ଆଶା କର୍ମଚାରୀମାନଙ୍କ ଦାବି ପୂରଣ ନହେଲେ ରାଜ୍ୟବ୍ୟାପୀ ଆନ୍ଦୋଳନ ଚେତାବନୀ

#କଟକ(ଏନ୍‌.ଏମ୍‌.): ରାଜ୍ୟରେ ଆଶାକର୍ମୀମାନଙ୍କୁ ସରକାର ସର୍ବଦା ଅଣଦେଖା କରୁଛନ୍ତି । ବର୍ଷ ବର୍ଷ ଧରି ବିଭିନ୍ନ ସମସ୍ୟାର ସମାଧାନ ନେଇ ଦାବି କରି ଆସୁଥିଲେ ମଧ୍ୟ ସରକାର ଏ ନେଇ କୌଣସି ପଦକ୍ଷେପ ଗ୍ରହଣ କରୁନାହାନ୍ତି । ତେଣୁ ଆଉ ଆଗକୁ ଏଭଳି ବୈମାତୃକ ମନୋଭାବକୁ ସହ୍ୟ କରିହେବ ନାହିଁ ରାଜ୍ୟବ୍ୟାପୀ ଆନ୍ଦୋଳନ ହେବ ବୋଲି ଓଡ଼ିଶା ରାଜ୍ୟ ଆଶାକର୍ମୀ ସଂଘ ପକ୍ଷରୁ ଚେତାବନୀ ଦିଆଯାଇଛି । ଅଭିଯୋଗ ଅନୁଯାୟୀ, ରାଜ୍ୟରେ ମାତୃ ଓ ଶିଶୁ ମୃତ୍ୟୁହାର କମାଇବା ଏବଂ ଓଡ଼ିଶା ସରକାର ଏଥିପାଇଁ ଜାତୀୟସ୍ତରରେ ପ୍ରଶଂସା ପାଇ ଆସୁଥିଲାବେଳେ ଆଶାକର୍ମୀ ମାନଙ୍କର ନିଷ୍ଠାପର ଉଦ୍ୟମ ଫଳରେ ଏହା ସମ୍ଭବପର ହୋଇ ପାରିଛି । ମାତ୍ର ରାଜ୍ୟ ସରକାର ଏହି ଆଶାକର୍ମୀ ମାନଙ୍କୁ ଅଣଦେଖା କରିଆସୁଛନ୍ତି । ଦୀର୍ଘ ୧୫ ବର୍ଷରୁ ଉର୍ଦ୍ଧ୍ୱ କାଳ ଧରି ଆଶାକର୍ମୀ ମାନେ ଗାଁ ଗାଁ ବୁଲି ମାଁ ଓ ଶିଶୁ ମାନଙ୍କର ଯତ୍ନ ନେଇ ଆସୁଥିଲା ବେଳେ ଏମାନଙ୍କୁ ଏପର୍ଯ୍ୟନ୍ତ ସରକାରୀ ମାନ୍ୟତା, ସ୍ଥାୟୀ ନିଯୁକ୍ତି ଏବଂ ପାରିଶ୍ରମିକ ବାବଦ ବେତନ ମିଳୁନାହିଁ । ଏମାନଙ୍କୁ ମାସିକ ୪ହଜାର ୫ଶହ ଟଙ୍କା ପାରିଶ୍ରମିକ ବାବଦ ଭତ୍ତା ଆକାରରେ ଦିଆଯାଉଛି । ରାଜ୍ୟ ସରକାର ଅବିଳମ୍ବେ ଆଶାକର୍ମୀ ମାନଙ୍କୁ ସରକାରୀ ମାନ୍ୟତା, ସ୍ଥାୟୀ ନିଯୁକ୍ତି, ସାମାଜିକ ସୁରକ୍ଷା ସହିତ ମାସିକ ବେତନ ୧୮ ହଜାର ଟଙ୍କା ଦେବାପାଇଁ ଓଡ଼ିଶା ରାଜ୍ୟ ଆଶାକର୍ମୀ ସଂଘ ପକ୍ଷରୁ ଆଜି ଏକ ସାମ୍ବାଦିକ ସମ୍ମିଳନୀରେ ଦାବି କରାଯାଇଛି । ସ୍ଥାନୀୟ ସିଡିଏ ୮ ନମ୍ବର ସେକ୍ଟର ସ୍ଥିତ ଭାରତୀୟ ମଜଦୁର ସଂଘ କାର୍ଯ୍ୟାଳୟ ଠାରେ ସଂଘ ତରଫରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସଂଘର ରାଜ୍ୟ ସଭାନେତ୍ରୀ ମମତା ମହାନ୍ତି, କାର୍ଯ୍ୟକାରୀ ସଭାପତି ସକୁନ୍ତଳା ଗୋଚ୍ଛାୟତ, ସହସମ୍ପାଦିକା ଧରିତ୍ରୀ ବାରିକ, ଅପର୍ଣ୍ଣା