ଇମ୍ଫା ପକ୍ଷରୁ ମାଗଣା ସ୍ୱାସ୍ଥ୍ୟ ସେବା ଶିବିର
#ଚୌଦ୍ୱାର(ଏନ୍.ଏମ୍.): ଚୌଦ୍ୱାର ଇମ୍ଫାର ସାମାଜିକ ଦାୟିତ୍ୱବୋଧ ଶାଖା ବଂଶୀଧର ଇଲାପଣ୍ଡା ଫାଉଣ୍ଡେସନ ପକ୍ଷରୁ ଚୌଦ୍ୱାର ଶଙ୍କରପୁର ପଞ୍ଚାୟତରେ ବହୁମୁଖି ମାଗଣା ସ୍ୱାସ୍ଥ୍ୟ ସେବା ଶିବିର ଅନୁଷ୍ଠିତ ହୋଇଯାଇଛି । ଉକ୍ତ ଶିବିରକୁ ପୂର୍ବତନ ବିଧାୟକ ଧର୍ମାନନ୍ଦ ବେହେରା, ଇମ୍ଫାର ସିନିୟର୍ ମ୍ୟାନେଜର ସାରଦା ପ୍ରସାଦ ରାଓ, ମାନସ ପ୍ରଧାନ ପ୍ରମୁଖ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ । ଏହି ଶିବିରରେ ଶିଶୁ ରୋଗ ଠାରୁ ଆରମ୍ଭ କରି ସ୍ତ୍ରୀ ରୋଗ ପର୍ଯ୍ୟନ୍ତ ୭ଜଣ ବିଶେଷଜ୍ଞ ଡାକ୍ତର ଯୋଗଦେଇ ରୋଗ ପରୀକ୍ଷା କରିବା ସହିତ ମାଗଣା ଔଷଧ ପ୍ରଦାନ କରିଥିଲେ । ଶଙ୍କରପୁର ପଞ୍ଚାୟତ ସମେତ ୫ଟି ପଞ୍ଚାୟତର ପ୍ରାୟ ୫ ଶହ ରୋଗୀ ଏହି ଶିବିରର ଲାଭ ନେଇ ଥିଲେ । ଏହି ପଞ୍ଚାୟତର ଶତାଧିକ ଜନସାଧାରଣ ମାଗଣାରେ ଡାକ୍ତରୀ ସେବା ପାଇବାରୁ ବଞ୍ଚିତ ଥିବାବେଳେ ଇମ୍ଫାର ଏହି ଭଳି ଲୋକାଭିମୁଖି କାର୍ଯ୍ୟକୁ ଉକ୍ତ ପଞ୍ଚାୟତର ସରପଞ୍ଚ ପ୍ରମୋଦିନୀ ଖଟୁଆ ପ୍ରଶଂସା କରିବା ସହ ଇମ୍ଫା କର୍ତ୍ତୃପକ୍ଷଙ୍କୁ କୃତଜ୍ଞତା ଜଣାଇଛନ୍ତି । ଇମ୍ଫାର ଲୋକସମ୍ପର୍କ ଅଧିକାରୀ ଧ୍ରୁବଚରଣ ରାଉତ ଓ ଆଶିଷ ଦାସ କାର୍ଯ୍ୟକ୍ରମ ପରିଚାଳନା କରିଥିଲେ । ତେବେ ଆଗାମୀ ଦିନରେ ମଧ୍ୟ ଇମ୍ଫା ଏହି ଭଳି ଜନସେବା ମୂଳକ କାର୍ଯ୍ୟ ଜାରିରଖିବ ବୋଲି ଲୋକ ସମ୍ପର୍କ ଅଧିକାରୀ ଶ୍ରୀ ରାଉତ ପ୍ରକାଶ କରିଛନ୍ତି ।