍ଗୀ-ଚୌଦ୍ୱାର ବ୍ଲକରେ ୨୪ଗୋଟି, ତିଗିରିଆ ୧୪ଗୋଟି ଗ୍ରାମପଞ୍ଚାୟତରେ ଏହି ରଥ ପରିଭ୍ରମଣ କରିଛି ।