କଟକରେ ୮ ଦଶନ୍ଧିର ହୋଟେଲ ସମ୍ବର୍ଦ୍ଧିତ

କଟକ(ଏନ୍‌.ଏମ୍‌.): ବର୍ଷେ କି ୫ ବର୍ଷ ନୁହେଁ। ୧୦ କି ୨୦ ବର୍ଷ ନୁହେଁ। ସିଲଭର ସିଟି କଟକରେ କଟିଲାଣି ୮୦ ବର୍ଷ। ଦୀର୍ଘ ୮ଦଶନ୍ଧି ଧରି କଟକର ଇତିହାସକୁ ବଖାଣୁଛି ପୁରୁଣା ଜେଲରୋଡ଼ର ହୋଟେଲ ସ୍ୱରାଜ। ବଦଳିଛି ସମୟ। ବଦଳିଛି ପରିବେଶ ଆଉ ପରିସ୍ଥିତି। ହେଲେ ସେହି ପୁରୁଣା ଢାଞ୍ଚାରେ ଏବେବି ନିଜର ସତାକୁ ବଞ୍ଚାଇ ରଖିଛି ହୋଟେଲ ସ୍ୱରାଜ। ଯାହାକୁ ମନେପକାଇଛି କଟକର ଇନଟାକ ଅନୁଷ୍ଠାନ। ବହୁ ପୁରୁଣା ହୋଟେଲ ଭାବରେ ଦେଇଛି ଗୁରୁତ୍ୱ। ଆଉ ମାନ୍ୟତା ସ୍ୱରୁପ ଏକ ବର୍ଣ୍ଣାଢ୍ୟ ପରିବେଶରେ ହୋଟେଲ ମାଲିକ କିଶୋର ମହାନ୍ତି(ବାଦୁ)ଙ୍କୁ କରାଯାଇଛି ସମ୍ବର୍ଦ୍ଧିତ।୧୯୪୫ ମସିହାରେ କଟକ ଦରଘା ବଜାର ଠାରେ ସ୍ୱର୍ଗତ ରାମଚନ୍ଦ୍ର ମହାନ୍ତି ଖୋଲିଥିଲେ ହୋଟେଲ ସ୍ୱରାଜ। ହୋଟେଲ ସାମ୍ନାରେ ଥିଲା ଜେଲ। ହୋଟେଲ ନାଁ ଯେମିତି ହୋଟେଲ ମାଲିକଙ୍କର ଆଚାର ବ୍ୟବହାର ଥିଲା ତାଠାରୁ ଅଧିକ ହୃଦୟସ୍ୱର୍ଶୀ। ସ୍ୱାଧୀନତା ପୂର୍ବର ଏହି ହୋଟେଲ ସାଜିଥିଲା ଅନେକଙ୍କର ସାହାଭରସା। ସ୍ୱାଧୀନତା ସଂଗ୍ରାମୀଙ୍କ ପରିବାର ଲୋକେ ହୁଅନ୍ତୁ ଅବା ସାଧାରଣ ଲୋକ। ପ୍ରାୟତଃ ସମସ୍ତେ ଏଠାରେ ଅଟକି ଯାଉଥିଲେ କିଛି ସମୟ ପାଇଁ। ସେତେବେଳେ ଖାଦ୍ୟର ମହକ ବାନ୍ଧି ରଖିଥିଲା ଗ୍ରାହକଙ୍କୁ। ନିଜର ସ୍ଥିତି ଅନୁସାରେ ମାଲିକ ରାମଚନ୍ଦ୍ର ଚଳାଇଥିଲେ ହୋଟେଲ। ଆଉ ତାଙ୍କ ଦେହାନ୍ତ ପରେ ହୋଟେଲର ଦାୟିତ୍ୱ ନେଇଥିଲେ ରାମଚନ୍ଦ୍ରଙ୍କ ବଡ଼ପୁଅ ପ୍ରଶାନ୍ତ ମହାନ୍ତି। ସେ କିଛି ବର୍ଷ ହୋଟେଲ ଚଳାଇବା ପରେ ତାଙ୍କର ମଧ୍ୟ ହୋଇଥିଲା ଦେହାନ୍ତ। ପ୍ରଶାନ୍ତଙ୍କ ଦେହାନ୍ତ ପରେ ସାନଭାଇ କିଶୋର ହୋଟେଲର ନେଇଥିଲେ ଦାୟିତ୍ୱ। ଆଉ ବାପାଙ୍କ ସ୍ୱପ୍ନକୁ ପୁଅ କିଶୋର କରୁଛନ୍ତି ସାକାର। ଦୀର୍ଘ ୮୦ ବର୍ଷର ଲମ୍ବା ସମୟ। ଯାହାର ସୁଫଳ ଏବେ ଦେଇଛନ୍ତି କଟକବାସୀ। ସ୍ୱର୍ଗତ ରାମଚନ୍ଦ୍ରଙ୍କ ନିଷ୍ଠା ଆଉ କର୍ତବ୍ୟକୁ ଯଥେଷ୍ଟ ସମ୍ମାନ ଦେଇଛନ୍ତି ପୁଅ କିଶୋର। ସର୍ବପୁରାତନ ହେରିଟେଜ ହୋଟେଲ ଭାବରେ ସ୍ୱରାଜକୁ କରାଯାଇଛି ସମ୍ମାନିତ। ଏବେ ବି କାଠ ଚୁଲିରେ ହେଉଛି ହୋଟେଲରେ ରୋଷେଇ। ଖାଲି ରୋଷେଇ ନୁହେଁ ପୁରୁଣା କାଠର ଆସବାବପତ୍ର ବି ସ୍ମୃତି ବହନ କରୁଛି ହୋଟେଲର। ହେଟେଲରେ ନାହିଁ ଫ୍ରିଜ କି ରୋଷେଇରେ ବ୍ୟବହାର ହେଉନି ଅତ୍ୟାଧୁନିକ ମସଲା। ତଥାପି ହୋଟେଲ ସ୍ୱରାଜ ବଜାୟ ରଖିଛି ନିଜର ସ୍ୱତନ୍ତ୍ରତା। ଏଭଳି ସ୍ୱତନ୍ତ୍ରତା ବହନ କରୁଥିବା ହୋଟେଲ ମାଲିକଙ୍କ ଦିଆଯାଇଛି ସ୍ୱତନ୍ତ୍ର ମର୍ଯ୍ୟାଦା। ବିଶିଷ୍ଠ ଇତିହାସ ଗବେଷକ ଅନିଲ କୁମାର ଧିର ହୋଟେଲ ମାଲିକ କିଶୋର ଓରଫ ବାଦୁଙ୍କୁ କରିଛନ୍ତି ସମ୍ବର୍ଦ୍ଧିତ। କାର୍ଯ୍ୟକ୍ରମରେ ଶ୍ରୀ ଧିରଙ୍କ ସମେତ ଅନ୍ୟମାନେ ହୋଇଥିଲେ ସାମିଲ। ଉତ୍ତରୀୟ, ପୁଷ୍ପଗୁଚ୍ଛ ,ପ୍ରଶଂସା ଫଳକ ସହ ମାନପତ୍ର ଦେଇ କିଶୋରଙ୍କୁ କରିଥିଲେ ସମ୍ବର୍ଦ୍ଧିତ। ବାସ୍ତବରେ ହୋଟେଲ ସ୍ୱରାଜ ଏବେ ବି ତାର ଗୌରବ ଆଉ ସ୍ଥିତି ବଜାୟ ରଖିଛି ଏଥିରେ ସନ୍ଦେହ ନାହିଁ।