ଇପିଏଫ ପେନସନର୍ସ ସଂଘ ପକ୍ଷରୁ ରାଜ୍ୟପାଳଙ୍କୁ ସ୍ମାରକପତ୍ର ପ୍ରଦାନ

#ଭୁବନେଶ୍ୱର(ଏନ୍‌.ଏମ୍‌.): ଅଲ ଓଡିଶା ଇପିଏଫ ପେନସନର୍ସ ଆସୋସିଏସନର ଏକ ପ୍ରତିନିଧିଦଳ ଆଜି ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କୁ ରାଜଭବନ ଠାରେ ସାକ୍ଷାତକରି ଏକ ସ୍ମାରକ ପତ୍ର ପ୍ରଦାନ କରିଛନ୍ତି । ମହାମହିମ ରାଷ୍ଟ୍ରପତିଙ୍କ ଉଦେଶ୍ୟରେ ପ୍ରଦତ୍ତ ଏହି ସ୍ମାରକ ପତ୍ରରେ ଓଡିଶା ସମେତ ସାରା ଦେଶରେ ଥିବା ୭୫ ଲକ୍ଷ ଇପିଏଫ ପେନସନଭୋଗୀମାନଙ୍କୁ ବର୍ତ୍ତମାନ ମିଳୁଥିବା ସର୍ବନିମ୍ନ ମାସିକ ୧୦୦୦ଟଙ୍କାରୁ ୯୦୦୦ଟଙ୍କାକୁ ବୃଦ୍ଧି କରିବା ସହ ଦରଦାମ ବୃଦ୍ଧିର ଭରଣା ପାଇଁ ମହଙ୍ଗା ଭତ୍ତା ପ୍ରଦାନ କରିବାକୁ ଅନୁରୋଧ କରାଯାଇଛି । ଏଠାରେ ଉଲ୍ଲେଖଯୋଗ୍ୟଯେ ବର୍ତ୍ତମାନ ସପ୍ତମ ବେତନ କମିଶନ ସୁପାରିଶ ଆଧାରରେ କେନ୍ଦ୍ର ସରକାର ସେମାନଙ୍କ ପେନସନ ଭୋଗୀଙ୍କୁ ମାସିକ ସର୍ବନିମ୍ନ ୯୦୦୦ଟଙ୍କା ପେନସନ ଗତ ଜାନୁଆରୀ ୧୬ ମସିହାରୁ ମହଙ୍ଗା ଭତ୍ତା ସହ ପ୍ରଦାନ କରୁଛନ୍ତି । ଦେଶର ବିକାଶରେ ସମଭାଗିଦାରୀ ହୋଇଥିବା ଇପିଏଫ ପେନସନ ଭୋଗୀମାନଙ୍କୁ କେନ୍ଦ୍ର ସରକାର ସେପ୍ଟେମ୍ବର ୨୦୧୪ ମସିହାରୁ ବିନା ମହଙ୍ଗା ଭତ୍ତାରେ ମାତ୍ର ୧୦୦୦ ଟଙ୍କା ପ୍ରଦାନ କରୁଛନ୍ତି । ଏହାଫଳରେ ଏହି ବରିଷ୍ଠ ନାଗରିକମାନେ ପରିଣତ ବୟସରେ ଆବଶ୍ୟକ ଖାଦ୍ୟ ଓ ଚିକିତ୍ସା ଅଭାବରୁ ଦୁର୍ଦିନରେ ଦିନ କାଟୁଛନ୍ତି । ପେନସନ ବୃଦ୍ଧିପାଇଁ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଓଡିଶାର ୧୭ର ଜଣ ସାଂସଦ କେନ୍ଦ୍ର ସରକାରଙ୍କୁ ଚିଠି ଲେଖି ଅନୁରୋଧ କରିଥିଲେ ମଧ୍ୟ ତାହା ବିଚାର ନହୋଇ ପଡ଼ିରହିଛି । ଏଣୁ ମହାମହିମ ରାଷ୍ଟ୍ରପତିଙ୍କ ହସ୍ତକ୍ଷେପ ଲୋଡି ପେନସନ ବୃଦ୍ଧିପାଇଁ ଏହି ସ୍ମାରକପତ୍ର ରାଜ୍ୟପାଳଙ୍କ ଜରିଆରେ ପ୍ରଦାନ କରାଯାଇଛି । ଏହି ସାକ୍ଷାତ କାର୍ଯ୍ୟକ୍ରମରେ ଆସୋସିଏସନ ତରଫରୁ ବିକ୍ରମ ଛୋଟରାୟ, ରାଜକିଶୋର ସ୍ୱାଇଁ, ବିନୋଦ ବେହେରା, ଅଲେଖ ରାଉତ, ନିହାର ପଟ୍ଟନାୟକ, କଣ୍ଡୁରୀ ଚରଣ ସୁବୁଦ୍ଧି, ପ୍ରକାଶ ପଟ୍ଟନାୟକ, ବନମାଳୀ ବେହେରା, ବିମ୍ବାଧର ସାହୁ ଓ ଧୀରେନ୍ଦ୍ର ବେହେରା ପ୍ରମୁଖ ଉପସ୍ଥିତ ଥିଲେ । ସଭାପତି ଇଂ. ବିଜୟ କୁମାର ଜେନା, ସାଧାରଣ ସମ୍ପାଦକ ଭାଗ୍ୟଧର ବ୍ରହ୍ମା, ପ୍ରଫୁଲ୍ଲ ଦାସ, ସରୋଜ କାନ୍ତ ମଲ୍ଲିକ ଓ ଗୀତାଞ୍ଜଳି ପାତ୍ର ପ୍ରମୁଖ ରାଜ୍ୟପାଳଙ୍କ ସହ ଆଲୋଚନା କରିଥିଲେ ।