ପ୍ରଧାନ, ମୀନା ମହାନ୍ତ, ପ୍ରମିଳା ମହାନ୍ତ, ଭାରତୀୟ ମଜଦୁର ସଂଘର ରାଜ୍ୟ ସଂଗଠନ ସମ୍ପାଦକ ଲକ୍ଷ୍ମଣ କୁମାର ଦାସ, କଟକ ଜିଲ୍ଲା ସହସମ୍ପାଦିକା ଜ୍ୟୋତ୍ସ୍ନା ରାଣୀ ସିଂ, ଭାରତୀୟ ମଜଦୁର ସଂଘ କେନ୍ଦୁଝର ଜିଲ୍ଲା ସହସମ୍ପାଦକ ଚନ୍ଦନ ବଈପାଇ, ଭାରତୀୟ ମଜଦୁର ସଂଘ ରାଜ୍ୟ ବରିଷ୍ଠ କାର୍ଯ୍ୟକର୍ତ୍ତା ବସନ୍ତ କୁମାର ସାହୁ ପ୍ରମୁଖ ଉପସ୍ଥିତ ରହି କହିଲେ ଯେ, ରାଜ୍ୟର ପ୍ରାୟ ୫୦ ହଜାରରୁ ଉର୍ଦ୍ଧ୍ୱ ଆଶାକର୍ମୀ ମାନେ ବିଭିନ୍ନ ଦୁର୍ବିପାକ ସମୟରେ ମାଆ ଓ ଶିଶୁଙ୍କ ସେବା ଓ ଯତ୍ନ କରି ଆସିଛନ୍ତି । ଯାହା ଫଳରେ ଓଡ଼ିଶା ଜାତୀୟସ୍ତରରେ ଏଥିପାଇଁ “ଏ’ ଗ୍ରେଡ଼ ପାଇଛି । ଆଶାକର୍ମୀ ମାନଙ୍କର ନିଷ୍ଠାପର ଉଦ୍ୟମ ଯୋଗୁଁ ଏହା ସମ୍ଭବପର ହୋଇପାରିଛି । ତେଣୁ ରାଜ୍ୟ ସରକାର ଆଶାକର୍ମୀ ମାନଙ୍କର ଦାବିଗୁଡିକ ଉପରେ ବିଚାର କରି ଏଗୁଡ଼ିକ ତୁରନ୍ତ ପୂରଣ କରିବା ପାଇଁ ସାମ୍ବାଦିକ ସମ୍ମିଳନୀରେ ଦାବି କରାଯାଇଛି । ଦାବି ଗୁଡିକ ମଧ୍ୟରେ ରହିଛି ଜାତୀୟ ସ୍ୱାସ୍ଥ୍ୟ ମିଶନକୁ ସ୍ଥାୟୀ କରିବା, ଆଶାକର୍ମୀମାନଙ୍କୁ ସରକାରୀ ମାନ୍ୟତା ପ୍ରଦାନ କରିବା, ଯେ ପର୍ଯ୍ୟନ୍ତ ସରକାରୀ ମାନ୍ୟତା ପ୍ରଦାନ କରାଯାଇ ନାହିଁ, ମାସିକ ୧୮ ହଜାର ଟଙ୍କା ବେତନ ଦେବା, ଆଶାକର୍ମୀମାନଙ୍କୁ ଯୋଗ୍ୟତା ଭିତ୍ତିରେ ପଦୋନ୍ନତି ଦେବା, ସାମାଜିକ ସୁରକ୍ଷା ଯୋଗାଇ ଦେବା, ଅବସର କାଳୀନ ସହାୟତା ୫ ଲକ୍ଷ ଟଙ୍କା ସହ ମାସିକ ୫ ହଜାର ଟଙ୍କା ପେନସନ ଯୋଗାଇ ଦେବା, କାର୍ଯ୍ୟରତ ଅବସ୍ଥାରେ ମୃତ୍ୟୁବରଣ କଲେ ୫ ଲକ୍ଷ ଟଙ୍କାର ସହାୟତା ରାଶି ଦେବାସହ ପରିବାରର ଜଣକୁ ନିଯୁକ୍ତି ଦେବା । ରାଜ୍ୟ ସରକାର ଆଶାକର୍ମୀମାନଙ୍କର ଦାବିଗୁଡିକ ତୁରନ୍ତ ପୂରଣ ନକଲେ ଆଗାମୀ ଦିନରେ ଓଡ଼ିଶା ରାଜ୍ୟ ଆଶାକର୍ମୀ ସଂଘ ଆନ୍ଦୋଳନ ପାଇଁ ରାଜରାସ୍ତାକୁ ଓହ୍ଲାଇବେ ଏବଂ ରାଜ୍ୟ ବ୍ୟାପୀ କାର୍ଯ୍ୟବନ୍ଦ ଆନ୍ଦୋଳନ ପାଇଁ ବାଧ୍ୟ ହେବେ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି ।