ଇମ୍ଫା ଦ୍ୱାରା ସ୍କୁଲ ପାଠ୍ୟ ଉପକରଣ ଓ କୃତି ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧନା ପ୍ରଦାନ ଉତ୍ସବ

#ଚୌଦ୍ୱାର(ଏନ୍‌.ଏମ୍‌.): ଚୌଦ୍ୱାର ସ୍ଥିତ ଇମ୍ଫା ଶିଳ୍ପୀଗୋଷ୍ଠୀର ସାମାଜିକ ଓ ଦାୟିତ୍ୱବୋଧ ଶାଖା ବଂଶୀଧର ଓ ଇଲାପଣ୍ଡା ଫାଉଣ୍ଡେସନ୍ ପକ୍ଷରୁ ସ୍କୁଲ ପାଠ୍ୟ ଉପକରଣ ଓ ବିଭିନ୍ନ ପ୍ରତିଯୋଗୀତାରେ କୃତି ଛାତ୍ରଛାତ୍ରୀମାନଙ୍କ ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଫାଉଣ୍ଡେସନ୍ ଦ୍ୱାରା ଆୟୋଜିତ ଟାଙ୍ଗୀଚୌଦ୍ୱାର ଆଥଲେଟିକ୍ ମିଟ୍ ୨୦୨୩ରେ କୃତି ପ୍ରତିଯୋଗୀମାନଙ୍କୁ ଜିଲ୍ଲାସ୍ତରୀୟ ଖେଳିବା ପାଇଁ ସୁଯୋଗ ମିଳିବା ପରେ ମୋଟ ୧୫ଜଣ କୃତି ଖେଳାଳୀ ନିଜର କୌଶଳ ପ୍ରଦର୍ଶନ କରିଥିଲେ । ଏହି ଅବସରରେ ଆଜି ଫାଉଣ୍ଡେସନ୍ ପକ୍ଷରୁ ସେମାନଙ୍କୁ ସମ୍ବର୍ଦ୍ଧନା ସହ ପ୍ରମାଣପତ୍ର ପ୍ରଦାନ କରାଯାଇଥିଲା । ସେହିପରି ଅଞ୍ଚଳର ବିଭିନ୍ନ ସ୍କୁଲକୁ ପାଠ୍ୟ ଉପକରଣ ପ୍ରଦାନ କରାଯାଇଥିଲା । ଇମ୍ଫାର ବରିଷ୍ଠ ଲୋକସମ୍ପର୍କ ଅଧିକାରୀ ଧୃବଚରଣ ରାଉତଙ୍କ ସଂଯୋଜନାରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟଅତିଥ୍ ଭାବେ ଚୌଦ୍ୱାର-କଟକ ବିଧାୟକ ସୌଭିକ୍ ବିଶ୍ୱାଳ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଇମ୍ଫାର ଉପସଭାପତି ବିନୟ ଅଗ୍ରୱାଲ, ଉପନଗରପାଳ ଶୁଭେନ୍ଦ୍ର ସାମଲ, ଇମ୍ଫାର ମାନବ ସମ୍ବଳ ଅଧିକାରୀ ଜି.ଶାରଦା ପ୍ରସାଦ ରାଓ, ଟାଙ୍ଗୀ-ଚୌଦ୍ୱାର ଆଥଲେଟିକ୍ ଆସୋସିଏସନ୍‌ର କାର୍ଯ୍ୟକାରୀ ସଭାପତି ଦିଲ୍ଲୀପ ଛତାର, ସମ୍ପାଦକ ବିଜୟ କୁମାର ସାହୁ ପ୍ରମୁଖ ଉପସ୍ଥିତ ଥିଲେ । ସେହିପରି ବିଧାୟକ ଶ୍ରୀ ବିଶ୍ୱାଳଙ୍କ ଅନୁମୋଦନକ୍ରମେ ଚୌଦ୍ୱାରର ଶିଶୁ ନିଶାନିବାରଣ କେନ୍ଦ୍ର ପରିବାରର ମୁଖ୍ୟ ନରୋତ୍ତମ ଦାସଙ୍କୁ ଇମ୍ଫା ପକ୍ଷରୁ ଏକ କମ୍ପ୍ୟୁଟର ସେଟ୍ ପ୍ରଦାନ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ଆଥଲେଟିକ୍ ଆସୋସିଏସନ୍‌ର ସଭ୍ୟ ଭାସ୍କର ଚନ୍ଦ୍ର ରାଉତରାୟ, ଅଶ୍ୱିନୀ ଜେନା, ଅମୂଲ୍ୟ ରାଉତରାୟ, ମାନସ ପରିଡ଼ା, ଭାସ୍କର ପ୍ରସାଦ ମହାପାତ୍ର, ଅନ୍ତର୍ଯ୍ୟାମୀ ସାହୁ, ଭୀମସେନ୍ ବିଶ୍ୱାଳ ଓ ଇମ୍ଫା ଅଧିକାରୀ ମାନସ ରଞ୍ଜନ ପ୍ରଧାନ, ଅଭିଷେକ ଘୋଷ, ସୁନିଲ କ୍ରିଷ୍ଣା ଦାସ, ସ୍ଥିତପ୍ରଜ୍ଞ ଦାସ, ରାକେଶ ମିଶ୍ର ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଶେଷରେ ଇମ୍ଫାର ଲୋକସମ୍ପର୍କ ବିଭାଗର ଉପ-ସାଧାରଣ ପ୍ରଶାସକ ଶ୍ରୀ ରାଉତ ଧନ୍ୟବାଦ ଅର୍ପଣ କରିଥିଲେ ।