ଓଡ଼ିଶା ସରକାରୀ ଚୁକ୍ତିଭିତ୍ତିକ କର୍ମଚାରୀ ମହାସଂଘର ଚେତାବନୀ
ମୁଖ୍ୟମନ୍ତ୍ରୀ ପ୍ରଶାସନିକ ଷଡ଼ଯନ୍ତ୍ରରୁ ବାହାରି ସ୍କିମେଟିକ୍ କର୍ମଚାରୀ ଓ ଶିକ୍ଷକଙ୍କୁ ସ୍ଥାୟୀ ଓ ୨୦୧୩ ପୂର୍ବ ଶିକ୍ଷକ କର୍ମଚାରୀଙ୍କ ଠିକା ସମୟକୁ ମୂଳ ଚାକିରିରେ ଗଣନା କରନ୍ତୁ, ନଚେତ୍ ଆନ୍ଦୋଳନ ତୀବ୍ର ହେବ : ମହାସଂଘ
#ଭୁବନେଶ୍ୱର(ଏନ୍.ଏମ୍.): କେତେକ ଦାବି ନେଇ ଓଡ଼ିଶା ସରକାରୀ ଚୁକ୍ତି ଭିତ୍ତିକ କର୍ମଚାରୀ ମହାସଂଘର ଅସନ୍ତୋଷ ତେଜିବାରେ ଲାଗିଛି । ଓଡ଼ିଶା ରାଜ୍ୟ ସରକାର ରାଜ୍ୟରୁ ଠିକା ବା ଚୁକ୍ତି ଭିତ୍ତିକ ବ୍ୟବସ୍ଥା ପ୍ରତ୍ୟାହାର କରିବା ଦ୍ୱାରା ରାଜ୍ୟର ୫୭ ହଜାର କର୍ମଚାରୀ ଓ ୧୫ ହଜାରରୁ ଊର୍ଦ୍ଧ୍ୱ ହାଇସ୍କୁଲ୍ ଶିକ୍ଷକ ସ୍ଥାୟୀ ହେବା ସହ ଚୁକ୍ତିଭିତ୍ତିକ ସମୟକୁ ମୂଳ ଚାକିରୀରେ ଗଣନା କରି ୬ଟି ନୋସନାଲ୍ ଇନ୍କ୍ରିମେଣ୍ଟ ପ୍ରଦାନର ନିଷ୍ପତ୍ତି ନେଇଥିଲେ ଓ ତାହା ମଧ୍ୟ ପାଳନ କରାଯାଇଥିଲା । ଓଡ଼ିଶାର ମୁଖ୍ୟମନ୍ତ୍ରୀ ଅକ୍ଟୋବର ୧୫ ତାରିଖରେ ଅନୁଷ୍ଠିତ ମନ୍ତ୍ରୀମଣ୍ଡଳ ବୈଠକ ଶେଷରେ ରାଜ୍ୟବାସୀଙ୍କୁ ଉଦ୍ବୋଧନ ଦେଇ କହିଥିଲେ କି ରାଜ୍ୟର ଘୋର ଆର୍ଥିକ ଦୂରାବସ୍ଥା ସମୟରେ ସରକାର ଇଚ୍ଛା ବିରୁଦ୍ଧରେ ଯାଇ ବାଧ୍ୟହୋଇ ଏଭଳି ବ୍ୟବସ୍ଥାକୁ ଗ୍ରହଣ କରିଥିଲେ । କିନ୍ତୁ ବର୍ତ୍ତମାନ ରାଜ୍ୟର ଦୃଢ ଆର୍ଥିକ ସ୍ଥିତି ଓ ଆର୍ଥିକ ବଳକା ରାଜ୍ୟରେ ପରିଣତ ହୋଇଥିବାରୁ ସରକାର ସମୁଦାୟ ଭାବେ ଓଡ଼ିଶା ମାଟିରୁ ଏ କୁତ୍ସିତ ବ୍ୟବସ୍ଥାର ବିଲୋପ ଘଟାଇଥିଲେ । କିନ୍ତୁ ଦୁଃଖ ଓ ଦୁର୍ଭାଗ୍ୟର ବିଷୟ ଯେ, ମୁଖ୍ୟମନ୍ତ୍ରୀଙ୍କ ଏ ଘୋଷଣା ପରେ ରାଜ୍ୟରେ କାମ କରୁଥିବା ୮ ହଜାରରୁ ଊର୍ଦ୍ଧ୍ୱ ପ୍ରାଥମିକ ବିଦ୍ୟାଳୟର ଚୁକ୍ତିଭିତ୍ତିକ କନିଷ୍ଠ ଶିକ୍ଷକ, ବର୍ଷ ବର୍ଷ ଧରି ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅଧୀନରେ କାମ କରୁଥିବାର ଆରବିକେସ୍ ଆୟୁଷ ଡାକ୍ତର, ପିଟିଏସ୍, ପାରାମେଡିକାଲ୍ ଷ୍ଟାଫ୍, ବହୁମୁଖୀ ସ୍ୱାସ୍ଥ୍ୟକର୍ମୀ (ମହିଳା ଓ ପୁରୁଷ) ଜାତି, ଜନଜାତି ବିଭାଗର ଏକଲବ୍ୟ ମଡେଲ୍ ରେସିଡେନ୍ସିଆଲ୍ ସ୍କୁଲ୍ ଶିକ୍ଷକ, କର୍ମଚାରୀ, ପିଜି ଶିକ୍ଷକ, ମହିଳା ମେଟ୍ରୋନ୍ ଯୋଜନା ଓ ସମନ୍ୱୟ ବିଭାଗର ସବ୍ଜେକ୍ଟ ମ୍ୟାଟର ଏକ୍ସପର୍ଟ ଏବଂ ଶିଶୁ ଓ ମହିଳା ବିକାଶ ବିଭାଗର ଶିଶୁ ସୁରକ୍ଷା ଅଧିକାରୀ ଓ କର୍ମଚାରୀଙ୍କ ସମେତ ଅନେକ ବିଭାଗର କର୍ମଚାରୀ ଓ ଶିକ୍ଷକଙ୍କ ଚାକିରୀକୁ ସ୍କିମେଟିକ୍ ଆଳରେ ସ୍ଥାୟୀ କରୁନାହାନ୍ତି । ଏହି ବର୍ଗର କର୍ମଚାରୀମାନେ ଇତିମଧ୍ୟରେ ୫ ବର୍ଷ ରୁ ୧୮ ବର୍ଷ କା ସ୍ୱଳ୍ପ ଦରମାରେ ଦୟନୀୟ ଆର୍ଥିକ ଶୋଷଣ ଓ ସାମାଜିକ ଦୂରାବସ୍ଥା ମଧ୍ୟରେ ଚାକିରୀ କାଳ ପୂର୍ଣ୍ଣ କଲେଣି ।
ସେହିପରି ୨୦୦୧ ମସିହା ପରେ ତଥା ୨୦୧୩ ମସିହା ପୂର୍ବରୁ ବିଭିନ୍ନ ପର୍ଯ୍ୟାୟରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଓ ଗଣଶିକ୍ଷା ବିଭାଗର ପ୍ରାଥମିକ ଓ ହାଇସ୍କୁଲ୍ ଶିକ୍ଷକ, ଯୋଜନା ଓ ସମନ୍ୱୟ ବିଭାଗର କର୍ମଚାରୀ, କୃଷି ଓ କୃଷକ ସଶକ୍ତ ବିଭାଗର ଗ୍ରାମ୍ୟ କୃଷି କର୍ମଚାରୀ, ମତ୍ସ୍ୟ ଓ ପଶୁ ସମ୍ପଦ ବିଭାଗର ସହକାରୀ ମତ୍ସ୍ୟ ଅଧିକାରୀ, ସମେତ ଅନେକ ବିଭାଗର କର୍ମଚାରୀଙ୍କ ଠିକା ଚାକିରୀ ସମୟକୁ ଗଣନା କରିବା ସହ ଇନ୍କ୍ରିମେଣ୍ଟ ପ୍ରଦାନ ନକରିବା ଘଟଣା ପାଇଁ ଆଜି ଅଶାନ୍ତି ଓ ବିଦ୍ରୋହ ଦେଖାଦେଇଛି । ପ୍ରାଥମିକ କନିଷ୍ଠ ଶିକ୍ଷକଙ୍କୁ ସ୍ଥାୟୀ ପାଇଁ ନିର୍ଭର ପ୍ରତିଶ୍ରୁତି ଦେଇ ଉଦ୍ଦେଶ୍ୟମୂଳକ ଭାବେ ଏଥିରୁ ଓହରିଯିବା ଏକ ସୁସ୍ଥ ଓ ମୂଲ୍ୟବୋଧ ଭିତ୍ତିକ ମାନସିକତା ନୁହେଁ ବୋଲି ସଂଘ ପକ୍ଷରୁ କୁହାଯାଇଛି ।
