କଟକରେ ଡ୍ରେନ ପାଲଟିଛି ମରଣ ଫାନ୍ଦ: ୧୦ ଲକ୍ଷ ଟଙ୍କା ଦାବିରେ ମୃତଦେହ ରଖି ସିଏମସି ଘେରିଲେ ପରିବାର ଲୋକେ

#କଟକ(ଏନ୍‌.ଏମ୍‌.): କଟକ ସହରର ବିକାଶ ପାଇଁ ଅନେକ ପ୍ରକଳ୍ପ ଆରମ୍ଭ ହୋଇଥିବାବେଳେ ଏବେ ତାହା ବିନାଶର କାରଣ ହୋଇଛି । ବିଶେଷ କରି କଟକ ସହରରୁ ବର୍ଜ୍ୟଜଳ ନିଷ୍କାସନ ପାଇଁ ଜାଇକା ପ୍ରକଳ୍ପ ସହିତ ବକ୍ସ ଡ୍ରେନ ନିର୍ମାଣ ଚାଲିଛି । ମାତ୍ର ପ୍ରକଳ୍ପ କାର୍ଯ୍ୟ କରୁଥିବା ସଂସ୍ଥାର ଖାମଖିଆଲି କାର୍ଯ୍ୟ ଯୋଗୁଁ ଦୁର୍ଘଟଣାରେ ଏକାଧିକ ଲୋକଙ୍କ ପ୍ରାଣ ହାନୀ ଘଟିଛି । ଏଭଳି ଘଟଣା ବାରମ୍ବାର ଘଟୁଥିଲେ ମଧ୍ୟ ସିଏମସି, କିମ୍ବା ଠିକା ସଂସ୍ଥା ଏ ନେଇ କେହିବି ସଜାଗ ନହେବାରୁ ଏଭଳି ଅଘଟଣ ବାରମ୍ବାର ଘଟୁଛି । ଗତ ବୁଧବାର ଦିନ ଦରଘାବଜାର ଥାନା ଅନ୍ତର୍ଗତ ବାରପଥର ଅଞ୍ଚଳରେ ନାଳରେ ପଡ଼ି ଜଣେ ସଫେଇ କର୍ମଚାରୀ ପି. ନରସିଂହାଙ୍କ ମୃତ୍ୟୁ ଘଟଣାକୁ କେନ୍ଦ୍ର କରି ମୃତକଙ୍କ ପରିବାର ଲୋକେ ସିଏମସି ବିଜୁଭବନ କାର୍ଯ୍ୟାଳୟ ମୁଖ୍ୟ ଫାଟକ ଆଗରେ ମୃତଦେହ ରଖି ୧୦ଲକ୍ଷ ଟଙ୍କା କ୍ଷତି ପୂରଣ ଦାବି କରିଛନ୍ତି । ତେବେ ସିଏମସି ସମ୍ମୁଖରେ ଦୀର୍ଘ ସମୟ ଧରି ଶବରଖି ଧାରଣା ଚାଲିଥିବାବେଳେ ଅନ୍ୟପଟେ ସିଏମସି ସୁରକ୍ଷା ପାଇ ପୁଲିସ ମୁତୟନ କରାଯାଇଛି । ତେବେ ମୃତକଙ୍କ ଏସସିବି ବଡ଼ମେଡିକାଲରେ ଶବ ବ୍ୟବଛେଦ ପରେ ସିଏମସି ଆଗକୁ ମୃତଦେହକୁ ଆଣି ନ୍ୟାୟ ଦାବି କରିଛନ୍ତି ପରିବାର ଲୋକ । ତେବେ ବୁଧବାର ଦିନ ପ୍ରଭାତ ସିନେମାସ୍ଥିତ ବାରପଥର ଠାରେ ମୁଖ୍ୟ ନାଳରେ ଜଣେ ଶ୍ରମିକ ପଡ଼ି ଯାଇ ମୃତ୍ୟୁବରଣ କରିଥିଲେ । ଘଟଣାରୁ ଜଣା ପଡ଼ିଥିଲା ଯେ, ମୁଖ୍ୟ ନାଳରେ ପଶି ପଙ୍କ ଉଦ୍ଧାର ବେଳେ ନାଳ ଭିତରକୁ ଖସି ଯାଇଥିଲେ । ସ୍ଥାନୀୟ ଲୋକ ତାଙ୍କୁ ମୃତ ଅବସ୍ଥାରେ ଉଦ୍ଧାର କରିଥିଲେ । ଜାଇକା କର୍ତ୍ତୃପକ୍ଷ ନାଳ ସଫା ପାଇଁ ତାଙ୍କୁ ୧ହଜାର ଟଙ୍କା ପାରିଶ୍ରମିକ ଦେଇ ନାଳ ସଫା ପାଇଁ ଡାକିକି ଆଣିଥିଲେ । ସକାଳେ ନାଳ ସଫା କରିବା ପରେ ସେ ଘରକୁ ଫେରି ପୁନର୍ବାର ଦିନ ଦୁଇଟା ବେଳେ ନାଳ ସଫା କରିବାକୁ ଆସିଥିଲେ । ଦୁଇ ଜଣ ଯୁବକ ନାଳ ସଫେଇ କରୁଥିଲେ । ମାତ୍ର ପି. ନରସିଂହା ନାଳ ସଫେଇ କରିବାକୁ ଯାଇ ନାଳ ଭିତରକୁ ଖସି ପଡ଼ିବାରୁ ତାଙ୍କର ମୃତ୍ୟୁ ଘଟିଲା । ତାଙ୍କ ମୃତ ଦେହକୁ ପୁଲିସ ଉଦ୍ଧାର କରି ଶବ ବ୍ୟବଚ୍ଛେଦ ଲାଗି କଟକ ବଡମେଡିକାଲକୁ ପଠାଇଥିଲେ । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ବେଶ ଉତ୍ତେଜନା ପ୍ରକାଶ ପାଇଥିଲା । ଏମିତକି ରାସ୍ତା ଉପରେ ଟାୟାର ଜାଳି ରାସ୍ତା ରୋକ କରିଥିଲେସ୍ଥାନୀୟ ଜନତା । ତେବେ ଏହି ଘଟଣାରେ ପ୍ରତିକ୍ରିୟା ରଖିଛନ୍ତି କଟକ ମେୟର ସୁବାସ ସିଂହ ଓ କମିଶନର ନିଖିଳ ପୱନ କଲ୍ୟାଣ । ଯେଉଁ ବ୍ୟକ୍ତି ବିଶେଷଙ୍କ ମୃତ୍ୟ ହୋଇଛି ସେ ସିଏମସି ଅଧୀନରେ ଆସୁ ନାହାନ୍ତି । କିନ୍ତୁ ତଥାପି ସିଏମସି ପକ୍ଷରୁ ଏହି ଦିଗରେ ଆହୁରି ତର୍ଜମା କରାଯାଉଛି । ଠିକା ସଂସ୍ଥା ଅଧୀନରେ ଯେଉଁ କାର୍ଯ୍ୟ କରୁଥିଲେ ବୋଲି ପରିବାର କହୁଛନ୍ତି ତାହା ମଧ୍ୟ ଆଲୋଚନା ଜାରି ରହିଛି । ଗତ ଚାରିଦିନ ପୂର୍ବେ ସେହିଭଳି ଝୋଲାସାହିରେ ଖୋଲା ନାଳରେ ପଡ଼ି ଜଣଙ୍କ ମୃତ୍ୟୁ ଘଟିଥିଲା । ଆଉ ବୁଧବାର ବାରପଥରସ୍ଥିତ ମୁଖ୍ୟ ନାଳ ଖୋଲା ଡ୍ରେନରେ ସଫେଇ କରିବାକୁ ଆସି ଜଣେ ଶ୍ରମିକଙ୍କ ମୃତ୍ୟୁ ଘଟଣା କଟକ ସହରରେ ବେଶ୍ ଆଲୋଡନ ସୃଷ୍ଟି କରିଛି । ଜାଇକା କର୍ତ୍ତୃପକ୍ଷଙ୍କ ଅବହେଳା ଓ ଦାୟିତ୍ୱହୀନ ଯୋଗୁଁ ଏହି ଭଳି ଦୁର୍ଘଟଣା ବାରମ୍ବାର ଘଟୁଛି ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି । ଏଥି ସହିତ ସିଏମସିକୁ ଦାୟୀ କରାଯାଇଛି । ଅନ୍ୟପଟେ ଯେ, ପର୍ଯ୍ୟନ୍ତ ମୃତକଙ୍କ ପରିବାରକୁ କ୍ଷତିପୂରଣ ନମିଳିଛି ସେ ପର୍ଯ୍ୟନ୍ତ ସିଏମସି ଆଗରୁ ମୃତ୍ୟ ଦେହ ଉଠିବନି ବୋଲି ପରିବାର ଓ ସ୍ଥାନୀୟ କର୍ପୋରେଟର ଯେ କାମେଶ୍ୱର ରାଓ କହିଛନ୍ତି ।