କଟକରେ ଚତୁର୍ଦ୍ଧା ମୂର୍ତ୍ତିଙ୍କର ବାହୁଡ଼ା ଯାତ୍ରା
#କଟକ(ଏନ୍.ଏମ୍.): କଟକର ବିଭିନ୍ନ ସ୍ଥାନରେପବିତ୍ର ବାହୁଡା ଯାତ୍ରା ଅନୁଷ୍ଠିତ ହୋଇଯାଇଛି । ସ୍ଥାନୀୟ ଚାନ୍ଦିନୀଚୌକ, ଦୋଳମୁଣ୍ଡାଇ, ରାଣୀହାଟ ସମେତ ଯୋବ୍ରା ଠାରେ ରଥାରୂଢ଼ ଜଗନ୍ନାଥଙ୍କୁ ମାଉସୀମା ଘରୁ ସ୍ୱ ମନ୍ଦିରକୁ ଅଣାଯାଇଥିଲା । ଆଜି କଟକରେ ସମସ୍ତ ଜଗନ୍ନାଥ ମନ୍ଦିରରେ ଆୟୋଜିତ ବାହୁଡ଼ାଯାତ୍ରାରେ ରଥାରୂଢ଼ ଜଗନ୍ନାଥ, ବଳଭଦ୍ର ସୁଭଦ୍ରା ଓ ସୂଦର୍ଶନଙ୍କୁ ଶ୍ରଦ୍ଧାଳୁମାନେ ମନ୍ଦିର ସମ୍ମୁଖରେ ପହଞ୍ଚାଇଛନ୍ତି । ଆସନ୍ତା କାଲି ସୁନାବେଶ ଓ ପରେ ଅଧରପଣା ଲାଗି ହେବା ସହ ନିଳାଦ୍ରୀବିଜେ ଉତ୍ସବ ଅନୁଷ୍ଠିତ ହେବ । ଏହି ଉପଲକ୍ଷେ ଆଜି ଯୋବ୍ରା ନୁଆସାହିରେ ଅବସ୍ଥିତ ଚତୁର୍ଦ୍ଧା ମୂର୍ତ୍ତିଙ୍କର ରଥଟଣା କାର୍ଯ୍ୟକ୍ରମ ଅନୁଷ୍ଠିତ ହୋଇ ଥିଲା । ଅପରାହ୍ନ ୨ ଘଟିକା ସମୟରେ ସୂର୍ଯ୍ୟ ପୂଜା ସମ୍ପାଦିତ ହୋଇଥିଲା । ତତପଶ୍ଚାତ ଠାକୁର ମାନେ ଗୋଟି ପହଣ୍ଡିରେ ଆସି ରଥରେ ବିଜେ କରିଥିଲେ । ଅପରାହ୍ନ ୩ ଘଟିକା ସମୟରେ ସାହି ଅଧିକାରୀ କାଶୀନାଥ ନାୟକ ଛେରା ପହଁରା କରିବା ପରେ ରଥଟଣା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଯୋବ୍ରା ଶାରଳା ମନ୍ଦିର, ଲକ୍ଷ୍ମୀ ବଜାର, ଡିପୋ ଛକ, ବ୍ୟାରେଜ ଛକ ଓ ଶନି ମନ୍ଦିର ଦେଇ ରଥ ଜଗନ୍ନାଥ ମନ୍ଦିର ନିକଟରେ ସନ୍ଧ୍ୟା ୬ ଘଟିକା ସମୟରେ ପହଞ୍ଚି ଥିଲା । ପୁଲିସ ପ୍ରଶାସନ ଓ ବିଦ୍ୟୁତ ବିଭାଗର କର୍ମଚାରୀ ମାନେ ରଥଟଣା ସମୟରେ ଶେଷ ପର୍ଯ୍ୟନ୍ତ ଉପସ୍ଥିତ ରହି ସହଯୋଗ ପ୍ରଦାନ କରିଥିଲେ । ରଥ ଉପରେ ସେବାୟତମାନଙ୍କ ମଧ୍ୟରୁ ସୁଶାନ୍ତ ନାୟକ, ଦେବାଶିଷ ବେହେରା, ସନ୍ତୋଷ ସ୍ୱାଇଁ, ଦାଶରଥୀ ନାୟକ, ନିରଞ୍ଜନ ନାୟକ ଓ ପୁରୋହିତମାନେ ଉପସ୍ଥିତ ରହି ଠାକୁରଙ୍କୁ ସେବା ପ୍ରଦାନ କରିଥିଲେ । ନୂଆସାହି ମନ୍ଦିର ପରିଚାଳନା କମିଟି ସମ୍ପାଦକ ଅମ୍ବିକା ସାମଲ, ଉପଦେଷ୍ଟା ଭରତ ନାୟକ, ଉପେନ୍ଦ୍ର ମହାପାତ୍ର, ଶୁଭେନ୍ଦୁ ମହାନ୍ତି ଓ ଅନ୍ୟାନ୍ୟ ସେବକ ମାନଙ୍କ ସହିତ ଶତାଧିକ ଭକ୍ତ ରଥଟଣା କାର୍ଯ୍ୟକ୍ରମରେ ଯୋଗଦାନ କରି ସହଯୋଗ ପ୍ରଦାନ କରିଥିଲେ ।