ସରକାର ପରିଚାଳନା ଏକ ପ୍ରବର୍ତ୍ତିତ ପ୍ରକ୍ରିୟା, ସମସ୍ତଙ୍କୁ ସମାନ ନ୍ୟାୟ ଦେବା ଏକ ଗଣତାନ୍ତ୍ରିକ ସରକାରର ମୂଲ୍ୟବୋଧ ଭିତ୍ତିକ ଉତ୍ତର ଦାୟିତ୍ୱ ତଥା କର୍ତ୍ତବ୍ୟ ମଧ୍ୟ । ଯେଉଁମାନେ ରାଜ୍ୟର ଘୋର ଆର୍ଥିକ ଦୁର୍ଦ୍ଦିନରେ ଗଣ୍ଡେ ଖାଇ ଖଣ୍ଡେ ପିନ୍ଧି ସେବା ଯୋଗାଇଥିଲେ, ନିଜ ପିଲାଙ୍କୁ ଅର୍ଥାଭାବରୁ ଭଲ ଶିକ୍ଷା ଦେଇ ପାରିନଥିଲେ ସେମାନଙ୍କ ସେହି ଦୁର୍ଦ୍ଦିନ ସମୟର ସେବାକାଳକୁ ମୂଳ ଚାକିରୀରେ ଗଣତି କରିଦେଲେ ଆକାଶ ଛିଣ୍ଡି ପଡନ୍ତା ନାହିଁ କି ମେଦିନୀ ଭୁସୁଡି ପଡନ୍ତା ନାହିଁ, ଅଧିକନ୍ତୁ ଅବହେଳିତ କର୍ମଚାରୀ ସାମାଜିକ ନ୍ୟାୟ ପାଇ ପାରନ୍ତା ଓ ସରକାରଙ୍କ ପ୍ରଣୀତ ବିିଭିନ୍ନ କାର୍ଯ୍ୟକ୍ରମର ସଫଳ ରୂପାୟନ ଓ ଉନ୍ନତ ଶିକ୍ଷାଦାନ ପାଇଁ ଅଧିକ ପ୍ରତିବନ୍ଧ ଦେଇପାରନ୍ତା ବୋଲି ସଂଘର କର୍ମକର୍ତ୍ତା କହିଛନ୍ତି । ସେହିପରି ବିଭିନ୍ନ ସ୍କିମ୍ରେ ବର୍ଷ ବର୍ଷ ଧରି ସେବା ଯୋଗାଉଥିବା ଡାକ୍ତର, ଶିକ୍ଷକ ଓ କର୍ମଚାରୀମାନେ କ’ଣ ଏତେ ହତଭାଗ୍ୟ ଯେ କେନ୍ଦ୍ରୀୟ ଯୋଜନାରେ ଖଟୁଥିବା ଯୋଗୁଁ ଯେତେ ଭଲ ସେବା ଯୋଗାଇ ଆସୁଥିଲେ ବି ସେମାନଙ୍କୁ ସାରା ଜୀବନ ଅବାଞ୍ଛିତ ଚୁକ୍ତି ଭିତ୍ତିକ ବ୍ୟବସ୍ଥାରେ ରଖି ସେମାନଙ୍କ ଶ୍ରମ ଶକ୍ତି ଓ କର୍ମ ଶକ୍ତିକୁ ଅମାନବୀୟ ଭାବେ ଶୋଷଣ କରିଚାଲିବା । ସେମାନେ ବା ସେମାନଙ୍କ ପରିବାର କ’ଣ ଓଡ଼ିଶାର ନାଗରିକ ନୁହଁନ୍ତି ବା ନିର୍ବାଚନରେ ମତଦାନ କରୁନାହାନ୍ତି? ଗୋଟିଏ ପ୍ରଗତିଶୀଳ ସରକାର ତା’ର ସଚିବାଳୟରେ ଶୀତ ତାପ ନିୟନ୍ତ୍ରିତ କକ୍ଷରେ ବସି ନିୟମ ଗଢୁଥିବା ସଚିବମାନେ ନିଜର ସୌଭାଗ୍ୟକୁ ଛାଡ଼ିଦେଲେ ଉତ୍ତରଦାୟୀ ବ୍ୟବସ୍ଥା ପ୍ରତି ଅଙ୍ଗୀକାରବଦ୍ଧ ନୁହଁନ୍ତି । ଏହି ବର୍ଗର ଅଧିକାରୀମାନେ ପ୍ରତି କଥାରେ ତୃତୀୟ ମହଲା ଓ ମୁଖ୍ୟମନ୍ତ୍ରୀଙ୍କୁ ଇଙ୍ଗିତ କରି ନିଜ କର୍ତ୍ତବ୍ୟରୁ ଖସି ଯାଉଛନ୍ତି ଏବଂ ସର୍ବସାଧାରଣରେ ଗୋଟିଏ ଧାରଣା ସୃଷ୍ଟି କରୁଛନ୍ତି ଯେ ବିଭାଗୀୟ ସଚିବମାନେ ଚାହିଁଲେ ବି ମୁଖ୍ୟମନ୍ତ୍ରୀ କରୁନାହାନ୍ତି । ଏମାନେ ଢୋଲ ଭିତରର ମୂଷା ଓ ସରକାରଙ୍କୁ ପରୋକ୍ଷରେ ବଦନାମ କରିବା