କଟକ ଜିଆରପି ଏସ୍ପିଙ୍କୁ ଅବସର କାଳୀନ ବିଦାୟ ସମ୍ବର୍ଦ୍ଧନା
#କଟକ(ଏନ୍.ଏମ୍.): କଟକ ରେଳବାଇ ପୁଲିସ କନେଷ୍ଟବଳ, ହାବିଲଦାର ସଂଘ ପକ୍ଷରୁ ଏସ୍ଆରସି ସୁନିଲ ଆଚାର୍ଯ୍ୟଙ୍କୁ ଅବସର କାଳୀନ ବିଦାୟ ସମ୍ବର୍ଦ୍ଧନା ଦିଆଯାଇଛି । ଏହି ଅବସରରେ ସମସ୍ତ ଅଧସ୍ତନକର୍ମଚାରୀମାନେ ଭାବ ବିହ୍ୱଳ ହୋଇ ପଡ଼ିବା ସହ ସମ୍ବର୍ଦ୍ଧନା ବେଳେ କାନ୍ଦି ପକାଇଥିଲେ । ଶ୍ରୀ ଆଚାର୍ଯ୍ୟ କନେଷ୍ଟବଳ ଓ ହାବିଲଦାରମାନଙ୍କୁ ନିଜ ଭାଇ ଭଳି ସ୍ନେହ କରୁଥିଲେ ବୋଲି ସଭାରେ କର୍ମଚାରୀମାନେ ମତବ୍ୟକ୍ତ କରିଥିଲେ । କଟକ ଜିଆରପି ଜୋନର ତଥା କଟକ ଜିଲ୍ଲା ରେଳବାଇ ପୁଲିସ୍ ଆରକ୍ଷୀ ଅଧିକ୍ଷକ ଭାବେ ଶ୍ରୀ ଆଚାର୍ଯ୍ୟ ଗତ ୨୦୨୨ ମସିହା ମେ ମାସ ୧୫ ତାରିଖରେ ଦାୟିତ୍ୱ ଗ୍ରହଣ କରିଥିଲେ । ସେ ଆଜି ପର୍ଯ୍ୟନ୍ତ ତାଙ୍କ ଚାକିରୀ ଜୀବନରେ ସମସ୍ତ ତଳ ଶ୍ରେଣୀ କର୍ମଚାରୀମାନଙ୍କ ର ସୁବିଧା ଅସୁବିଧା ବୁଝିବା ସହ ସମସ୍ତଙ୍କ ସହିତ ଭଲ ସଦଭାବନା ରଖି ନିଜର ଗୁରୁ ଦାୟିତ୍ୱ ନିର୍ବାହ କରିଥିଲେ । ସେ ତାଙ୍କର ବିଦାୟକାଳୀନ ସମ୍ବର୍ଦ୍ଧନା ସଭାରେ ସେ କର୍ମଚାରୀଙ୍କ ଉଦ୍ଦେଶ୍ୟରେ ଏକ ଗୁରୁତ୍ୱପୂର୍ଣ୍ଣ କଥା କହି ସେମାନଙ୍କୁ ଉତ୍ତମ ତଥା କର୍ତ୍ତବ୍ୟପରାୟଣ କର୍ମଚାରୀ ଭାବେ ଦାୟିତ୍ୱ ନିର୍ବାହ କରିବାକୁ ପରାମର୍ଶ ଦେଇଥିଲେ । ସେ ପୁଣି କହିଲେ ଯେ, ସମାଜ ବ୍ୟାକରଣରେ ତୁମେ ଯଦି ଗୋଟିଏ ଦୁର୍ମୂଲ୍ୟ ବିଶେଷଣ ହୋଇ ପାରିନାହଁ ତେବେ ତୁମେ ସମାଜ ପାଇଁ କିଛି ନୁହେଁ । ତେଣୁ ନିଜର ନିଷ୍ଠା ଓ ପରାକାଷ୍ଠା ଜରିଆରେ ଆଗକୁ ବଢ଼ିବାକୁ ଉଦ୍ୟମ କର ଭବିଷ୍ୟତ ଉଜ୍ଜ୍ୱଳମୟ ହେବ ବୋଲି କହିଥିଲେ । ଏହି ସମ୍ବର୍ଦ୍ଧନା ଉତ୍ସବରେ କଟକ ଜିଆରପି କନେଷ୍ଟବଳ ଓ ହାବିଲଦାର ସଂଘ ସଭାପତି ମାନସ କୁମାର ବାରିକ, ସମ୍ପାଦକ ରଜନୀକାନ୍ତ ବିଶ୍ୱାଳ ଏବଂ ଅନ୍ୟ ଉଚ୍ଚ ପଦସ୍ଥ ଅଧିକାରୀଙ୍କ ସମେତ ବହୁ କନେଷ୍ଟବଳ ଓ ହାବିଲଦାର ଉପସ୍ଥିତ ରହି ଏସପି ଶ୍ରୀ ଆଚାର୍ଯ୍ୟଙ୍କୁ ବିଦାୟକାଳୀନ ସମ୍ବର୍ଦ୍ଧନା ଦେଇଥିଲେ ।