କଟକରେ କାୟା ବିସ୍ତାର କରୁଛି ଝାଡ଼ାବାନ୍ତି: ଲୋକ ଦେଖାଣିଆ ପଦକ୍ଷେପ ନେଇ ବଢ଼ୁଛି ଅସନ୍ତୋଷ
କଟକ (ଏନ୍.ଏମ୍.): ରାଜ୍ୟରେ ଏବେ କାୟା ବିସ୍ତାର କରି ଚାଲିଛି ଝାଡ଼ାବାନ୍ତି। ବିଭିନ୍ନ ଜିଲ୍ଲାରେ ଝାଡ଼ାବାନ୍ତି ବ୍ୟାପୁଥିବାବେଳେ କଟକରେ ଏହାର ପ୍ରଭାବ ମଧ୍ୟ ଦେଖିବାକୁ ମିଳିଛି। କଟକ ମହାନଗର ନିଗମ ଅନ୍ତର୍ଗତ ବିଭିନ୍ନ ୱାର୍ଡ଼ରେ ଝାଡ଼ାବାନ୍ତିରେ ଏକାଧିକ ଲୋକେ ପୀଡ଼ିତ ହୋଇଥିବାବେଳେ ସ୍ୱାସ୍ଥ୍ୟ ବିଭାଗ ପକ୍ଷରୁ ନିଆ ଯାଉଥିବା ପଦକ୍ଷେପ କେବଳ ଲୋକ ଦେଖାଣିଆ ବୋଲି ଚର୍ଚ୍ଚା ହେଉଛି। କଟକ ସହରର ବିଭିନ୍ନ ଛକ ବଜାରରେ ଶହ ଶହ ଠେଲାଗାଡ଼ିରେ ଖାଦ୍ୟ ପଦାର୍ଥ ବିକ୍ରି ହେଉଥିବାବେଳେ ଏସବୁର ମାନ କିଭଳି ରହିଛି ତାହା ଯାଞ୍ଚ କରାଯାଉ ନାହିଁ। କେବଳ ଲୋକଦେଖାଣିଆ ଭାବେ ସିଏମସି ପକ୍ଷରୁ ଚଢ଼ାଉ କରାଯାଉଥିଲେ ମଧ୍ୟ ପୂର୍ବଭଳି ଅସ୍ୱାସ୍ଥ୍ୟକର ପରିବେଶରେ ଖାଦ୍ୟ ପ୍ରସ୍ତୁତି ଏବଂ ବିକ୍ରି ହେଉଛି। ସେହିଭଳି ପାନୀୟଜଳ କଥା ନକହିଲେ ଭଲ। ସରକାର ଡ୍ରିଙ୍କ ଫ୍ରମ ଟ୍ୟାପ ଯୋଜନାରେ ଶୁଦ୍ଧ ପାନୀୟ ଜଳ ଯୋଗାଣ ପାଇଁ ବ୍ୟବସ୍ଥା କରିଥିଲେ ମଧ୍ୟ ଏହା ସମ୍ପୂର୍ଣ୍ଣ ବିଫଳ ହୋଇଥିବା ଯୋଗୁଁ ଝାଡ଼ାବାନ୍ତି ଭଳି ଜଳବାହିତ ସଂକ୍ରାମକ ରୋଗ ସହରରେ କାୟା ବିସ୍ତାର କରିଚାଲିଛି। ଗୋଟିଏ ପଟେ ନାଳ ନର୍ଦ୍ଦମା ଠାରୁ ଆରମ୍ଭ କରି ପାନୀୟଜଳ ପର୍ଯ୍ୟନ୍ତ ସବୁ କିଛି ବ୍ୟବସ୍ଥା ନଷ୍ଟ ହେଉଥିବାବେଳେ ବିଭାଗୀୟ ଅଧିକାରୀ, କର୍ମଚାରୀ ତଥା ଏ କାର୍ଯ୍ୟପାଇଁ ଦାୟିତ୍ୱରେ ଥିବା ଠିକା ସଂସ୍ଥାର ବେପରୁଆ ମନୋଭାବକୁ ସ୍ପଷ୍ଟ କରୁଛି। ତେଣୁ କଟକ ସହରରେ ଝାଡ଼ାବାନ୍ତି ରୋଗକୁ କିଭଳି ନିରାକରଣ କରି ମୃତ୍ୟୁଶୂନ୍ୟ କରିବା ନିମନ୍ତେ ସହରର ବୁଦ୍ଧିଜୀବୀ ଦାବି କରିଛନ୍ତି।