ଏଏସ୍ଓ ନିଯୁକ୍ତି ପରୀକ୍ଷା ମାମଲା: ହାଇକୋର୍ଟଙ୍କ ବିନା ଅନୁମତିରେ ପ୍ରକାଶ ପାଇବନାହିଁ ମେରିଟ୍ ଲିଷ୍ଟ
#କଟକ(ଏନ୍.ଏମ୍.): ଆସିଷ୍ଟାଣ୍ଟ ସେକ୍ସନ ଅଫିସର (ଏଏସଓ) ନିଯୁକ୍ତି ପରୀକ୍ଷାରେ ହୋଇଥିବା ବ୍ୟାପକ ଅନିୟମିତତା ମାମଲାର ଆଜି ହାଇକୋର୍ଟରେ ଶୁଣାଣି ହୋଇଯାଇଛି । ଅଦାଲତ ଏହି ମାମଲାରେ ମେରିଟ୍ ଲିଷ୍ଟ୍ ପ୍ରକାଶନ ଉପରେ ରୋକ୍ ଲଗାଇଛନ୍ତି । ଅଦାଲତଙ୍କ ବିନା ଅନୁମତିରେ ଏହି ଲିଷ୍ଟ୍ ପ୍ରକାଶ କରାଯାଇପାରିବ ନାହିଁ ବୋଲି ହାଇକୋର୍ଟ ତାଙ୍କ ଆଦେଶରେ ସ୍ପଷ୍ଟ କରିଛନ୍ତି । ଅନ୍ୟପକ୍ଷରେ ଆସନ୍ତା ଦୁଇ ମାସ ମଧ୍ୟରେ ପୁଣି ଥରେ ପ୍ରାର୍ଥୀମାନଙ୍କ ମେଧା ତାଲିକା ପ୍ରକାଶ କରିବାକୁ ଆଦେଶ ଦେଇଛନ୍ତି । ତେବେ ଆସନ୍ତା ୪ ତାରିଖରେ ୧୦୪୫ପ୍ରାର୍ଥୀଙ୍କର କମ୍ପୁଟର ସ୍କିଲ ଟେଷ୍ଟ ଭୁବନେଶ୍ୱରର ୭ ଟି ଟେକନିକାଲ ଇନଷ୍ଟିଚ୍ୟୁଟରେ ହେବାର ଥିବାବେଳେ ତାହା ଜାରି ରହିବ । ହାଇକୋର୍ଟ ଏହି ମାମଲାରେ ଲୋକସେବା ଆୟୋଗକୁ ମଧ୍ୟ ନୋଟିସ୍ ଜାରି କରିଛନ୍ତି । ସେହିପରି ଏହି ମାମଲାରେ ଓଡିଶା ଲୋକସେବା ଆୟୋଗ (ଓପିଏସସି) ଜବାବ ରଖିବା ପରେ ୩ ଦିନ ମଧ୍ୟରେ ଆବେଦନକାରୀ ରିଜେଣ୍ଡର ଦାଖଲ କରିବାକୁ ହାଇକୋର୍ଟ ଆଦେଶ ଦେଇଛନ୍ତି । ପୂର୍ବରୁ ଉଭୟ ରାଜ୍ୟ ସରକାର ଓ ଓଡ଼ିଶା ଲୋକସେବା ଆୟୋଗ ପକ୍ଷରୁ ଜବାବ ଦାଖଲ ହୋଇ ସାରିଛି । ସୂଚନାଥାଉକି ଆସିଷ୍ଟାଣ୍ଟ ସେକ୍ସନ ଅଫିସର (ଏଏସଓ) ନିଯୁକ୍ତି ପରୀକ୍ଷାରେ ହୋଇଥିବା ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରି ହାଇକୋର୍ଟରେ ଏକାଧିକ ମାମଲା ରୁଜୁ ହୋଇଥିଲା ।ଏହି ମାମଲାରେ ତ୍ରୁଟିପୂର୍ଣ୍ଣ ମୂଲ୍ୟାୟନ ହୋଇଥିବା ଦର୍ଶାଯାଇଥିଲା ।