କଟକରେ ଜିଲ୍ଲାସ୍ତରୀୟ ବିଶ୍ୱ ମୃତ୍ତିକା ଦିବସ


କଟକ (ଏନ୍‌.ଏମ୍‌.): ସମସ୍ତ ଜୀବଜଗତ ଜୀବନଧାରଣ ପାଇଁ ପ୍ରତ୍ୟକ୍ଷ ବା ପରୋକ୍ଷ ଭାବରେ ମାଟି ମାଆ ଉପରେ ନିର୍ଭରଶୀଳ। ତେଣୁ ମାଟିର ଯତ୍ନ ନେବା ସମସ୍ତଙ୍କର କର୍ତ୍ତବ୍ୟ ହେବା ଉଚିତ୍‌। ମୃତ୍ତିକାର ଯତ୍ନ ପାଇଁ ଏହାର ପରିମାପ, ପର୍ଯ୍ୟବେକ୍ଷଣ ଓ ପରିଚାଳନା ଉପରେ ଗୁରୁତ୍ୱ ଦେବାର ଆବଶ୍ୟକତା ରହିଛି । ଆଜି କଟକ ଜିଲ୍ଲାପାଳଙ୍କ ସମ୍ମିଳନୀ କକ୍ଷଠାରେ ଅନୁଷ୍ଠିତ ବିଶ୍ୱ ମୃତ୍ତିକା ଦିବସ ଅବସରରେ ବିଶିଷ୍ଟ ବକ୍ତାମାନେ ରାସାୟନିକ ସାରର ବ୍ୟବହାର ହ୍ରାସ କରିବା ଏବଂ ଜୈବିକ ସାର ପ୍ରୟୋଗ କରି ମାଟି ମାଆର ଉର୍ବରତା ବଜାୟ ରଖିବା ଉପରେ ଗୁରୁତ୍ୱାରୋପ କରିଥିଲେ। ଜିଲ୍ଲା ପରିଷଦ ଅଧ୍ୟକ୍ଷ କିଶୋର ଚନ୍ଦ୍ର ମିଶ୍ର ମୁଖ୍ୟଅତିଥି ଭାବେ ଯୋଗଦେଇ କୃଷକମାନେ ବିଭିନ୍ନ ସମୟରେ କୃଷି ବୈଜ୍ଞାନିକମାନଙ୍କ ଠାରୁ ଚାଷ ସମ୍ବନ୍ଧୀୟ ପରାମର୍ଶ ଗ୍ରହଣ କରିବାକୁ କହିଥିଲେ। ଏହାଦ୍ୱାରା ଅଧିକ ଅମଳ ମିଳିବା ସହ ଚାଷଜମିକୁ ଦୀର୍ଘସମୟ ପର୍ଯ୍ୟନ୍ତ ସୁସ୍ଥ ରଖାଯାଇପାରିବ। ଅତିରିକ୍ତ ଜିଲ୍ଲାପାଳ ଡା ଦିବ୍ୟଲୋଚନ ମହନ୍ତ ମୃତ୍ତିକା ପରୀକ୍ଷା, ବିିଭିନ୍ନ ପ୍ରକାରର ଜୈବିକ ସାରର ପ୍ରୟୋଗ, ମୃତ୍ତିକା କ୍ଷୟ ରୋକିବା ଓ ସଠିକ୍ ମାତ୍ରାରେ, ସଠିକ୍ ପ୍ରଣାଳୀରେ ଚାଷ କରିବାକୁ ପରାମର୍ଶ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଜିଲ୍ଲା ମୁଖ୍ୟ କୃଷି ଅଧିକାରୀ ଅଶୋକ କୁମାର କର, କୃଷି ବିଜ୍ଞାନ କେନ୍ଦ୍ରର ମୃତ୍ତିକା ବିଜ୍ଞାନ ବିଭାଗର ବରିଷ୍ଠ ବୈଜ୍ଞାନିକ ଦିଲୀପ କୁମାର ଷଡଙ୍ଗୀ, ବାଙ୍କୀ ଜିଲ୍ଲା କୃଷି ଅଧିକାରୀ, ବିଶ୍ୱନାଥ ଦାଶ, ଆଠଗଡ ଜିଲ୍ଲା କୃଷି ଅଧିକାରୀ ଶିବାଶିଷ ମିଶ୍ର, ସାଲେପୁର ଜିଲ୍ଲା କୃଷି ଅଧିକାରୀ ଚନ୍ଦ୍ରମୋହନ ଚାନ୍ଦ, ସହକାରୀ କୃଷି ନିର୍ଦ୍ଦେଶକ (ମୃତ୍ତିକା) ତୃପ୍ତିମୟୀ ନାହାକ ପ୍ରମୁଖ ମୃତ୍ତିକାର ଯତ୍ନ, ରାସାୟନିକ ସାର ଓ ଜୈବିକ ସାରର ବ୍ୟବହାର, ବିଭିନ୍ନ ପ୍ରକାରର କୃଷି ଆଦି ବିଷୟରେ ଆଲୋଚନା କରିଥିବାବେଳେ ସହକାରୀ କୃଷି ନିର୍ଦ୍ଦେଶକ ଅସୀମା ମିଶ୍ର କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ୫୦ ଜଣ କୃଷକଙ୍କୁ ମୃତ୍ତିକା ସ୍ୱାସ୍ଥ୍ୟ କାର୍ଡ ପ୍ରଦାନ କରାଯାଇଥିଲା ଏବଂ ଜିଲ୍ଲାସ୍ତରରେ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀଙ୍କ ମଧ୍ୟରେ ଆୟୋଜିତ ପ୍ରତିଯୋଗୀତାର କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯାଇଥିଲା। ଶେଷରେ ଏକ ଭ୍ରାମ୍ୟମାଣ ମୃତ୍ତିକା ପରୀକ୍ଷାଗାରର ଶୁଭାରମ୍ଭ କରାଯାଇଥିଲା।

By admin

Leave a Reply

Your email address will not be published. Required fields are marked *