ପାଇଁ କାଇଦା ଗ୍ରହଣ କରୁଛନ୍ତି ବୋଲି ସଂଘର କର୍ମକର୍ତ୍ତା କହିଛନ୍ତି । ତୁରନ୍ତ ସମସ୍ତ ସ୍କିମାଟିକ୍ ଶିକ୍ଷକ, ଡାକ୍ତର, ପାରାମେଡିକାଲ୍ ଷ୍ଟାଫ୍ ଓ ଅନ୍ୟ କର୍ମଚାରୀଙ୍କୁ ଅବିଳମ୍ବେ ସ୍ଥାୟୀ କରାଯାଉ ଏବଂ ୨୦୧୩ ନିୟମ ବାହାରେ ବା ପୂର୍ବରୁ ନିଯୁକ୍ତି ପାଇଥିବା ଶିକ୍ଷକ କର୍ମଚାରୀ ଡାକ୍ତର ଓ ପାରାମେଡିକାଲ୍ ଷ୍ଟାଫ୍ଙ୍କୁ ଚୁକ୍ତିଭିତ୍ତିକ ନିଯୁକ୍ତି ସମୟକୁ ମୂଳ ଚାକିରୀ ସମୟ ଭାବେ ଗଣନା କରାଯାଉ । ଏଥିରେ କୌଣସି କାଳକ୍ଷେପଣ ନୀତି ବା ହୀନ ପ୍ରଶାସନିକ ଷଡ଼ଯନ୍ତ୍ର ରଖି ଏହି ବର୍ଗର କର୍ମଚାରୀଙ୍କୁ ନିରାଶ କଲେ ଓଡ଼ିଶାରେ ଖୁବ୍ ଶୀଘ୍ର ଏକ ବୃହତ୍ ଗଣ ଆନ୍ଦୋଳନ ଗଢି ଉଠିବ ବୋଲି ଆଜି ଭୁବନେଶ୍ୱରରେ ଆୟୋଜିତ ବିଭିନ୍ନ କର୍ମଚାରୀ ସଂଗଠନମାନଙ୍କ ମିଳିତ ସାମ୍ବାଦିକ ସମ୍ମିଳନୀରେ ଓଡ଼ିଶା ଚୁକ୍ତି ଭିତ୍ତତ୍ତକ କର୍ମଚାରୀ ମହାସଂଘର ସଭାପତି ବିଜୟ ମଲ୍ଲ, ମୁଖ୍ୟ ଉପଦେଷ୍ଟା ପ୍ରଭାତ ମହାନ୍ତି ପ୍ରମୁଖ ସରକାରଙ୍କୁ ସତର୍କ କରିଦେଇଛନ୍ତି । କର୍ମକର୍ତ୍ତାଙ୍କ ପକ୍ଷରୁ ଏହି ଦାବିକୁ ନେଇ ଆସନ୍ତା ସୋମବାର ମୁଖ୍ୟମନ୍ତ୍ରୀ ଓ ମୁଖ୍ୟ ଶାସନ ସଚିବଙ୍କୁ ଦାବିପତ୍ର ପ୍ରଦାନ କରାଯିବା ସହ ଆନ୍ଦୋଳନରତ ପ୍ରାଥମିକ ଶିକ୍ଷକ ଓ ଆନ୍ଦୋଳନ ପାଇଁ ସଜବାଜ ହେଉଥିବା ହାଇସ୍କୁଲ୍ ଶିକ୍ଷକମାନଙ୍କ ଦାବି ପୂରଣ ପାଇଁ ସରକାରଙ୍କୁ ନିବେଦନ କରିବେ । ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ସାଧାରଣ ସମ୍ପାଦକ କ୍ଷୀତିଶ ପଣ୍ଡା, ସଂଗଠନ ସମ୍ପାଦକ ପ୍ରଶାନ୍ତ ରାଉତରାୟ, ସୁଭ୍ରଜିତ୍ ପ୍ରତିହାରୀ, ଅଶ୍ୱିନୀ ଦାସ, ରାଜେନ୍ଦ୍ର ମଲ୍ଲିକ, ପ୍ରଦୀପ ପ୍ରଧାନ, ଦିନେଶ କୁମାର ପ୍ରଧାନ, ରବୀନ୍ଦ୍ର ସେଠୀ, ସୁଜାତା ଭୂୟାଁ, ଶରଧାମଣି ମୁଦୁଲି, କାହ୍ନୁଚରଣ ପରିଡ଼ା, ଜଗତ୍ଜ୍ୟୋତି ସାମଲ, ସି.ଏସ୍. ସୁନ୍ଦରାୟ ଓ ଅମୀୟ ରଂଜନ ନାଏକ ପ୍ରମୁଖ ଉପସ୍ଥିତ ଥିଲେ ।