ଇମ୍ଫା କାରଖାନାରୁ ଆସିଲା ପ୍ରଚଣ୍ଡ ଶବ୍ଦ: ଦୁଲୁକି ପଡ଼ିଲା ଚୌଦ୍ୱାର
ବିପଦମୁକ୍ତ ଥିବା କହିଲେ କର୍ତ୍ତୃପକ୍ଷ
ଚୌଦ୍ୱାର(ଏନ୍.ଏମ୍.): ଚୌଦ୍ୱାର ସ୍ଥିତ ଇମ୍ଫା କାରଖାନା ଭିତରେ ପ୍ରଚଣ୍ଡ ଶବ୍ଦ ହେବା ସହ ସମଗ୍ର ଚୌଦ୍ୱାର ଅଞ୍ଚଳ ଦୁଲୁକି ପଡ଼ିଥିବାବେଳେ ଆଖପାଖ ପ୍ରାୟ ୧୦କିଲୋମିଟର ବ୍ୟାପୀ ଏହି ଶବ୍ଦ ଶୁଣିବାକୁ ମିଳିଛି। ପ୍ରଥମେ ଏଭଳି ଶବ୍ଦ କେଉଁଠାରୁ ଆସିଲା ଜଣାପଡ଼ିନଥିଲେ ମଧ୍ୟ ପରବର୍ତ୍ତୀ ସମୟରେ ଇମ୍ଫା କାରଖାନା ଭିତରୁ ଆସିଥିବା ଜଣାପଡ଼ିଛି। ତେବେ ଏହି ଶବ୍ଦ ଯୋଗୁଁ ଜନସାଧାରଣ ଭୟଭୀତ ହୋଇ ପଡ଼ିବା ସହ ବୋମାମାଡ଼ କିମ୍ବା ମିଜାଇଲ ମାଡ଼ ବୋଲି ଲୋକେ ଭାବି ନେଇଥିଲେ। ଫଳରେ କିଛି କିଛି ଅଞ୍ଚଳରେ ଲୋକେ ଦୌଡ଼ାଦୌଡ଼ି ମଧ୍ୟ କରିବା ଆରମ୍ଭ କରିଦେଇଥିଲେ। କିଛି ଲୋକଙ୍କ ହାତରୁ ଧରିଥିବା ସାମଗ୍ରୀ ଖସି ପଡ଼ିଥିଲା। ମାତ୍ର କିଛି ସମୟ ପରେ ସବୁ କିଛି ସ୍ୱାଭାବିକ ଥିବା ଜଣାପଡ଼ିଥିଲା। ଏହା କୌଣସି ବୋମା କିମ୍ବା ମିଜାଇଲ ମାଡ଼ ନୁହେଁ ବୋଲି ଲୋକେ ଜାଣିବାକୁ ପାଇଥିଲେ। ତେବେ ଏହା କେଉଁ କାରଣରୁ କେଉଁଠୁ ଏଭଳି ପ୍ରଚଣ୍ଡ ଶବ୍ଦ ହେଲା ଲୋକେ ଜାଣିବାକୁ ଚାହିଁଥିଲେ। ଏଭଳି ଘଟଣା ସକାଳ ପ୍ରୟ ୭ଟାରୁ ୮ଟା ମଧ୍ୟରେ ହୋଇଥିଲେ ମଧ୍ୟ କେଉଁଠୁ ଏଭଳି ଶବ୍ଦ ଆସିଲା ସହଜରେ ବୁଝିପାରିଲେ ନାହିଁ। କିଛି ଘଣ୍ଟା ପରେ ଜଣାପଡ଼ିଲା ଯେ, ସ୍ଥାନୀୟ ଇମ୍ଫା କାରଖାନା ମଧ୍ୟରୁ ଏଭଳି ଶବ୍ଦ ବାହାରିଥିଲା। ତେବେ ଲୋକେ ଆହୁରି ଭୟଭୀତ ହୋଇ ପଡ଼ିଥିଲେ। ଏତେ ବଡ଼ ଶବ୍ଦ ହୋଇଥିବାରୁ ନିଶ୍ଚୟ ଗୋଟିଏ ବଡ଼ ଧରଣର ଦୁର୍ଘଟଣା ଘଟିଛି ଭାବି ଭିତରେ କାମ କରୁଥିବା ଲୋକଙ୍କ କିଛି କ୍ଷତି ହେବା ଆଶଙ୍କାରେ ପରିବାର ଲୋକେ ଆତଙ୍କିତ ହୋଇ ପଡ଼ିଥିଲେ। ତେବେ ସେମିତି କିଛି କ୍ଷତି ହୋଇ ନଥିବା ଜଣାପଡ଼ିଥିଲା। ଏ ନେଇ ଇମ୍ଫା ଲୋକ ସମ୍ପର୍କ ଅଧିକାରୀଙ୍କୁ ଯୋଗାଯୋଗ କରିବା ପରେ ଜଣାପଡ଼ିଲା ଯେ, ଏହା କୌଣସି ଦୁର୍ଘଟଣା ହୋଇ ନାହିଁ କି କାହାର କିଛି କ୍ଷତି ହୋଇ ନାହିଁ। ଯେତେବେଳେ ଭାଟିରୁ ଲିକ୍ୟୁଇଡ଼ କ୍ରୋମାଇଟ ବାହାରେ ଏଭଳି ଛୋଟ ବଡ଼ ଶବ୍ଦ ହେବା ସ୍ୱାଭାବିକ। ତେବେ ଆଜି ଟିକେ ଅଧିକ ଶବ୍ଦ କରିଥିବା ସେ ସ୍ୱୀକାର କରିବା ସହ ଏନେଇ ବିଭାଗୀୟ ଖୋଳତାଡ଼ ମଧ୍ୟ ଚାଲିଛି। କାହିଁକି ଏଭଳି ଶବ୍ଦ ହେଲା, ପୂର୍ବରୁ ଯେଉଁଭଳି ଶବ୍ଦ ହୁଏ ତାହା ଠାରୁ ଆଜି କାହିଁକି ଅଧିକ ହେଲା ସେ ନେଇ ଯାଞ୍ଚ ମଧ୍ୟ ଚାଲିଛି। ଏ ବିଷୟରେ ବିଶେଷଜ୍ଞଙ୍କ ସହ ଆଲୋଚନା କରାଯାଇ ଦାୟିତ୍ୱରେ ଥିବା କର୍ମଚାରୀଙ୍କୁ ମଧ୍ୟ ପଚରା ଉଚରା ଚାଲିଛି। ତେବେ ଏଭଳି ଶବ୍ଦ କମ୍ପାନୀ କିମ୍ବା ଆଖପାଖ ଅଞ୍ଚଳରେ କୌଣସି କ୍ଷତି କରିନଥିବା ଲୋକ ସମ୍ପର୍କ ଅଧିକାରୀ ଧ୍ରୁବଚରଣ ରାଉତ ପ୍ରକାଶ କରିଛନ୍ତି।