ଏସସିବି ମେଡିକାଲରେ ଚିକିତ୍ସିତ ହଇଜା ରୋଗୀମାନଙ୍କୁ ଭେଟିଲେ ବିଧାୟିକା ସୋଫିଆ
କଟକ (ଏନ୍.ଏମ୍.): ବାରବାଟୀ-କଟକ ବିଧାୟିକା ସୋଫିଆ ଫିରଦୋସ ଏସସିବି ମେଡିକାଲରେ ଚିକିତ୍ସିତ ହେଉଥିବା ହଇଜା ରୋଗୀମାନଙ୍କୁ ଭେଟି ସେମାନଙ୍କର ସ୍ୱାସ୍ଥ୍ୟବସ୍ଥା ବିଷୟରେ ପଚାରି ବୁଝିଥିଲେ। ଏସସିବି ଅଧିକ୍ଷକ ଡାକ୍ତର ଗୌତମ ଶତପଥି ବିଧାୟିକାଙ୍କୁ ରୋଗୀମାନଙ୍କର ସ୍ବାସ୍ଥ୍ୟବସ୍ଥା ବିଷୟରେ ବିସ୍ତୃତ ସୂଚନା ପ୍ରଦାନ କରିଥିଲେ। ବର୍ଷା ଆରମ୍ଭରୁ ରାଜ୍ୟରେ ଡାଇରିଆ ବ୍ୟାପିବାରେ ଲାଗିଲାଣି। ଜଣେ ରୋଗୀକୁ ମେଡିକାଲରେ ଭର୍ତ୍ତି ହେଲାବେଳକୁ ଘରେ ଆଉ ଜଣେ ଅସୁସ୍ଥ ହୋଇ ପଡୁଛି। ଧୀରେ ଧୀରେ ଏହା ବଢିବାକୁ ଲାଗିଲାଣି। କଟକ ଏସସିବି ମେଡିକାଲରେ ୩୦ରୁ ଊର୍ଦ୍ଦ୍ଵ ରୋଗୀ ଏବେ ଚିକିତ୍ସିତ ହେଉଛନ୍ତି। ଯାଜପୁରରେ ଏହା ଅତି ମାତ୍ରାରେ ବ୍ୟାପିଛି। କଟକରେ ଯେପରି ଏହି ଅବସ୍ଥା ନହେଉ ସ୍ୱାସ୍ଥ୍ୟ ବିଭାଗ ସେଥିପ୍ରତି ଧ୍ୟାନ ଦେବାକୁ ବିଧାୟିକା ସୋଫିଆ କହିଛନ୍ତି। ତୁରନ୍ତ ସରକାର ଏହା ଉପରେ ଦୃଢ ପଦକ୍ଷେପ ଗ୍ରହଣ କରିବା ସହିତ ଜନ ସଚେତନା କାର୍ଯ୍ୟକ୍ରମ ସୃଷ୍ଟି କରିବା ପାଇଁ ବିଧାୟିକା ସୋଫିଆ ଫିରଦୋସ କହିଛନ୍ତି। ଅନ୍ୟମାନକ ମଧ୍ୟରେ ନଗର କଂଗ୍ରେସ ପୁରବତନ ସଭାପତି ଗିରିବାଳା ବେହେରା, ସ୍ଥାନୀୟ କର୍ପୋରେଟର ଜେ କାମେଶ୍ଵର ରାଓ, ସନ୍ତୋଷ ପାତ୍ର, ସ୍ମୂରତି ରଞ୍ଜନ ରାଉତ, ସୁରଜିତ ସାହୁ, ଅବଦୁଲ ନସିମ, ଶୋନୁ ସ୍ଵାଇଁ, ମହେଶ ରାୟ ପ୍ରମୁଖ ଉପସ୍ଥିତ ଥିଲେ।